Read berom 1 Begwɔ̀m 1 Bible Online

1 Begwɔ̀m 1 - berom bible

1 Begwɔ̀m 1

¹Gbɔng Gwɔ̀m Davit a ga kwop kpushuk. Bemât fwom mɛ ba bangas hɛ na berugû nemɔɔ, ko mwa ano, a tɔk wok nemɔɔ wɛt.

²Yaga ano, bemât badu mɛ ba yang ɛ, “À darwey, tik na wot a jama yorom-hwong hwak de a rɔda sangal tanga hwo, na a bɛrɛng hwo. A rɔda dyɛngɛs na a kúlsa hwo, na hwo wok nemɔɔ.”

³Ba tɛ̀ be jama zɛrɛ̂ hwong e ji sevwêl Israyɛl mwa, ko ba sɛ̀ hwong hwak e Shunɛm de reza mɛ a Abishak, ba vey mɛ na yɛ na gbɔng gwɔ̀m o.

⁴Hwong o a sé zɛrɛ mo tyɔng wɛt. Ba tik ɛ na a sangal na gbɔng gwɔ̀m o, na a bɛrɛng hɛ, ko gbɔng gwɔ̀m o a wuna bek na yɛ wɛt.

⁵E bama de Absalɔm a kana ku, Adoniya de Hagit, hwâ Davit, a tɔ a yɛ, a sè kunat e ji nèy Davit. A sè zɛrɛ wen e za wɛt. Da mɛ a ga sang gyong ɛ, kɛ a ha na yɛ e ra pyɛ de e ra wɛt. A hwo tos rato mɛ wɔgɔ, yɛ a sé gbɔng gwɔ̀m. Yaga ano, a jut bekyɛkyɛ̂ bedwa na bedwa mo, a yong ɛ̀ na bemat kuru batungun (50) de be kyè e nuyel mɛ.

⁶

⁷A wuna hɛ na Yowap de neng mɛ a Zɛruya tanga Abiyatar, piris, yɛn a ye ey na be sɛlɛ hɛ.

⁸Ko Zadɔk, piris, na Bɛnaya Yɛhɔyada, na Natan, zarap, na Shimei, na Rey tanga bemât gyeng Davit bá sè tanga yɛ wɛt.

⁹Tuhak, Adoniya a yong nzem nɔrɔ̂ yas de be yɛt vɔk na Dagwi na tyīmit na berɔndɔng tanga bemus de ba mɔsɔ, a yong nzem o e Gbondong Gwɔ̄m bagat na lwêl Ɛn-Rɔgɛl. A rini nèy Davit mwa tanga mwa bemât badu gbɔng gwɔ̀m vê yerê Yuda.

¹⁰Ko a ka rini gwà mɛ Sɔlɔmɔn, na Natan, zarap, na Bɛnaya tanga bemât gyeng Davit wɛt.

¹¹Natan a hwo wɔ na Batsheba, neng Sɔlɔmɔn, a rangal hɛ a ye, “Hwà ga wok, Adoniya hwêy Hagit a ga tɛ̀ a tó mɛ negwɔm wɛt a? Ko Gbɔng Gwɔ̀m Davit a ka tɔk ɛ pyɛ cak wɛt.

¹²Ka sede hwó simo yin sè beken tanga hwey mō Sɔlɔmɔn, tik na me vo a hwo redu.

¹³Ci na gbɔng gwɔ̀m, na hwo yang ɛ, e yɛ de a kana sira a hwo wɔgɔ, Sɔlɔmɔn a rɔda re negwɔm na a sangal e ra gwofwa negwɔm o wɛt arɛt? Ko e rɛ̌ de Adoniya a de sé re negwɔm o kwong ɛ?

¹⁴Jeng de hwà rɔda se rɔngɔl ha na gbɔng gwɔ̀m o, ko mê vɛ me yel, na me dyɛng ɛ ma e ha mō.”

¹⁵Batsheba a hwo yel wɔ̀ na gbɔng gwɔ̀m e ji duk mɛ. A ga kwop kpushuk, Abishak, hwong yi e Shunɛm a sè sɛlɛ hɛ na a bɛrɛng hɛ.

¹⁶Batsheba a hwo ye guduruk, a kyul gbɔng gwɔ̀m. Gbɔng gwɔ̀m o a rangal hɛ, a ye, “Ala? E sɛ́ de hwó simo ɛ?”

¹⁷Hwā mo a yang ɛ, “À da, hwà ga sira a me na rezâ Dagwi Darwey, Dagwi mō wɔgɔ, sɔ hom Sɔlɔmɔn a rɔda ba re negwɔm e bama mō, e yɛ de a rɔda sangal e gwofwa negwɔm mō.

