Read berom 1 Begwɔ̀m 19 Bible Online

1 Begwɔ̀m 19 - berom bible

1 Begwɔ̀m 19

¹Gbɔng Gwɔ̀m Ahap a ha a hwā mɛ Yɛzɛbɛl pyɛ de Eliya a ga ra, de a ga mɔbɔs bezarap Baal mwa.

²Yɛzɛbɛl a hwo tomo wɔ na Eliya, a ye, “Hwà ga mɔbɔs bezarap Baal hom! Di, a remo, ma rɔda mɔrɔ hwo arɔng! Ma sira me, ka sede ma ba mɔrɔ hwo jeng ngan nahwol wɛt, ko tik na bedagwi be wey na me!”

³Eliya a hwo tɛ̀ bengyip sizɔng, a vɛ̌ tele vɔk e repomô Bɛɛr-Sheba e Yuda. A tik ɛ mwât fwom mɛ e hwomo,

⁴ko yɛ pyɛ mɛ a to gwɛ̌ kyè kwɛngɛl wosho hining vɔk e tê hey. E yɛnɛ mo, a wɔ̀ pom e ketîn cɔgɔt, a sangal e vwel e necam o. A hwo tosho a Dagwi Darwey, a vo ɛ, a ku. A ye, “Gwa ga vey a me ano, ma dal bedabeda hom de ba ga kushu wɛt.”

⁵A dyɛng e necam o, ko nevwa na jut ɛ. Gobok, tom-lagwi a ra ɛ, a shina hɛ, a yang ɛ, “Sogo, na hwo re pyɛ́.”

⁶A hwo sene, a di ngat, ko e bak rato mɛ a di kpam-tuk de ba halang e ra gwofwa de gwa fes, tanga tsûng nshi. A sangal cik, a re wɛ, a to sɔ nshi mo arɔng, ko a to dyɛng, a wɔ nevwa.

⁷E bamâ jeng, tom-lagwi wo Dagwi Darwey a to shina hɛ, a yang ɛ, “Sogo, na hwo re pyɛ́. Kwɔn de hwô kyè wɔ ɛ, ha nára hɛ.”

⁸Ano kwong, Eliya a sogo cik, a re pyɛ́, a to sɔ nshi arɔng. Pyɛ́ de a re mo, ya tɛ̀ ɛ, a sɛ̀ gap naka, ko a kyè nepɔlɔ kuru banaas (40), naturuk na nagwi. E yɛnɛ mo, a wɔ̀ wul Raku Sinai, raku de Dagwi a ga tɛ̀ wɛ jaram yaga to mɛ,

⁹ko a gang ɛ̀ túruk e hwomo e fwara. Jeng de a sé e Raku Sinai, Dagwi Darwey a rangal hɛ, yaga sɛ́ de a sé e hwomo arɛt?

¹⁰A hwo toyo na ha, a ye, “À Dagwi Darwey, Dâ Jey Mwa, ma ga pɛngɛ me e de ra a hwo fwom, hwo nju mō zɔng, ko bemat mō ba ga kwɔrɔ wuna-na-sira de hwà ra a yɛn. Ba ga gangas nekwɔn rangâs yas vɔk na hwo, ba ga mɔbɔs bezarap mō mwa, sɛ̌ me zɔng de ma pɔl ɛ. Ko di, a remo, ba sé simo, na be to mɔrɔ me arɔng!”

¹¹Dagwi Darwey a toyo a yɛ, a ye, “Nusu, na hwo wɔ̀ tumal e ra raku, me simo, na hwo di me, jeng de mê kwey.” Remo-remo, gwogul gap gwa hwo pɛsɛl, gwa vɛ̌ dikta beraku, gwa tɛ̀ beta be gabsa, ko Dagwi Darwey a sè e ji gwogwul o wɛt. Bama mo, vwel ha digis, ko Dagwi Darwey a sè e ji digîs vwel o wɛt.

¹²Bama mo, kya ha lolo, ko Dagwi Darwey a sè e ji kya mo arɔng wɛt. E yɛnɛ mo, kegul kehak ka pɛl hywɛ́ɛ.

¹³Jeng de Eliya a wok kɛ, a vɛ̌ bang bayis na gworugu mɛ. A nusu e majey, a tumal e rwi fwara mo. Dagwi Darwey a rangal hɛ, a ye, “Eliya, yaga sɛ́ de hwà sé e ngamo arɛt?”

¹⁴A hwo toyo na ha, a ye, “À Dagwi Darwey, Dâ Jey Mwa, ma ga pɛngɛ me e de ra a hwo fwom, hwo nju mō zɔng, ko bemat mō ba ga kwɔrɔ wuna-na-sira de hwà ra a yɛn. Ba ga gangas nekwɔn rangâs yas vɔk na hwo, ba ga mɔbɔs bezarap mō mwa, sɛ̌ me zɔng de ma pɔl ɛ. Ko di, a remo, ba sé simo, na be to mɔrɔ me arɔng!”

¹⁵Dagwi Darwey a yang ɛ, “Toyo hwo, ko hwo kwey vɔk e hey bagat na Damaskus. Jeng de hwà wɔ wul e hwomo, tik na hwo shushu Hazayɛl na něy, na a tɛ́ ɛ gbɔng gwɔ̀m wo Sirya.

¹⁶Ano arɔng, shushu Yehu Nimshi na něy, na a tɛ́ ɛ gbɔng gwɔ̀m Israyɛl, na Elisha Shafat, na a tɛ́ ɛ zarap hom e to mo.

¹⁷Hazayɛl a rɔda mɔbɔs bemat de be re a Baal fongol. Vemo de ba hywit ɛn yi na Hazayɛl, Yehu a rɔda mɔbɔs hɛn, ko Elisha arɔng a rɔda tala mɔbɔs bwang vemo de ba tɛt ɛ yi na Yehu.

¹⁸Ko BeIsrayɛl gu bataama (7,000) ba ga kyɛ́ ɛn nà re a Baal fongol. Vane ba rɔda dal beken.”

¹⁹Eliya a hala kwɔn o, a hwo sɛ̀ Elisha Shafat e de how cap. Ba sè how cap na berɔndɔng bibeba kuru na vɛ beba. Elisha mo a sè ra fwom na vê kuru na vɛ beba mo. Eliya a hwo wɔ bagat na yɛ, a vɛ̌ tɛ̀ gworugu mɛ e ra Elisha, ko a re nuyel na kwɛngɛl mɛ.

²⁰Elisha a hwo tumal how cap o, a tele a raa hɛ e bama, a ye, “À da, tik na me wɔ yâng da hom na de hom kala e ngyen, na me de vey kyè tanga hwo.” Eliya a yang ɛ, “Hwô tɔk wɔ zɔng. Ko tik na hwo bare na pyɛ de ma ga ra a hwo.”

²¹Elisha a hwo kyè, a vɔk ɛ berɔndɔng mɛ, a yɛt vɛ, a rangas vɛ e ra kya de a ga pɛl na swesêk vɔk berɔndɔng, a nɔ̂ng bemat de ba sé tanga yɛ banama mo, ba re. E bama mo, a raa Eliya, a vɛ̌ tɛ́ ɛ mwât sɛlɛ mɛ.