Read berom 1 Begwɔ̀m 15 Bible Online

1 Begwɔ̀m 15 - berom bible

1 Begwɔ̀m 15

¹Abiyam a hwo re negwɔm Yuda e shey hê kuru na hɛ rwit de Yɛrɔbɔwam a sè re negwɔm Israyɛl.

²A re negwɔm o yi e Yɛrusalɛm neshey netat. Dē mɛ Maaka a sè hwông Absalɔm.

³A raa Dagwi Darwey, Dagwi mɛ, na yey mɛ mwa sede dâ da mɛ Davit wɛt. Ko a raa begwong beves vê da mɛ Rɛhɔbɔwam e negya.

⁴Ko mwa ano, Dagwi Darwey, Dagwi mɛ, a nɔng ɛ hwey, na a re negwɔm e bama mɛ e Yɛrusalɛm, yaga na a gyeng mɛ netyâng Yɛrusalɛm o. A ra ano yaga Davit, de a ra pyɛ́ de ya jam a yɛ mwa neken mɛ, ko a ga sang kyɛ́ ɛ nà raa redu mɛ rehak wɛt, sɛ̌ rehâ Uriya WoHiti zɔng.

⁶Como de ya kana se e tê Yɛrɔbɔwam tanga Rɛhɔbɔwam ya re nuyel e tê Yɛrɔbɔwam na Abiyam pere wɔ wul mɛ yɛnɛ̂ negwɔm Abiyam o. Bwâng pyɛ́ de Abiyam a ra, ba jɛk yɛ e Bwok-basa Pyɛ̂ Bare yê Begwɔ̀m Yuda.

⁸Abiyam a ku, ba lɛrɛ hɛ e Repomô Davit, ko hwey mɛ Asa a re negwɔm e to mɛ.

⁹Asa a hwo re negwɔm Yuda e shey hê kuru baba de Yɛrɔbɔwam a sè re negwɔm Israyɛl.

¹⁰A re negwɔm o neshey kuru banaas na hɛ hining (41) yi e Yɛrusalɛm. Gwēy mɛ Maaka a sè hwông Absalɔm.

¹¹Asa mo a ra pyɛ́ de ya jam a Dagwi Darwey, tyɛng na pyɛ de da mɛ kunat Davit a kana ra.

¹²A ro bejwâng bemat, beha na beras de bà ragas tomong ves e nekwɔn sekwit yi e vwel o mwa, ko a to paa pyɛ̂ sekwit de beda mɛ ba kana lɔk.

¹³A pat gwey mɛ Maaka yi e negwɔm dê Gwɔ̀m, yaga a kana yong pyɛ sekwit byɛm-byɛm yaga Ashera, ci hwā mo. Asa a tow pyɛ mo, ko a rangas yɛ e vwâk Kidrɔn.

¹⁴Mwa ano ba ka gangas nekwɔn de ba re a pyɛ̂ sekwit fongol wɛt, ko Asa pyɛ mɛ a raa Dagwi Darwey na yey mɛ mwa vɔk e jeng reku mɛ.

¹⁵A tɛ̀sɛ mwa pyɛ́ de da mɛ tanga yɛ ba kana tik jaram yaga Dagwi e ji Gbɔng Duk Re Fongol, yɛ̄ a pyɛ́ de ba yong na dyam shinang na dyam pyɛng.

¹⁶Asa, gbɔng gwɔ̀m Yuda, tanga Baasha gbɔng gwɔ̀m Israyɛl, ba sǎ tô como na bemɛn mwa jeng de yɛn a sè re negwɔm.

¹⁷Baasha a wɔ̀ hwo e ra Yuda, a re repomô Rama, a yong jwâ-pomo mo, a gwɛ a wɛ gap. A tik ɛ bemât como, na be dul mɛ bemat nà yel kɛ nusu yi e vwêl Yuda.

