Read berom 1 Begwɔ̀m 12 Bible Online

1 Begwɔ̀m 12 - berom bible

1 Begwɔ̀m 12

¹Rɛhɔbɔwam a wɔ e Shɛkɛm, yaga mwa BeIsrayɛl ba ga tula hɛn, na be bin tɛ̀ ɛ gbɔng gwɔ̀m.

²Jeng de Yɛrɔbɔwam Nebat womo de a ga kana tele yi e nuyel Sɔlɔmɔn vɔk e Misra a wok ha hane, a nàra e hwomo.

³Ko bemât yére Israyɛl ye rwa bato ba tomo a yɛ, na a toyo. Jeng de a vey, mwa hɛn ba wɔ na Rɛhɔbɔwam, ba yang ɛ,

⁴“Di, da mō Sɔlɔmɔn a kana jut ot sede besam, a tɛ̀ a wot fwôm retek ding-ding. Ka sede hwô tɛt a wot nedirîk fwom o, ko wot a rɔda tɛ́ ot bemât fwom mō.”

⁵A yang ɛn, be to ba vey e tuk hê tat, na yɛ a ba toyo a yɛn na ha. Ko yɛn a kyè.

⁶Rɛhɔbɔwam a dura a bemakuk de ba kana vos a da mɛ Sɔlɔmɔn badu ha mo, ko a rangal hɛn, e rɛ̌ redu de yɛn ê vo a yɛ, de a rɔda wɔ̀ ha a bemat o e ra won mɛn arɛt?

⁷Yɛn a ha a yɛ, ka sede yɛ e simo, na yɛn a ra a yɛ fwom naka, tik na a toyo a yɛn na hanat rat, ko yɛn a rɔda tɛ́ ɛn bemât fwom mɛ kayɛ jeng.

⁸Ko Gbɔng Gwɔ̀m Rɛhɔbɔwam a kyɛ́ ɛ redu de bemakuk ba vo a yɛ, a kyè a wɔ̀ tɔrɔng na bemɛn bebot-bemat vemo de ba sé zamang mɛ, de ba to sé bemât vos a yɛ badu.

⁹A yang ɛn, be ha a yɛ pyɛ de yɛn a di, na pyɛ de a rɔda wɔ toyo a bemat vemo de ba ye, a tɛt a yɛn nedirîk fwom de ba kana ragas.

¹⁰Yɛn a toyo a yɛ, ba yang ɛ, a ha a yɛn, kekɛn vwɔ mɛ kesɛl o ka dal rawît da mɛ na neting.

¹¹Na a to ha a yɛn, da mɛ a kana tɛ̀sɛ a yɛn fwôm retek ding-ding, ko a remo a rɔda gwɛ̌ a yɛn nedirik o ne dal nane. Da mɛ a kana dak ɛn na zining, ko a remo yɛ a rɔda dak ɛn dak ves!

¹²Bamâ nepɔlɔ netat, Yɛrɔbɔwam tanga mwa bemat ba toyo na Gbɔng Gwɔ̀m Rɛhɔbɔwam, sede remo de a kana ha a yɛn.

¹³Ko Rɛhɔbɔwam a kyɛ́ ɛ redu bemakuk, ko a ha na bemat o na yol,

¹⁴sede remo de bebot-bemat ba ga kana vo a yɛ redu. A yang ɛn, “Da hom a kana tɛ̀sɛ a yin fwôm retek ding-ding, ko a remo ma rɔda gwɛ̌ a yin nedirik o ne dal nane. Da hom a kana dak in na zining, ko a remo ma rɔda dak in na zining de ba rɔgɔs ɛ babit dyam!”

¹⁵Ano de gbɔng gwɔ̀m a wet betong na hâ bemat o wɛt. Pyɛ́ yemo ya té ano, yaga na ha de Dagwi Darwey a kana ha a Yɛrɔbɔwam Nebat yi na Ahiya wo Shilo he sila.

¹⁶Jeng de bemat o ba wok ano, yɛn a hwo gbɔ, ba tē, “Sɛ́ mot ya sé na lɔ Davit ɛ? Yimo nayu de hwêy Yisai ha sé hining e ji mot ɛ? À yin BeIsrayɛl, vey in, wot kyè vɔk e lɔ! Tik na Rɛhɔbɔwam a di na belɔ mɛ.” Ko Rɛhɔbɔwam a hwo tomo Adoniram,[10] de a sé wo nuyêl fwôm retek, na a ha na yɛn, ko BeIsrayɛl ba vɛ̀ be basak hɛ na beta, ba pere mɔrɔ hɛ. Rɛhɔbɔwam a vɛ̌ tut e ra kyɛkyɛ̂ bedwa mɛ, a tele, a hywit ɛ vɔk e Yɛrusalɛm. Bemât yére Israyɛl yê rwa bato ba sogo, ba kyè wɛrɛn. Ba tik Rɛhɔbɔwam a re negwɔm e ra bemat de ba sé sangal e yɛnɛ̂ sevwêl Yuda zɔng.

