Read berom 1 Begwɔ̀m 17 Bible Online

1 Begwɔ̀m 17 - berom bible

1 Begwɔ̀m 17

¹Eliya a sè zarap Dagwi yi e Tishbe e Gileyat. Tuhak, a wɔ̀ ha a Gbɔng Gwɔ̀m Ahap, a yang ɛ, “Ma sé mwât fwôm Dagwi wo Neken, Dagwi wo BeIsrayɛl. Me ha a hwo e ji reza mɛ wɔgɔ, rwak wô rop kɛ mwɛngɛ gwô sè e neshey de ne kyè vey wɛt, sɛ̌ yɛ a to ha ano.”

²E bama mo, Dagwi Darwey a ha a Eliya,

³a tik kwɔn hane, na a kyè vɔk e rwa rak e gurâ Rɔt Yɔrdan, na a wɔ̀ lɛrɛ hɛ e hwomo bagat na Kerɔt Kerit.

⁴A rɔda sɛ̀ nshî sɔ e kerɔt o, ko yɛ Dagwi a ga kana nɔ̂ng behwǎk nu, na be wɔ nɔngɔs hɛ pyɛ́ e hwomo.

⁵Eliya a raa badu de Dagwi Darwey a nɔng ɛ, a kyè wɔ̀ sangal e hwomo e kerɔt o.

⁶A sɔ nshi e kerɔt o, ko behwǎk kwong ba vɛ̀sɛ nɔngɔs hɛ kpam-tuk na banama nagasi na nahywegelek.

⁷Ko e bamâ jeng cak, kerɔt o ka hworok yaga vit a rwak.

⁸Dagwi Darwey a to yâng Eliya,

⁹a sogo vɔk e repomô Zarɛfat, bagat na Sidɔn, na a wɔ̀ sangal e hwomo. A ga kana nɔ̂ng kuma hwak e hwomo nu, na a nɔngɔs hɛ pyɛ́.

¹⁰Ano kwong, Eliya a kyè vɔk e Zarɛfat. Jeng de a wɔ̀ wul e rwi repomo, ko a hwo di kuma hwak a sè tula necɔgɔ̂t kya. A yang ɛ, “Gabɔk, nɔt me nshi tyɔng, na me sɔ.”

¹¹Jeng de a sé kyè wɔ̀ vey a yɛ mɛ, ko a to yila hɛ, a yang ɛ, “Gabɔk, vɔk a me ɛ kekpam-tuk arɔng.”

¹²Hwā mo a toyo a yɛ na ha, “Ma sira me na Dagwi Darwey, Dagwi mō, ma ka vɔk kekpam-tuk wɛt. Ma vɔk kemùk e vwɔ tyɔng tanga kegbɛ̂p něy tyɔng zɔng. Di, ma sé jama necɔgɔt, na me wɔ̀ kyé mɛ kepyɛ yaga me tanga hwey hom, na wot re, na wot de wey.”

¹³Eliya a hwo yang ɛ, “Hwo kwon sap wɛt! Ci, na hwo yong pyɛ́ mo sede remo de hwà ha. Ko pyɛ de hwô ra a yet: Tānga yong a me kɛ tyɔng, na hwo tānga nɔng me e ngyen, e bama mo, hwo de kyé myin na hwey mō.

¹⁴Yaga pyɛ de Dagwi Darwey, Dagwî Israyɛl, a ha a yane: Nemuk nê ka tala hɛn yi e kwɛt o wɛt, ko něy o nê ka tala hɛn yi e kefus o arɔng wɛt, sɛ̌ jeng de rwak wa to ba hwo rop.”

¹⁵Kuma mo a wɔ̀ ra tyɛng na ha de Eliya a ha a yɛ, ko yɛn mwa ba re pyɛ́ mo nepɔlɔ pyak.

¹⁶Sede remo de Dagwi Darwey à ha yi e nû Eliya, nemuk nane na ka tala hɛn yi e kwɛt o wɛt, ko něy nane na ka tala hɛn yi e kefus o wɛt arɔng.

¹⁷E bamâ jeng cak, hwêy kuma mo ha hwo rɔ, rɔ mo ha kat ɛ, ko e yɛnɛ mo, hwey o ha ku.

¹⁸Kuma mo a hwo yâng Eliya, “À mwât Dagwi, yaga sɛ́ de hwà ra na me ano ɛ? Hwà vey e ngamo, na hwo vey kulu a Dagwi banɛn hom, na hwo tɛ̀, hwey hom he ku a?”

¹⁹Eliya a hwo yang ɛ, “Neme hwey o.” A sey hɛ yi na yɛ, a tut mɛ vɔk e rak o e duk de e pɔlɔs ɛ, ko a lasha hɛ e ra gwat mɛ.

²⁰A ra won siitit, a ye, “À Dagwi Darwey, Dagwi hom! Yaga sɛ́ de hwà vey na gbɔng gwazɛrɛk gwomo e ra kuma womo ɛ? Yɛ de a ga sey me e ji lɔ mɛ, ko di a remo, hwà ga vo hwey mɛ, ha ku kwong.”

²¹Eliya a naata hɛ, a dyɛng e ra hwey o zang tat, ko a ra won na Dagwi Darwey, a ye, “À Dagwi Darwey, Dagwi hom! Toyo na nekên hwey o!”

²²Dagwi Darwey a sey won Eliya, hwey o ha hwo pɔng, ko ha sene.

²³A jut hɛ, a gyirik mɛ wɔ̀ nɔ̂ng neng hɛ, a yang ɛ, “Di, hwey mō a hemo, ha sé ken!”

²⁴Hwā mo a hwo ye, “Ey, a remo ma tɔk, hwà sé mwât Dagwi. Ey mwin, Dagwi Darwey a sé ha yi na hwo.”