¹⁸Yaga ano, Asa, gbɔng gwɔ̀m Yuda, Asa a hashe mwa dyam shinang tanga dyam pyɛng yi e negban Gbɔng Duk Re Fongol tanga ne lɔ gwɔ̀m. A tomo mɛ begbɔng bemât fwom vɔk e Damaskus, na be wɔ̀ nɔ̂ng Bɛn-Hadat gbɔng gwɔ̀m Sirya, de a sé hwêy Tabrimɔn Hɛziyɔn na ha hemo ngan:

¹⁹“Tik na wot a wuna hot na sira, sede remo de bedabeda mot bá kana ra. Dyam shinang na dyam pyɛng yemo ya sé nɔrɔ mō. Tik na hwo kwɔrɔ wuna-na-sira min na Baasha, gbɔng gwɔ̀m Israyɛl. Wɔ̀ hwo ɛ na como, yaga na yɛ a bin nu na bemât como mɛ yi e vwel hom.”

²⁰Bɛn-Hadat a simo pyɛ de Asa a yong o, a tomo bemât como mɛ, na be wɔ̀ hwo e ra bapomô Israyɛl. Ba re bapomô Iyɔn, na Dan, na Abel-Bet-Maaka na bak Gworep Galili, tanga neyɛnɛ̂ sevwêl Naftali.

²¹Baasha a wok pyɛ de ba ga ra, a tik yông Rama mo, a toyo hɛ vɔk e Tirza.

²²Ano kwong, Asa a hwo tomo, be rini BeYuda mwa, kawɛ mo, na be wɔ̀ hashe beta tanga babirik cɔ́gɔt de Baasha a kana tula, na a yong mɛ Rama. Ko Asa a yong bapomô Geba e sevwêl Bɛnyamin tanga Mizpa na pyɛ́ yane mo.

²³Bwang pyɛ́ de Asa a ra, mwa na bapomo de a yong tanga wɛng de a bɛrɛng ba jɛk yɛ e Bwok-basâ Pyɛ̂ Bare yê Begwɔ̀m Yuda. E kwopa mɛ, a re reyɔm na serɔ̂ bol.

²⁴Asa a ku, ba lɛrɛ hɛ e sak begwɔ̀m e Repomô Davit, ko hwey mɛ Yɛhɔshafat a re negwɔm e to mɛ.

²⁵Nadap Yɛrɔbɔwam a hwo re negwɔm Israyɛl e shey hê neba de Asa a sè re negwɔm Yuda. A re negwɔm o neshey neba.

²⁶A ra a Dagwi Darwey banɛn tyɛng sede da mɛ de a tɛ̀ BeIsrayɛl be ra banɛn.

²⁷Baasha Ahiya wo yerê Isakar a yong gwông nengyas, a mɔrɔ Nadap, jeng de Nadap o tanga bemât como mɛ ba rɔnɔ repomô Gibɛtɔn rê BeFilisti.

²⁸Pyɛ yemo ya té e shey hê netat hê negwɔm Asa wo Yuda. Baasha a hwo re negwɔm Israyɛl e tô Nadap.

²⁹Remo-remo, a hwo mɔbɔs mwa yére Yɛrɔbɔwam, tyɛng na pyɛ de Dagwi Darwey a kana ha yi na Ahiya zarap mɛ e Shilo, A wey na yɛn mwa, a ka tɛt ɛ mwat gwining wɛt.

³⁰Pyɛ yemo ya té, yaga Yɛrɔbɔwam a kana tɛ̀ Dagwi Darwey, a tɛ̀ shom sizɔng yaga banɛn de a ra, na a to tɛ̀ BeIsrayɛl be ra banɛn.

³¹Bwâng pyɛ́ de Nadap a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

³²Asa, gbɔng gwɔ̀m Yuda, tanga Baasha, gbɔng gwɔ̀m Israyɛl, ba sǎ tô como na bemɛn mwa jeng de yɛn a sè re negwɔm.

³³Baasha Ahiya a hwo re negwɔm Israyɛl e shey hê netat de Asa a re negwɔm Yuda. A re negwɔm o yi e Tirza neshey kuru baba na nɛ nenaas (24).

³⁴A ra banɛn e nuyel Dagwi Darwey tyɛng sede Yɛrɔbɔwam, de a tɛ̀ BeIsrayɛl, be ra banɛn.