Read berom 1 Begwɔ̀m 13 Bible Online

1 Begwɔ̀m 13 - berom bible

1 Begwɔ̀m 13

¹Zarap Dagwi a sè Yɛrɔbɔwam e tumal e gàgbang rangâs pyɛ́, a sé yong ɛ, na a nára pyɛ̂ rangas vɔk na Dagwi.

²Ko, sede remo de Dagwi Darwey a nɔng ɛ nu, zarap o a hwo hanat na gbɔng fwɔ, a ye, “À hwo gàgbang rangâs pyɛ́! Há de Dagwi Darwey a ha a hemo: Ba rɔda tɔ hwey e lɔ Davit, bê vo a hɛ rezâ Yɔsiya. Ha rɔda yɛt, na he nára bemât sekwit e ra hwo, vemo de bà nása nenɔrɔ e ra hwo. Ko ba rɔda to rangas bekup bemasi e ra hwo.”

³A re nuyel, a ye, “Gàgbang rangâs pyɛ́ womo wa rɔda vugu hɛ, ko nefongôl kya ne shara hɛ. Yi ano, hwà rɔda tɔk, Dagwi Darwey a ha yi e nu hom.”

⁴Jeng de Yɛrɔbɔwam a wok ano, a nára vwɔ mɛ e ra yɛ, a ye, “Vo in mwat womo!” Ko remo-remo, vwɔ mɛ gwa pere nàra tsɔl, a tɔk to toyo na gwɛ wɛt.

⁵Gàgbang rangâs pyɛ́ wa pere vugu hɛ, ko nefongôl kya mo na shara hɛ e vwel, tyɛng na pyɛ de zarap o a ha yi na Dagwi Darwey.

⁶Yɛrɔbɔwam a yâng zarap o, a ra a yɛ won na Dagwi Darwey, Dagwi mɛ, na a bin tɛ̀ vwɔ mɛ tyang. Ko a ra a yɛ won, ko vwɔ mɛ mo gwa tɛ̀ tyang.

⁷Yɛrɔbɔwam kwong a rini hɛ e lɔ mɛ, na a wɔ̀ re pyɛ́, na a bin to tala hɛ sehwoyo mɛ e ra pyɛ de a ga ra.

⁸Ko zarap o a yang ɛ, “Ka hwà ka nɔng me rebit yas mō, ma rɔda wɔ e lɔ mō, na me re kɛ me sɔ pyɛ cak wɛt.

⁹Yaga Dagwi Darwey a nɔng me nu, me kwon re kɛ me sɔ pyɛ cak e hwomo wɛt, ma rɔda toyo me e gwong de ma vey ɛ wɛt.”

¹⁰Ko a toyo wɛrɛ e gwong de á gà kyè ɛ vey wɛt, ko a kwey e gwong o hwak detu.

¹¹E jeng yane zarap hwak roso mo a sè na sangal e Bet-Ɛl. Hwak e ji nèy mɛ ha wɔ̀ ha a yɛ mwa pyɛ de zarap yi e Yuda a ga ra tanga pyɛ de a ga ha a Yɛrɔbɔwam.

¹²Mwakuk o a rangâl nèy o gwong de zarap o a kwey ɛ. Ba ha a yɛ gwong o.

¹³Ko a yang ɛn, be tɛ̀ a madung mɛ wap. Ba ra ano, ko a vɛ̌ sogo,

¹⁴a dopɛ e zarap yi e Yuda, a wɔ sɛ̀ ɛ e gwong e tîn cɔgɔ̂t ouk e sangal e vwel. A rangal hɛ, a ye, “E hwo à zarap Dagwi yi e Yuda a?” A ye, “Ey, e me.”

¹⁵A yang ɛ, “Vey wɔ e lɔ hom, na wot wɔ̀ re pyɛ́.”

¹⁶Ko zarap o a toyo a yɛ, a ye, “Ma rɔda tɔk wɔ e lɔ mō, na me wɔ̀ re kɛ me sɔ pyɛ cak e kwɔn hemo wɛt.

