Read berom 1 Begwɔ̀m 11 Bible Online

1 Begwɔ̀m 11 - berom bible

1 Begwɔ̀m 11

¹Sɔlɔmɔn a tɛ̀ yey na behâ yere dyuk pyak. E bama de a vo hwông gbɔng gwɔ̀m Misra, a to vo beha behak yi e BeHiti na BeMowap, na BeAmɔn, na BeƐdɔm tanga yi e Sidɔn.

²Ko Dagwi Darwey a kana nɔ̂ng BeIsrayɛl nu, yɛn a kwon ra weneng na yére yane wɛt, yaga na be kwon tɛ̀ ɛn, be nɔ̂ng pyɛ̂ sekwit mɛn nerey wɛt. Ko mwa ano, Sɔlɔmɔn a tɛ̀ yey na yɛn. A ra wenêng behwông begwɔ̀m naga betaama tanga bejɛn beha naga betat. Jeng de a ga hwo kwop, beha mo ba dɔnɔ hɛ, ko a hwo nɔ̂ng pyɛ̂ sekwit mɛn nerey, a to raa Dagwi Darwey, Dagwi mɛ, na yey rining wɛt, sede remo de da mɛ Davit a kana raa.

⁵A re a Ashtɔrɛt, pyɛ sekwît bemât Sidɔn, na Milkɔm, pyɛ sekwit vyes sizɔng ye BeAmɔn fongol.

⁶A ra a Dagwi Darwey banɛn, a ka raa Dagwi na yey rining, sede da mɛ Davit wɛt.

⁷E ra raku de wa sé e rwa rak wo Yɛrusalɛm, a lɔk kwɔ̂n sekwit yaga Kɛmɔsh, de ya sé pyɛ sekwit vyes sizɔng ye BeMowap, a to lɔk a Molek, pyɛ sekwit vyes sizɔng ye BeAmɔn kwɔn o mɛ arɔng.

⁸A to ra ano yaga mwa behâ yére dyuk mɛ, na be nása a pyɛ̂ sekwit mɛn o nenɔrɔ̂ yas de be yɛt tanga ne pyɛ̂ nesang hyɔɔlɔl arɔng.

⁹Dagwi Darwey, Dagwi wo Israyɛl, a kana dura a Sɔlɔmɔn tó mɛ zang ba, a nɔng ɛ nu, yɛ a raa pyɛ̂ sekwit wɛt. Ko Sɔlɔmɔn a ka gyeng redu mɛ mo wɛt. Yaga ano, Dagwi Darwey a tɛ̀ shom na yɛ.

¹¹A yang ɛ, “Sede remo de hwà ga kwɔrɔ wuna-na-sira hom na hwo; ko hwà kyɛ́ o nà gyeng badu hom, ma rɔda jut segwɔm mō yi na hwo, na me nɔ̂ng pwɛng mō hwak.

¹²Ko yaga da mō Davit ma rɔda ra ano e jeng de hwà rɔngɔl kwen wɛt, ko e jeng hwey mō zɔng.

¹³Ko yaga mwat hom Davit tanga yaga gbɔng repomô Yɛrusalɛm de ma ga kasa yaga to hom, ma rɔda to sey ɛ sɛ mwa wɛt, mê tik a yɛ yere jining.”

¹⁴Ano kwong, Dagwi Darwey a tɛ̀ Hadat yi e lɔ gwɔ̀m BeƐdɔm a tɛ́ ɛ mwât repugû Sɔlɔmɔn.

¹⁵Yimo gyam, jeng de Davit a kana re BeƐdɔm na como, Yowap mwât nuyêl bemât como mɛ, a kana wɔ̂ lɛrɛ̂ bavîn BeIsrayɛl. Yɛ tanga bemat mɛ bá tɛ̀ pɛl tyiimin e hwomo, ko ba mɔbɔs kawɛ rwâs BeƐdɔm.

