Read berom 1 Begwɔ̀m 18 Bible Online

1 Begwɔ̀m 18 - berom bible

1 Begwɔ̀m 18

¹E shey hê tat hê jey cogot, Dagwi Darwey a ha a Eliya, a wɔ̀ dura tó mɛ na Gbɔng Gwɔ̀m Ahap, a yang ɛ, a rɔda tomo na rwak.

²Ano kwong, Eliya a kyè wɔ na Ahap.

³E jeng o, Obadya a sè gbɔng mwât bɛrɛng lɔ gwɔ̀m. A sé mwat de a raa Dagwi Darwey na yey mɛ mwa. Mwin, jeng de Yɛzɛbɛl a kana sè mɔbɔs bezarap Dagwi, ko Obadya a jut bemat o naga, a gas ɛn bagyɛng o baba, kuru batungun batungun, a wɔ̀ lɛrɛ hɛn e fwara, ko a vɔk ɛn na pyɛ́ tanga nshi. Ahap a yila Obadya

⁵a hwo yâng ɛ, “Tik na wot wɔ̀ bɛrɛng nekwɔn jɔt nshi na nerɔt e vwel o, na wot a di, kɛ gyeng wot ê sɛ̀ sɔng yaga bedwa tanga bedwâ-madung. Ka ano wɛt, sɛ̌ wot ê mɔbɔs yɛ.”

⁶Mwa hɛn ba yong ɛ bebak de kawɛ mɛn a rɔda kyè vɔk ɛ, yɛn a hwo sogo, kawɛ a kaba bak o mwɛ.

⁷Jeng de Obadya a sé kyè kwɛngɛl mɛ, ko ras de a man na Eliya. A pere wɔ̀ tɔk ɛ, ko a gaba e cat bol mɛ, a ye, “A sé hwo a womo mwin, à da a?”

⁸Eliya a ye, “Ey, e me. Ci wɔ̀ ha a dalɔ mō, me a womo e ngamo.”

⁹Obadya a yang ɛ, “E sɛ́ de ma ra a hwo, de hwô simo, Ahap a mɔrɔ me ɛ?

¹⁰Ma sé sira a hwo na Dagwi Darwey, Dagwi mō, Ahap a ga tɛ̀ bemat, ba sé ngyɛgɛt jama mō e kahɛ kwɔn e yɛnɛ̂ vwel na jey mwa. Kayɛ jeng de mwât nuyêl vwel a ye, vit a hwo e vwel o, ko Ahap a tɛ̀ ɛ a sira a yɛ, ba tɔk sɛ̀ o e kwɔn hak e vwel o wɛt.

¹¹Ko di a remo, hwó simo, me wɔ̀ ha a yɛ, hwà sé e ngamo a?

¹²Ka e bama de ma ga sogo yi e ngamo, gyeng rɔ̌ Gabik Dagwi Darwey hê vey jut o vɔk e kwɔn hak: Ko jeng de Ahap ê vey vo o, sede a sɛ̀ o wɛt, ko a rɔda mɔrɔ me. Di, hwà tɔk, ma sé mwat de me raa Dagwi Darwey yimo me hwey.

¹³Hwà ga wok wɛt a? Jeng de Yɛzɛbɛl á sè mɔbɔs bezarap Dagwi Darwey, ma jut bemat naga, ma gas ɛn zang ba kuru batungun batungun, ma lɛrɛ hɛn e fwara, ma kyese wɔ̀ nɔngɔs hɛn pyɛ́ tanga nshî.

¹⁴Ko a remo hwô yang me, me wɔ̀ ha a Ahap, hwà sé e ngamo a? A rɔda mɔrɔ me.”

¹⁵Eliya a ye, “Ma sé mwât fwôm Dagwi Darwey, Dâ Jey Mwa, ma sira me na yɛ, ma rɔda dura tó hom e nuyêl Ahap yunung.”

¹⁶Ano kwong, Obadya a wɔ̀ na Ahap, a ha a yɛ, ko Ahap a hwo sogo, a wɔ̀ man na Eliya.

¹⁷Jeng de a di ɛ, a ye, “E hwo ma womo, à gàkajey e ji Israyɛl a?”

