Read berom 1 Begwɔ̀m 16 Bible Online

1 Begwɔ̀m 16 - berom bible

1 Begwɔ̀m 16

¹Dagwi Darwey a ha na Yehu Hanani, zarap mɛ, a tomo hɛ na ha hemo ngan vɔk na Baasha:

²“Hwà kana sè pwɛng, ko me ma tɛ̀, hwo sè mwât nuyêl bemat hom BeIsrayɛl. Ko di, a remo, hwà ga ra banɛn tyɛng sede Yɛrɔbɔwam. Hwà ga to tɛ̀ bemat hom, be ra banɛn arɔng. Pyɛ de hwà ga ra, ya tɛ̀ shom hom ya sogo.

³Yaga ano, ma rɔda wey na hwo tanga belɔ mō, tyɛng sede remo de ma wey na Yɛrɔbɔwam.

⁴Kawɛ mwât lɔ mō de a ku e ji repomo, bevu ba rɔda re, ko vemo de ba kushu e hey, bejagawey bê re.”

⁵Bwâng pyɛ́ de Baasha a ra, na wɛng de a bɛrɛng, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

⁶Baasha a ku, ba lɛrɛ hɛ e Tirza, ko hwey mɛ Ela a re negwɔm e to mɛ.

⁷Yehu, zarap Dagwi, a kana ha ha hane e ra Baasha na belɔ mɛ, yaga banɛn de a ga ra a Dagwi Darwey tyɛng sede Yɛrɔbɔwam a ra. A tɛ̀ shôm Dagwi Darwey ya sogo yaga banɛn o de a ra zɔng wɛt, ko yaga a mɔbɔs belɔ Yɛrɔbɔwam mwa arɔng.

⁸Ela Baasha a hwo re negwɔm Israyɛl e shey hê kuru baba na hɛ tyiimin (26) de Asa a sè re negwɔm Yuda. A re negwɔm o neshey neba yi e Tirza.

⁹Zimri, mwât nuyêl rebît bekyɛkyɛ̂ bedwa gbɔng gwɔ̀m, a yong begwong, na a mɔrɔ hɛ. Tuhak, Ela a ga sɔ siring e lɔ Arza, gbɔng mwât bɛrɛng lɔ gwɔ̀m, a sé feng.

¹⁰Zimri a vɛ̌ yel e lɔ mo, a mɔrɔ Ela, ko a tut e ra negwɔm o. Pyɛ yemo ya té e shêy hê kuru baba na hɛ taama (27) de Asa a sè re negwɔm Yuda.

¹¹Zimri a pere tɛ́ ɛ gbɔng gwɔ̀m, ko a vɛ̌ mɔbɔs mwa belɔ Baasha, a mɔrɔ kawɛ rwas e ji belɔ mo tanga besa mɛ arɔng.

¹²Ano de Zimri a wey na lɔ Baasha tyɛng na ha de Dagwi Darwey á kana ha yi e nû Yehu, zarap mɛ.

¹³Pyɛ mo ya té, yaga Baasha tanga sɔ mɛ Ela ba ra banɛn, ko ba tɛ̀ BeIsrayɛl be ra banɛn arɔng. Ba tɛ̀ shôm Dagwi Darwey, Dagwî Israyɛl, ye sogo yi na re a pyɛ̂ sekwit fongol.

¹⁴Bwâng pyɛ́ de Ela a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

¹⁵Zimri a hwo re negwɔm Israyɛl e shêy hê kuru baba na hɛ taama (27) de Asa a sè re negwɔm Yuda. A re negwɔm o pɔlɔ taama zɔng yi e Tirza. E jeng o, bemât comô Israyɛl ba rɔnɔ repomô Gibɛtɔn re BeFilisti, na be hwo rɛ na como.

¹⁶Ko jeng de yɛn a wok, Zimri a ga wey na gbɔng gwɔ̀m o, ko remo-remo, yɛn a vɛ̌ tɛ̀ mwât nuyel mɛn Ɔmri, a tɛ́ ɛ gbɔng gwɔ̀m Israyɛl.