¹⁷Ko Hadat a kana rɔngɔl hwey e ngyen, a vɛ̌ tele vɔk e Misra tanga BeƐdɔm behak vemo de ba kana ra a da mɛ fwom.

¹⁸Ba sogo yi e Midyan, ko ba wul e Paran, kwɔn de bemat behak ba wuna hɛn na yɛn, ko yɛn a re nuyel vɔk e Misra. Yɛn a kyè vɔk na Farawo, gbɔng gwɔ̀m Misra, de a nɔ̂ng Hadat lɔ na cap, ko a vɔk ɛ na pyɛ́.

¹⁹Farawo a vɔk yey pyɛng na Hadat sizɔng, ko a nɔng ɛ gwà hwā rwey mɛ Tapɛnɛs e weneng.

²⁰Hwā mo a tɔ a yɛ hwey wen, ko a vo a hɛ rezâ Genubat. Tapɛnɛs a tɛ̀, be ras ɛ e ji lɔ gwɔ̀m, ko Genubat a sangal tanga nèy bewen ne Farawo.

²¹Jeng de ba ha a Hadat e Misra wɔgɔ, Davit a ga ku, mwa na Yowap mwât nuyêl bemât como mɛ, ko a hwo yâng gbɔng gwɔ̀m, “Tik me, na me toyo vɔk e sevwel hom.”

²²Gbɔng gwɔ̀m a rangal hɛ a ye, “Hwà bidɛ sɛ́ na me ɛ? Yaga sɛ́ de hwó simo hwo toyo vɔk e sevwel mō ɛ?” Hadat a yang ɛ, “Tík me, na me kyè zɔng.” Ko a vɛ̌ toyo vɔk e sevwel mɛ.[9]

²³Dagwi a tɛ̀ Rɛzɔn Ɛliyada a vɔk repugu na Sɔlɔmɔn arɔng, Rɛzɔn o á kana tele yi na dalɔ mɛ gbɔng gwɔ̀m Zoba, Hadadɛzɛr,

²⁴e jeng de Davit a re Hadadɛzɛr na como. Rɛzɔn a wɔ̀ tula bewen vê gap, ko yɛ a tɛ́ ɛ mwât nuyêl bemât jugu. Yɛ tanga bemat mɛ ba wɔ̀ sangal e Damaskus, ko e hwomo ba tɛ̀ a yɛ negbɔng gwɔ̀m Surya. A tɛ́ ɛ mwât repugû BeIsrayɛl. Yɛ tanga Hadat ba se bemât repugû BeIsrayɛl mwa jeng de Sɔlɔmɔn a rɔngɔl kwen, ko yɛn a vɛsɛ a yɛ na reyɔm tyɔng wɛt.

²⁶Mwat o hwak de a sogo a Gbɔng Gwɔ̀m Sɔlɔmɔn na nehywɛ a sè Yɛrɔbɔwam Nebat yi e Zereda e bak vwêl Ɛfrayim, gwining e ji bemât fwom mɛ. Neng mɛ de reza mɛ à Zɛruwa á sè kuma.

²⁷Pyɛ de ya vey na sogô nehywɛ mo a yet ngan: Sɔlɔmɔn a sè lɔk tas de ba tang wɛ a Milo, ko a to man pyól e jwa-pomô Davit.

²⁸Yɛrɔbɔwam á sè mwât té ngyɛ́k. Jeng de Sɔlɔmɔn a di pyɛ de a ga ra, a vɛ̌ tɛ̀ ɛ a sè mwât nuyêl bemât fwôm retek vê yerê Manase na Ɛfrayim.

²⁹Tuhak, jeng de Yɛrɔbɔwam a sè nusu yi e Yɛrusalɛm, a man na Ahiya, zarap Dagwi yi e Shilo, e gwong. Yɛn a sè yɛn beba, ko ba man e tê-dyɛng zɔng. Ahiya a vɔk rugu pwas e rebek mɛ.