¹⁸Ko di a remo, Adoniya a ga tɛ́ ɛ gbɔng gwɔ̀m, ko hwà ka tɔk ɛ pyɛ cak wɛt.

¹⁹Di, a ga yong nzem nɔrɔ̂ yas de be yɛt vɔk na Dagwi na bemus pyak, na berɔndɔng de ba gyeng ba mɔsɔ tanga tyīmit. A rini nèy gbɔng gwɔ̀m mwa, a to rini Abiyatar, piris, tanga Yowap, mwât nuyêl bemât como. Ko a ka rini hwey mō Sɔlɔmɔn wɛt.

²⁰À da, bayîs BeIsrayɛl ba sé e ra hwo, na be di mwat de hwà rɔda nɔng ɛn na a re negwɔm o e bama mō.

²¹Ka sede hwà ha wɛt, ko di, e bamâ reku mō bemat ba rɔda tɛ̀ me tanga hwey hom Sɔlɔmɔn wot a sé bemât sogô nehywɛ.”

²²Jeng de Batsheba a sè rɔngɔl ha na gbɔng gwɔ̀m, ko Natan a vɛ̌ pom e lɔ gwɔ̀m.

²³Ba ha a gbɔng gwɔ̀m o, Natan, zarap a ga vey. Natan a hwo yel, a gaba e cat bol gbɔng gwɔ̀m.

²⁴A yang ɛ, “Neken mō ne ros! Ko sɛ̌ hwà kana ye, e Adoniya de a rɔda sangal e ra gwofwa negwɔm mō arɛt?

²⁵Di, e yunung womo a ga wɔ̀ yong nzem nɔrɔ̂ yas de be yɛt vɔk na Dagwi na bemus pyak, na berɔndɔng de ba gyeng ba mɔsɔ, tanga tyīmit. A rini mwa nèy mō na Yowap, mwât nuyêl bemât como, tanga Abiyatar, piris. A vane ba sé re ba sé sɔ tanga yɛ, ko ba sé tē, ‘Neken mō ne ros, à Gbɔng Gwɔ̀m Adoniya!’

²⁶Ko a ka rini me tanga Zadɔk, piris, na Bɛnaya Yɛhɔyada tanga hwey mō Sɔlɔmɔn wɛt.

²⁷À da, ko sɛ̌ e hwo de hwà ga yong ɛ mwat de a rɔda re negwɔm e to mō, ko hwà ka ha a wot besam mō wɛt a?”

²⁸Gbɔng gwɔ̀m a hwo tomo be to yila a yɛ Batsheba. Hwā mo a vey, a tumal e nuyel mɛ.

²⁹Gbɔng gwɔ̀m a yang ɛ, “Ma sira me na rezâ Dagwi Darwey, wo neken de a ga sey me yi e ji reyɔm hom mwa:

³⁰E yunung wɛ de ma rɔda sila nuha sira de ma kana sira a hwo na rezâ Dagwi Darwey, Dagwi wo BeIsrayɛl wɔgɔ, hwey mō Sɔlɔmɔn ha rɔda sangal e ra gwofwa negwɔm na a re negwɔm e to hom e bama hom.”

³¹Batsheba a hwo ye guduruk, a ye det a rato mɛ e vwel, a ye, “Neken mo ne ros gbak-gbak, à darwey hom!”

³²Gbɔng Gwɔ̀m Davit a tomo be yila a yɛ Zadɔk, piris, na Natan, zarap, tanga Bɛnaya Yɛhɔyada. Yɛn a vey e nuyel gbɔng gwɔ̀m o.

³³A yang ɛn, “Kyè in tanga bemât badu hom, ko tɛ̀ in hwey hom Sɔlɔmɔn a laga dwa-madung hom, na yin wɔ̀ kyɔk ɛ e lwêl Gihɔn.

³⁴E hwomo, Zadɔk tanga Natan ba rɔda shushu hɛ na něy, na a se gbɔng gwɔ̀m BeIsrayɛl. E bama mo, bē pɛl durum na be mok, ‘Nekên Gbɔng Gwɔ̀m Sɔlɔmɔn ne ros!’ ”

³⁵

³⁶Bɛnaya Yɛhɔyada a toyo a yɛ na ha a yang ɛ, “Ey, bê ra ano. Tik na Dagwi Darwey, Dagwi mō a tɛ̀ a sè ano.

³⁷À da, sede remo de Dagwi Darwey a kana sè tanga hwo, tik na a sè tanga Sɔlɔmɔn ano arɔng, na a to tɛ̀ nerey negwɔm mɛ ne gwɛsɛ hɛ ne dal nemó.”

