Read berom 2 Samwɛl 9 Bible Online

2 Samwɛl 9 - berom bible

2 Samwɛl 9

¹Tuhak, Davit a hwo rangal, “Kɛ mwat hwak a tɛ́t ɛ e ji lɔ Saul, na a ra a yɛ pyɛ́ ryat yaga sa mɛ Yɔnatan arɛt?”

²Ko di, mwât fwôm lɔ Saul hwak á sɛ̀ de reza mɛ à Ziba. Ba yila hɛ na a wɔ́ na gbɔng gwɔ̀m. Ko Davit o a rangal hɛ, a ye, “E hwo à Ziba a?” Ko a toyo a yɛ, a ye, “Ey, e me wɛ, à Da!”

³Gbɔng gwɔ̀m a rangal hɛ, a ye, “Mwat hwak a sé de a tɛ́t ɛ e ji lɔ Saul de ma rɔda dura a yɛ nerat de Dagwi Darwey e simo arɛt?” Ziba a yang ɛ, “Hwêy Yɔnatan hak ha sɛ́, ko ha de sé guruk e mwa bol mɛ.”

⁴Gbɔng gwɔ̀m a rangal hɛ, a ye, “A sé e gwa ɛ?” Ziba a yang ɛ, “A sé e lɔ Makir Amiyɛl e Lɔ-Dɛbar.”

⁵Ano kwong, Davit a tɛ̀ be wɔ̀ vey na yɛ.

⁶Jeng de Mɛfibɔshɛt Yɔnatan Saul a pom na Davit, ko a vɛ̌ gaba e nuyel mɛ na a nɔng ɛ nerey. Davit a yang ɛ, “E hwo à Mɛfibɔshɛt a?” Ko a toyo a yɛ, a ye, “Ey, à Da, e me.”

⁷Davit a yang ɛ, “Hwo kwon wok bengyip wɛt. Ma rɔda ra a hwo pyɛ́ ryat yaga da mō Yɔnatan. Ma rɔda toyo a hwo na mwa câp da mo kunat Saul, ko hwà rɔda re pyɛ́ tanga me e ra tebut hom kayɛ jeng.”

⁸Mɛfibɔshɛt a to gaba e nuyel mɛ, a ye, “Káa, à Da, ma sé sede revîn vu zɔng! Yaga sɛ́ de hwô ra a me pyɛ́ ryat yemo ano ɛ?”

⁹Ko gbɔng gwɔ̀m o a tɛ̀, be yila mwât fwôm Saul, Ziba, ko a yang ɛ, “Di, ma sé nɔ̂ng Mɛfibɔshɛt, hwêy hwêy da lɔ mō mwa pyɛ́ de ya sé yê Saul na belɔ mɛ.

¹⁰Hwo tanga nèy mō na bemât fwom mō yin a rɔda how a Mɛfibɔshɛt cāp o na yin tula a yɛ pyɛ́ mo yaga lɔ mɛ. Yɛ Mɛfibɔshɛt kwong a rɔda re pyɛ́ tanga me e tebut hom kayɛ jeng.” Ziba pyɛ mɛ a vɔk nèy kuru na nɛ netungun, tanga bemât fwom kuru baba.

¹¹Ziba mo a yâng gbɔng gwɔ̀m, “À da, ma rɔda ra kayɛ pyɛ de hwo, darwey hom, hwà nɔng me nu na me ra.” Ano kwong, Mɛfibɔshɛt a re pyɛ́ e ra tebut gbɔng gwɔ̀m.

¹²Mɛfibɔshɛt á vɔk hwey sɛl de bá tâng hɛ à Mika. Ko mwa belɔ Ziba bá tɛ́ ɛn bemât fwom mɛ.

¹³Mɛfibɔshɛt de a sè guruk e mwa bol mɛ, a wɔ sangal e Yɛrusalɛm, yaga á re pyɛ́ e ra tebut gbɔng gwɔ̀m kayɛ jeng.