³⁰A hwo pat gwɛ, a hama gwɛ cɛ́k o kuru na yɛ bya.

³¹A yâng Yɛrɔbɔwam a pat ɛ cɛ́k o kuru yaga tó mɛ, yaga Dagwi Darwey wo Israyɛl a yang ɛ, jeng ya ga vey de a rɔda gas segwɔm Sɔlɔmɔn, ko a rɔda nɔ̂ng Yɛrɔbɔwam o yére kuru.

³²Ko yɛ Sɔlɔmɔn ê vɔk yere jining yaga Davit mwat mɛ tanga gbɔng repomô Yɛrusalɛm remo de a kana kasa yi e yére BeIsrayɛl.

³³Dagwi a ye, a rɔda ra ano, yaga Sɔlɔmɔn na BeIsrayɛl ba ga doyo a yɛ bama, ko ba ga sap pyɛ̂ sekwit; yɛ à Ashtɔrɛt ye BeSidɔn, Kɛmɔsh ye BeMowap, tanga Milkɔm ye BeAmɔn. Sɔlɔmɔn a kyè e begwong mɛ wɛt, a ra pyɛ́ de ya sé tyɛng e nuyel mɛ wɛt, a gyeng mwa badu mɛ, sede remo de da mɛ Davit a kana ra wɛt.

³⁴Dagwi a ye, mwa ano, a rɔda sey ɛ segwɔm mwa yi na yɛ wɛt, ko a rɔda tik ɛ a re negwɔm o vɔk e jeng reku me. A rɔda ra ano yaga mwat mɛ Davit de a kasa, womo de a to gyenges mwa badu mɛ arɔng.

³⁵A rɔda jut segwɔm yi e vwɔ̂ hwey mɛ, ko a nɔng o yére kuru.

³⁶Ko a rɔda tik hwêy Sɔlɔmɔn he vɔk yere jining, yaga e simo hwêy lɔ Davit hak he dopse re negwɔm e Yɛrusalɛm repomo de yɛ a ga kasa, na be re a yɛ ɛ fongol.

³⁷“A rɔda tɛ̀ o, hwo sè gbɔng gwɔ̀m BeIsrayɛl, a Yɛrɔbɔwam. Hwà rɔda kasa kwɔ̂n sangal de yey mō ye simo.

³⁸Ka sede hwô gyeng mwa pyɛ́ de ê nɔng o nu e ra yɛ, na hwo kyè e begwong mɛ, hwo ra pyɛ de ya sé tyɛng e nuyel mɛ, hwo gyeng mwa badu mɛ, sede remo de mwat mɛ Davit a kana ra, a rɔda sè tanga hwo. A rɔda tɛ̀ o, hwo sè gbɔng gwɔ̀m BeIsrayɛl; ê to di, nèy mō na rɔda re negwɔm e bama mō, sede remo de a kana ra na Davit.

³⁹Ê tabak yere Davit, ko ê ra ano gbak-gbak wɛt.”

⁴⁰Sɔlɔmɔn kwong a jama gwong de ê wey na Yɛrɔbɔwam, ko Yɛrɔbɔwam a hywit ɛ, a tele wɔ̀ e Misra na Shishak, gbɔng gwɔ̀m Misra, ko a sangal e hwomo vɔk e jeng de Sɔlɔmɔn a ku.

⁴¹Bwang tomong mwa de Sɔlɔmɔn a ra e jeng neken mɛ, na yerê fwom mɛ, tanga netsitsɛng mɛ, ba jɛk e Bwok-basa Neha Sɔlɔmɔn.

⁴²A sè gbɔng gwɔ̀m e Yɛrusalɛm e ra mwa BeIsrayɛl neshey kuru banaas.

⁴³A ku, ko ba lɛrɛ hɛ e ji Repomô Davit, ko hwey mɛ Rɛhɔbɔwam a tut e ra negwɔm o.