¹⁸Eliya a toyo a yɛ, a ye, “E hwo wɛ, à gàkajey, ko e me wɛt! Hwo tanga belɔ da mō, yin a kyɛ́ in nà raa badu Dagwi Darwey, ko hwo pyɛ mo hwà re a Baal fongol!

¹⁹A remo, tula bemât Israyɛl mwa, be man na me e Raku Karmɛl. Vey na bezarap Baal naga benaas na vɛ kuru batungun (450) tanga vê Ashera de Yɛzɛbɛl e vɔk ɛn naga benaas (400) arɔng.”

²⁰Ahap a hwo tomo, a rini BeIsrayɛl mwa tanga bezarap Baal, na be wɔ̀ man e ra Raku Karmɛl.

²¹Eliya a tumal e nuyêl bemat o, a yang ɛn, “Vɔk e yɛ̌ jeng de yin a rɔda rɛ̌ ano arɛt? Ka sede Dagwi Darwey a sé Dagwi, re in a yɛ fongol, ko ka sede Baal a sé Dagwi, re in a yɛ fongol!” Ko bemat o ba sǎ yuu, ba ka ye pyɛ cak wɛt.

²²Eliya a re nuyel, a ye, “E me nju hom zɔng de ma tɛt ɛ e ji bezarap Dagwi, ko bezarap Baal ba sé naga benaas na kuru batungun.

²³Tik na be vey na bemus beba. Tik bezarap Baal be pat ɛ gwining, be yɛrɛ, be yong, be lasha banama mo e ra cɔ́gɔt, ko be kwon tɛ̀ kya wɛt. Me arɔng, mê ra tyɛng ano na mus o gwining.

²⁴Tik na bezarap Baal be ra won na dagwi mɛn, ko me arɔng mê ra won na Dagwi Darwey. Ko Dagwi de ê hanat, a tomo na kya, yɛ wɛ de a sé Dagwi mwin.” Bemat mwa ba mok, ba tē, “Ey, a jam ano!”

²⁵Eliya a yâng bezarap Baal, sede remo de yɛn a sé pyak, yɛn a tānga kasa mus o gwining, na be yong, ko yɛn a kwon tɛ̀ kya e cɔ́gɔt o wɛt. E bama mo, bē ra won na dagwi mɛn.

²⁶Yɛn a hwo jut mus o gwining, ba yong wɛ, ko yɛn a ra won na Baal yimo nagasi vɔk e tê-gwi, na a tomo na kya. Yɛn a gbɔ na tɔ, na Baal a wok ɛn. Yɛn a rɛ̌, ba gwɔsɔ mɛ gàgbang rangas yas de yɛn a ga lɔk, ko vit a hanat!

²⁷Jeng de gwi gwa vey e tē, Eliya a tɛ̀sɛ a yɛn ɛ neshɔngɔlɔng, a yang ɛn, “Gwɛ̌ mok in rɛng-rɛng, yaga yɛ a sé dagwi! Kɛ gyeng, bare mɛ ha wɔ yikyik, kɛ a sé ra pyɛ cak, kɛ a wɔ̂ rekyɛn, kɛ a sé e de nevwa, ko tik na yin a shina hɛ!”

²⁸Ano kwong, bezarap o ba gwɛ̌ gbɔ na tɔ rɛng-rɛng, yɛn a yɛt babek mɛn na neba, ba tow vɛ na bewal, tyɛng na negwɔn rê fongol mɛn, ko nemi na tele.

²⁹Yɛn a re nuyel ano sɛ̌ gwi gwa ye sɛndɛng, ko mwa ano, vit à hanat de ba wok.

³⁰Ko Eliya a hwo yâng bemat, be vey bagat na yɛ. Bemat o mwa ba vey tula hɛn, ba gwɔrɔ hɛ. A hwo yong gàgbang rangas yas vɔk na Dagwi Darwey, womo de ba ga kana gangas.

³¹A jut beta kuru na vɛ beba, kagwɛ gwining e to kayɛ yerê Yakɔp, womo de Dagwi Darwey a sege a yɛ rezâ Israyɛl.