¹⁷Ko Ɔmri tanga bemât como mɛ ba tik Gibɛtɔn, ba toyo hɛn, ko ba wɔ̀ hwo e ra Tirza.

¹⁸Jeng de Zimri a di, ba ga re gbɔng repomo mo, a vɛ̌ wɔ yel e ji gwotyɔ̌n lɔ gwɔ̀m, a tɛ̀ kya, ko kya mo ha vɔk ha re ɛ e hwomo, a pere wey ɛ.

¹⁹Pyɛ yemo ya té ano, yaga Zimri a ra a Dagwi Darwey banɛn, tyɛng sede Yɛrɔbɔwam à ra, ko a to tɛ̀ BeIsrayɛl, be ra banɛn arɔng.

²⁰Bwâng pyɛ́ de Zimri a ra, mwa na gwong de a yong, na a mɔrɔ gbɔng gwɔ̀m, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

²¹E bamâ rekû Zimri, BeIsrayɛl ba gas ɛn zang ba, behak ba simo, be tɛ̀ a Tibni Ginat negwɔm o, ko behak ba simo Ɔmri.

²²Vemo de ba raa Ɔmri ba dal vê Tibni na nepyak, ko ba re ɛn na como. Ano kwong, Tibni a ku, ko Ɔmri a de re negwɔm o.

²³Ɔmri a hwo re negwɔm Israyɛl e shey hê kuru batat na hɛ hining (31) de Asa a sè re negwɔm Yuda. A re negwɔm o neshey kuru na ne neba (12). A tanga re negwɔm o neshey netyiimin yi e Tirza.

²⁴Ko a sey rahwôl Samariya e nû dyām pyɛng de nedirîk yɛ na wul sede kilo kuru bataama (70). A gwɔrɔ rahwol o, a lɔk ɛ repomo e hwomo, ko a vo a rɛ rezâ Samariya yaga rezâ Shɛmɛr dâ rahwol o wo raane.

²⁵Ɔmri a ra a Dagwi Darwey banɛn a dal mɛ vemo de ba tānga re negwɔm e ra yɛ.

²⁶Tyɛng sede Yɛrɔbɔwam a tɛ̀ shôm Dagwi Darwey, Dagwî Israyɛl ye to sogo. A to tɛ̀ BeIsrayɛl, be ra banɛn tanga sekwit arɔng.

²⁷Bwâng pyɛ́ de Ɔmri a ra, tanga wɛng de a bɛrɛng, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

²⁸Ɔmri a ku, ba lɛrɛ hɛ e Samariya, ko sɔ mɛ Ahap a re negwɔm e to mɛ.

²⁹Ahap Ɔmri a hwo re negwɔm Israyɛl e shey hê kuru batat na hɛ rwit (38) de Asa a sè re negwɔm Yuda. A re negwɔm o yi e Samariya neshey kuru baba na nɛ neba (22).

³⁰Ahap a ra a Dagwi Darwey banɛn de ba dal mwa vemo de ba tānga re negwɔm e ra yɛ.

³¹A ra banɛn de ba dal vinde Yɛrɔbɔwam á kana ra. A pere wɔ̀ ra wenêng Yɛzɛbɛl, hwông Etbaal, gbɔng gwɔ̀m Sidɔn. A lɔk duk re a Baal fongol e ji repomô Samariya, ko a yong gàgbang rangâs nenɔrɔ vɔk na Baal e ji duk o, ko a hwo re a Baal fongol arɔng.

³³A to yong swesêk Ashera, ci hwā mo. Ahap a ra pyɛ́ de ya tɛ̀ shôm Dagwi Darwey, Dagwî Israyɛl, ya sogo ya dal yê vemo de ba tānga re negwɔm e ra yɛ.

³⁴A sé e jeng negwɔm mɛ de Hiyɛl, mwât Bet-Ɛl, a to lɔk repomô Yeriko. Jeng de a bomo retis o, hwey mɛ hê mɛsɛng, Abiram ha ku, ko jeng de a tala, a hwo tɛsɛ ri repomo mo, hwey mɛ Sɛgup, tashal mɛ, ha ku. Hemo ha té tyɛng na há de Dagwi Darwey á kana ha yi e nû Yɔshuwa Nun.