Read berom 1 Begwɔ̀m 14 Bible Online

1 Begwɔ̀m 14 - berom bible

1 Begwɔ̀m 14

¹E jeng yane, Abiya, hwêy Gbɔng Gwɔ̀m Yɛrɔbɔwam, ha hwo serɔ.

²Yɛrɔbɔwam a yâng hwā mɛ, “Doyo hwo sede mwat hwak, be kwon tɔk o wɛt. Ci wɔ e Shilo, kwɔn de Ahiya, zarap Dagwi, a sé sangal ɛ. E yɛ de a kana ye, ma rɔda tɛ́ me gbɔng gwɔ̀m Israyɛl.

³Vɔk a yɛ bāgat kpam-tuk kuru, na kekpam-tûk rɔkrɔk tanga kûm shok. Wɔ̀ rangal hɛ pyɛ de yê té na hwey mot, ko a rɔda ha a hwo.”

⁴Ano, hwā mo a yong ɛ, a wɔ́ e Shilo e lɔ Ahiya. Ko di, Ahiya a ga kana kwop, a ga tɛ́ ɛ bwok, a to bɛrɛng wɛt.

⁵Ko Dagwi Darwey a ga kana yang ɛ, “Hwâ Yɛrɔbɔwam a rɔda vey rangal hwo rehâ serɔ̂ hwey mɛ de he ro ɛ. A ga kana doyo hɛ sede mwat hwak. Ha a yɛ pyɛ de mê ha a hwo.”

⁶Jeng de Ahiya a wok pôm hwā mo e rwi duk, a ye, “Yel, à hwâ Yɛrɔbɔwam. Yaga sɛ́ de hwà doyo hwo sede mwat hwak ɛ? Ba ye, me ha a hwo, ko ha mo ha sé ves.

⁷Kyè wɔ̀ ha a Yɛrɔbɔwam ha de Dagwi Darwey, Dagwî Israyɛl, a ha, a ye, ‘Ma kasa hwo yi e ji bemat, ma tɛ̀ o, hwo sè mwât nuyêl bemat hom BeIsrayɛl.

⁸Ma sey ɛ negwɔm yi e lɔ Davit, na me nɔng o. Ko hwà de sé sede mwât fwom hom Davit kwong wɛt, womo de a gyɛng badu hom, a raa me na yey mɛ mwa, ko a ra pyɛ́ de ma simo zɔng.

⁹Ko hwo, hwà ga ra banɛn baves de ba dal vê mwa bemat de ba tānga re negwɔm e ra hwo. Hwà ga doyo a me bama, ko hwà ga tɛ̀, shom hom ye sogo, yaga hwà ga yong pyɛ̂ sekwit, hwà ga turu pyɛ̂ dyam shinang, na hwo re a yɛ fongol.

¹⁰Yaga ano, ma rɔda tɛ̀ gawey e ra negwɔm mō, ma rɔda mɔbɔs mwa beras na nèy mō bewen e cang mō, besam tanga nèy lɔ, ma rɔda wey na lɔ mō, ma rɔda tala hɛn hywiri sede kya he re bagwɔt.

¹¹Kawɛ mwât lɔ mō de a ku e ji repomo, bevu ba rɔda re, ko vemo de ba kushu e hey, bejagawey ba rɔda re. E me, Dagwi Darwey de ma ha!’ ”

¹²Ko Ahiya a re nuyel na ha a hwâ Yɛrɔbɔwam o, a ye, “Toyo hwo wɔ e lɔ. Ko jeng de hwà sé tɛ̀ bwol e repomo mō, hwey o ha rɔda ku.

¹³Mwa BeIsrayɛl ba rɔda tosho hwey o, bê lɛrɛ hɛ. Mwin hwey a hane nju hɛ zɔng e ji lɔ Yɛrɔbɔwam de bê lɛrɛ hɛ, yaga e hɛ nju hɛ zɔng de Dagwi Darwey, Dagwî Israyɛl, a sɛ̀ pyɛ cak ryat e ji hɛ.

¹⁴Ko a rɔda tɛ̀ gbɔng gwɔ̀m hwak e ra BeIsrayɛl womo de ê gang nèy na lɔ Yɛrɔbɔwam. Ê té yunung, a remo mwas!