³²A sé na beta vane de a lɔk mɛ gàgbang rangas yas vɔk na Dagwi Darwey. A kas pwol de netes o nê wul kwɔn de bê bere ɛ cun neshǐ masa neba, a rɔnɔ mɛ kwɔn o.

³³E bama mo, a hwo ngyɛrɛ ɛ babit cɔ́gɔt, a yɛrɛ mus wane mo, a lasha ɛ banama mo e rak o.

³⁴A yâng bemat, be vos nshi na betsung benaas, be shusha e ra banama mo tanga e ra cɔ́gɔt o. Yɛn a ra tyɛng ano. A yang ɛn, be gwɛ ra ano, ko yɛn a ra tyɛng ano, a to yang ɛn be gwɛ ra ano gbak, yɛn a to ra ano.

³⁵Nshi na tele yi e ra kwɔn o, na tele wɔ e pwol o, na sila gwɛ.

³⁶Jeng de gwi gwa ye sɛndɛng, jeng de be nása nenɔrɔ̂ pyɛ́ vɔk na Dagwi, Eliya a sek vɔk e gàgbang rangas o, a hwo ra won, a ye, “À Dagwi Darwey, Dagwi wo Abraham na wo Yishak tanga wo Israyɛl! Tik na bemat be tɔk, hwo wɛ à Dagwî BeIsrayɛl, ko me wɛ a mwât fwom mō, ma ra pyɛ́ yemo mwa tyɛng na pyɛ de hwà nɔng me nu.

³⁷Wok me! Toyo a me na ha, yaga na bemat vemo be tɔk, hwo Dagwi Darwey hwà sé Dagwi mwin, ko hwà to sé toyo na neyey mɛn vey na hwo.”

³⁸Dagwi Darwey a vɛ̌ tomo kya, ha vey re pyɛ̂ nɔrɔ mo mwa na cɔ́gɔt o tanga beta mo, ha wuna na vwel o, ha pere hworok mwa na nshi de na sè e pwol o, nà ye jɔng.

³⁹Jeng de bemat o ba di ano, yɛn a gabsa gup e vwel, ba tē, “Dagwi Darwey yɛ wɛ a sé Dagwi! Dagwi Darwey yɛ wɛ a sé Dagwi!”

⁴⁰Ko Eliya a nɔng nu, be vos bezarap Baal mwa, be tik hwak e ji mɛn a hywit ɛ wɛt. Bemat ba vos ɛn mwa, ko Eliya a tɛ̀, be kyè na yɛn vɔk e Kerɔt Kishɔn, be mɔbɔs hɛn e hwomo.

⁴¹E bama mo, Eliya a yâng Gbɔng Gwɔ̀m Ahap, “Kyè, wɔ̀ re pyɛ́ kwong. Ma sé wok rwak wa sé lulum, wa vey bagat.”

⁴²Jeng de Ahap a sé kyè wɔ̀ re pyɛ́, Eliya a to tut vɔk e Raku Karmɛl, a wɔ̀ ye ngyɔk, a tɛ̀ to mɛ e sarâng bakwot mɛ.

⁴³A tomo mwât fwom mɛ, a wɔ̀ di bak gworep. Mwât fwom o a wɔ́, a toyo, a ye, a di pyɛ cak wɛt. Eliya a tomo mwat o zang taama.

⁴⁴E hê taama mo, a toyo a yɛ, a ye, a di kerele kepɛng kehak de nerey o na ka dal tas vwɔ wɛt, ka sé kyè vey yi e gworep. Eliya a nɔ̂ng mwat mɛ nu, a wɔ̀ ha a Ahap, a ra ziri, na a yel e kyɛkyɛ̂ dwa mɛ, na a toyo wɛrɛ ziri, gyam na rwak wo dul ɛ.

⁴⁵E ji jeng tyɔng, rwak wa hwo siri, gul gwa hwo pɛsɛl, ko rwak wa hwo gworok rop. Ahap a yel e kyɛkyɛ̂ dwa mɛ, a hwo toyo vɔk e Yɛzrɛɛl.

⁴⁶Eliya a gunung nû gworugu mɛ, ko Dagwi Darwey a nɔng ɛ gap, na a tele e nuyêl Ahap pere wo wul Yɛzrɛɛl.