³⁸Zadɔk, na Natan, na Bɛnaya Yɛhɔyada tanga bemât gyeng gbɔng gwɔ̀m, yɛn a kyè ba wɔ̀ tɛ̀ Sɔlɔmɔn a tut e ra dwa-madung Gbɔng Gwɔ̀m Davit, ba wɛrɛn na yɛ e lwêl Gihɔn.

³⁹E hwomo, Zadɔk, piris, a jut kûm něy de a vɔk yi e bûk rê fongol, a shushu e ra tô Sɔlɔmɔn. Ba hwo pɛsɛl durum, ko bemat mwa ba hwo gbɔ ba tē, “Nekên Gbɔng Gwɔ̀m Sɔlɔmɔn ne ros!”

⁴⁰Bemat mwa ba raa hɛ na pɛsɛ̂l behywɛ̄rɛ na jū detidetu, ba vɔk yey pyɛng sizɔng, sɛ̌ vwel ha lulum.

⁴¹Jeng de Adoniya na mwa bemat de ba sé tanga yɛ ba sé yɛnɛ nzem rê pyɛ́, ba hwo wok môk lwɛlɛ̂ yey pyɛng. Yowap a hwo wok fwɔ̂ durum de be pɛsɛl, ko a ye, “E sɛ́ de ya té e ji gbɔng repomo ano ɛ?”

⁴²Jeng de a sé rɔɔ ha, gobok Yɔnatan Abiyatar, piris, a pom. Adoniya a yang ɛ, “Yel, ma tɔk hwà sé mwat rwat, hwà vey a me na yɛgɛt yat gbak.”

⁴³Yɔnatan a yang ɛ, “Wey a sé ano wɛt”, yaga darwey mot gbɔng gwɔ̀m a ga tɛ̀ Sɔlɔmɔn a tɛ́ ɛ gbɔng gwɔ̀m e to mɛ.

⁴⁴Gbɔng gwɔ̀m a ga tomo Zadɔk, na Natan, na Bɛnaya Yɛhɔyada tanga bemât gyeng ɛ. Yɛn a ga tɛ̀ Sɔlɔmɔn a laga dwa-madûng gbɔng gwɔ̀m.

⁴⁵Ko Zadɔk tanga Natan ba ga shushu hɛ na něy e Gihɔn. Yi e hwomo ba kyě ra mɛ lwɛ́lɛ gwomo vɔk e ji gbɔng repomo. Lwɛ́lɛ ma gwane de yin e wokos.

⁴⁶Ko Sɔlɔmɔn a ga sangal e ra gwofwa negwɔm.

⁴⁷Sɛ́ kwong ɛ? Bemât badu ba vey tâng Gbɔng Gwɔ̀m Davit show na yey pyɛng yaga sɔ mɛ Sɔlɔmɔn. Ba yang ɛ, “Tik na Dagwi mō a tɛ̀ rezâ sɔ mō Sɔlɔmɔn re dal remo na nerey, negwɔm mɛ ne dal nemo na yele arɔng!” Gbɔng Gwɔ̀m Davit a ye det a to, a re fongol e ra gwat mɛ,

⁴⁸a ye, “Be somo Dagwi Darwey, Dagwi wo BeIsrayɛl! A ga tɛ̀ ma di mwat de a ga sangal e gwofwa negwɔm e to hom yunung!”

⁴⁹Mwa bemat de Adoniya a ga rini ba tɛ̀ bengyip, ba vɛ̌ tele, ko kawɛ a vo gwong o mwɛ.

⁵⁰Adoniya a tɛ̀ bengyip Sɔlɔmɔn, a tele a wɔ̀ yel e bûk rê fongol, a kaba pyɛ́ de ya sé sede badûk gàgbang rangâs yas.

⁵¹Ba wɔ̀ ha a Gbɔng Gwɔ̀m Sɔlɔmɔn wɔgɔ, Adoniya a tɛ̀ bengyip mɛ. Yaga ano, a wɔ̀ kaba badûk gàgbang rangâs yas, ko a ye, sɛ̌ gbɔng gwɔ̀m a ka sira a yɛ wɔgɔ, ê tɛ̀ be mɔrɔ hɛ wɛt e ngyen.

⁵²Sɔlɔmɔn a toyo na ha a ye, “Ka sede yɛ a gyeng badu, vit a pyɛ de ya rɔda té na yɛ ko tyɔng wɛt, ka sede ano wɛt, ko a rɔda ku.”

⁵³A hwo tomo be wɔ̀ jut Adoniya yi e gàgbang rangâs yas o. Adoniya a wɔ́ e nuyêl gbɔng gwɔ̀m o, a gaba e cat bol mɛ, ko gbɔng gwɔ̀m a yang ɛ, a kyè vɔk e lɔ mɛ.