¹⁵BeIsrayɛl ba tɛ̀ shôm Dagwi Darwey ya sogo, yaga yɛn a yong sesêk Ashera, ci hwā mo, na be re a yɛ fongol. Yaga ano, Dagwi Darwey a rɔda tabak hɛn, ko ba rɔda digis sede serê nû rɔt de gul gwo pɛsɛl sɛ. A rɔda lut ɛn yi e vwel rat hemo de a kana nɔ̂ng bedabeda mɛn, ko a rɔda shara hɛn e gurâ Gwɔrɔ̂t Ɛifaratɛs.

¹⁶A rɔda gas ɛ na Israyɛl, yaga Yɛrɔbɔwam a ga ra banɛn, ko a tɛ̀ BeIsrayɛl ba ra banɛn arɔng.”

¹⁷Hwâ Yɛrɔbɔwam a toyo vɔk e lɔ e repomô Tirza. Ko gobok de a sé pom e lɔ zɔng, hwey o he sè ku.

¹⁸BeIsrayɛl mwa ba tosho sesîn hɛ, ko ba vɛ̌ lɛrɛ hɛ, sede remo de Dagwi Darwey a ga ha yi e nû Ahiya, mwât fwom mɛ.

¹⁹Bwâng pyɛ́ de Yɛrɔbɔwam a ra, na rehâ cōmo de a tó, na yerê negwɔm de a re, ba jɛk yɛ̄ mwa e Bwok-basa Pyɛ̂ Bare yê Begwɔ̀m Israyɛl.

²⁰A re negwɔm Israyɛl neshey kuru baba na nɛ neba (22). Jeng de a ku, ba lɛrɛ hɛ, ko hwey mɛ Nadap a re negwɔm e to mɛ.

²¹Gbɔng Gwɔ̀m Rɛhɔbɔwam Sɔlɔmɔn a vɔk neshey kuru banaas na hɛ hining (41) jeng de a hwo re negwɔm Yuda. A re negwɔm o neshey kuru na nɛ netaama yi e Yɛrusalɛm, gbɔng repomo de Dagwi Darwey a kasa e sevwêl Israyɛl, na re tɛ́ ɛ kwɔn de be re a yɛ ɛ fongol. Rezâ dē mɛ à Naama yi e sevwêl Amɔn.

²²BeYuda ba ragas banɛn de ba tɛ̀, shom Dagwi Darwey ya sogo e ra yɛn, a dal mɛ jeng bedabeda mɛn.

²³Yɛn a lɔkɔs nekwɔn pyɛ̂ sekwit, yɛn a to tɛ̀ a yɛ ɛ beta gacik, ko yɛn a yong sesêk Ashera, ci hwā mo, na be re a yɛ̄ fongol e berahwol tanga e necam batîn cɔ́gɔt ryey.

²⁴Pyɛ de ya dal mwa na neves, yɛ à beras na beha de ba tɛ́ ɛn bejwang e nekwɔn re a pyɛ̂ sekwit yane fongol. BeYuda ba masa pyɛ̂ byɛm-byɛm yê yére bemât jey de Dagwi Darwey a ró ɛn yi e sevwêl Kanaan e nuyêl BeIsrayɛl.

²⁵E shey hê tungun hê negwɔm Rɛhɔbɔwam, gbɔng gwɔ̀m Misra, Shishak, a vey hwo e ra Yɛrusalɛm na como.

²⁶A hashe mwa pyɛ́ ryat de ya sé e ji Gbɔng Duk Re Fongol na e lɔ gwɔ̀m, a wuna mwa na beruga como vê dyam shinang de Sɔlɔmɔn a kana tɛ̀ be yong.

²⁷Rɛhɔbɔwam a to tɛ̀ be yong beruga dyam pama, a tik e to mo, a tɛ̀ vɛ e vwɔ̂ bemât nuyel de ba gyeng ri lɔ gwɔ̀m.

²⁸Kayɛ jeng de gbɔng gwɔ̀m a sé kyè wɔ e duk rê fongol, bemât gyeng ri mo ba jut beruga mo, bama mo ba toyo mɛ wɔ tik vɛ e duk gyenges o.

²⁹Bwâng pyɛ́ de Rɛhɔbɔwam a ra, ba jɛk yɛ e Bwok-basa Pyɛ̂ Bare yê Begwɔ̀m Yuda.

³⁰Mwa e ji jeng yane, yɛ tanga Yɛrɔbɔwam ba sǎ tô como na bemɛn.

³¹Rɛhɔbɔwam a ku, ko ba lɛrɛ hɛ e sak begwɔ̀m e Repomô Davit. Dē mɛ à neng-gwɔ Naama yi e sevwêl Amɔn. Ko hwey mɛ Abiyam a re negwɔm e to mɛ.