¹⁹Ano de BeIsrayɛl ba sogo nehywɛ e ra lɔ Davit vey a remo.

²⁰Sede rehâ toyô Yɛrɔbɔwam yi e Misra ra shara hɛ e yɛnɛ̂ rwa batô Israyɛl, bemat o ba rini hɛ tula, ko ba tɛ̀ ɛ gbɔng gwɔ̀m mɛn. E bemât yerê Yuda nju vɛ zɔng de ba raa lɔ Davit.

²¹Jeng de Rɛhɔbɔwam a pom e Yɛrusalɛm, a hwo tula bekaan como yi e yére Yuda na Bɛnyamin, bemat gu naga na gu kuru rwit (180,000). A simo na a wɔ̀ to mɛ como, na a toyo na yére Israyɛl yê rwa bato e nɛn mɛ.

²²Ko Dagwi a ha na Shemaya, zarap mɛ.

²³A yang ɛ, a nɔ̂ng Rɛhɔbɔwam Sɔlɔmɔn na mwa yére Yuda tanga Bɛnyamin ha hemo ngan:

²⁴Yɛn a kwon wɔ̀ hwo e ra begwa mɛn BeIsrayɛl wɛt. Tik na mwa hɛn be toyo vɔk e lɔ. E yɛ Dagwi Darwey de a simo pyɛ́ ye té ano. Mwa hɛn ba vɛ̌ wok, ko ba toyo hɛn vɔk e lɔ.

²⁵Gbɔng gwɔ̀m Israyɛl, Yɛrɔbɔwam, a lɔk jwa, a gwɔrɔ mɛ repomô Shɛkɛm e vwêl berakû Ɛfrayim, ko a ka sangal ɛ. A to sek, a lɔk jwa, a gwɔrɔ mɛ repomô Pɛnuwɛl.

²⁶Tuhak, a hwo bare e yey mɛ, a ye, ka sede bemat mɛ ba re nuyel na kyese nása nenɔrɔ vɔk na Dagwi Darwey e Gbɔng Duk Re Fongol e Yɛrusalɛm, ba rɔda to hwo raa lɔ Davit, ba rɔda mɔrɔ hɛ, yɛ Yɛrɔbɔwam o ko ba rɔda ba hwo nɔngɔ̂s Rɛhɔbɔwam, gbɔng gwɔ̀m Yuda nerey.

²⁸A rangal vô redu, a hwo yong bemus beba na dyam shinang, a yâng bemat mɛ, “Yin a ga sǎ e de kyese rê fongol e Yɛrusalɛm, ko a to sé gbing-gbing, na yin a to wɔ wɛt. À BeIsrayɛl, di in bedagwi min a vemo de ba ga pat in yi e Misra!”

²⁹A tɛ̀ gwining à mus o e Bet-Ɛl ko gwining o e repomô Dan.

³⁰Bemat pyak ba wɔ kyɔk pyɛ sekwit ye neba mo vɔk e Dan. E gwong gwomo Yɛrɔbɔwam a tɛ̀ bemat be ra banɛn.

³¹A to lɔkɔs nekwɔn rê fongol e ra rak berahwol, ko a kasa bepiris de ba yi e yerê Levi wɛt.

³²A to tɛ̀ tuk nzem rê fongol tuk hê kuru na hɛ tungun e pwɛl gwô rwit, na a se tyɛng na Nzem Bǔk de ba ra e Yuda. Ko yɛ pyɛ mɛ a nára pyɛ̂ rangas vɔk na bemus dyam shinang o e ra gàgbang rangâs pyɛ́ e Bet-Ɛl. A to gas a bepiris vê nekwɔn rê fongol de a yong o tom.

³³Ano kwong, Yɛrɔbɔwam a ra nzem yaga BeIsrayɛl e Bet-Ɛl e tuk hê kuru na hɛ tungun e pwɛl gwô rwit, tuk de yɛ pyɛ mɛ a ga kana tik ɛ. Jeng de a sé yong ɛ na a nára pyɛ̂ rangas e ra gàgbang rangas o,