¹⁷Yaga Dagwi Darwey a nɔng me nu, me kwon re pyɛ cak kɛ me sɔ pyɛ cak wɛt, me kwon toyo e gwong de má kwey ɛ vey arɔng wɛt.”

¹⁸Ko mwakuk o a yang ɛ, “Me arɔng ma sé zarap Dagwi tyɛng na hwo. Dagwi Darwey a ha a me yi e nû tom-lagwi, me vey toyo na hwo wɔ e lɔ hom, na wot wɔ̀ re pyɛ́.” Ko sɛ̌ mwakuk o a vɛ bɔs zɔng.

¹⁹Ano kwong, zarap yi e Yuda a dopɛ e yɛ vɔk e lɔ mɛ, ba wɔ̀ re pyɛ́ tanga yɛ.

²⁰Jeng de yɛn a sé sangal, ba sé re pyɛ́ mo, rehâ Dagwi ra yi na mwakûk zarap o,

²¹a moklo na fwɔ rwey, a yâng zarap yi e Yuda mo, “Dagwi Darwey a ye ngan: Hwà kyɛ́ o nà raa badu Dagwi Darwey, Dagwi mō, hwà kyɛ́ o nà gyeng redu de a nɔng o,

²²ko hwà vey re pyɛ́ e kwɔn de a yang o, hwo re kɛ hwo sɔ ɛ pyɛ cak wɛt. Yaga ano, ba rɔda mɔrɔ hwo, ko ba rɔda lɛrɛ revin mō e sak bedabeda mō wɛt.”

²³Bama de yɛn a ga tala rê pyɛ́ mo, mwakuk o a hwo tɛ̀ a madung mɛ wap.

²⁴Zarap yi e Yuda a laga wɛ, a kyè. Ko gukum wa man na yɛ e gwong, wa mɔrɔ hɛ. Revin mɛ ra dyɛng e vwarâ gwong, ko madung tanga gukum ba sè tumal e vwarâ revin o.

²⁵Bemat behak ba kwey e gwong gwane mo, ba di revin o e vwâ gwong, ko gukum e tumal e hwomo. Ba wɔ̀ ha mɛ e Bet-Ɛl.

²⁶Jeng de mwakuk o a wok ha mo, a ye, “A sé zarap wane de a kyɛ́ ɛ nà raa redu Dagwi Darwey. Yaga ano, Dagwi Darwey a ga tomo gukum wa wɔ̀ hwo e ra yɛ, wa mɔrɔ hɛ, tyɛng sede remo de a ha.”

²⁷Ko a yâng nèy mɛ, ne tɛ̀ a madung ɛ wap. Yɛn a ra ano,

²⁸ko a laga wɛ, a wɔ̀ sɛ̀ revin o e dyɛngɛ e vwâ gwong, na gukum tanga madung mɛ e tumal. Gukum o wa ka re revin o, kɛ wa ka hwo e ra madung o wɛt.

²⁹Mwakuk o a jut revin o, a gana rɛ e ra madung mɛ, a vey mɛ na rɛ e Bet-Ɛl, na a bin lɛrɛ rɛ, na a tosho sesin mɛ.

³⁰A lɛrɛ rɛ e sak lɔ mɛ, ko yɛ tanga nèy mɛ ba tosho, ba tē, “Áaa, à gwa hom, à gwa hom!”

³¹Bama de ba lɛrɛ rɛ, mwakuk o a yâng nèy mɛ, “Jeng de ma ba ku, ko yin ba lɛrɛ me e sak vane mo, be lasha revin hom bagat na re mɛ.

³²Ma tɔk, reha de a ha yi e nû Dagwi Darwey e ra gàgbang rangâs yas e Bet-Ɛl tanga e ra nekwɔn rê fongol e bapomô Samariya rê sila hɛ.”

³³Gbɔng Gwɔ̀m Yɛrɔbɔwam a doyo yi e begwong beves mɛ wɛt. A re nuyel, na a tɛ̀ kawɛ mwat de a simo fwôm piris zɔng, mwa ano de a sé e ji yerê Levi wɛt.

³⁴Banɛn vane ba vey na gabâ negwɔm lɔ mɛ, lɔ mɛ ha vɛ̌ wey hywiri.