Read berom 1 Begwɔ̀m 20 Bible Online

1 Begwɔ̀m 20 - berom bible

1 Begwɔ̀m 20

¹Gbɔng gwɔ̀m Sirya, Bɛn-Hadat a yishi bemât como mɛ mwa e dem hining. Ba wuna hɛn na begwɔ̀m behak kuru batat na vɛ beba (32), na bedwa mɛn tanga bekyɛkyɛ̂ bedwa mɛn mwa arɔng, yɛn a kyè gwarwang mɛn vɔk e Samariya, na be wɔ̀ hwo rɛ.

²Bɛn-Hadat a tomo betom vɔk na Ahap, gbɔng gwɔ̀m Israyɛl, na a wɔ̀ ha a yɛ,

³a nɔng yas mɛ dyam pyɛng na dyam shinang, mwa na beha tanga nèy mɛ neting o.

⁴Ahap a toyo a yɛ na ha, “À darwey hom, kayɛ pyɛ de ma vɔk ya sé myo, mwa na me pyɛ hom.”

⁵Bɛn-Hadat a to tomo tom o hwak, a wɔ̀ ha a Ahap wɔgɔ, “Ma ga kana ha a hwo, hwo nɔng me yas mō, dyam pyɛng na dyam shinang, na beha mō tanga nèy mō.

⁶Ko di, nahwol jeng ngan, ma rɔda ba tomo bemât fwom hom, na be vey ngyɛgɛt lɔ mō tanga nelɔ bemât fwom mō, ko yɛn ê ba hashe kayɛ pyɛ ryat mō.”

⁷Ahap a hwo yila tula na mwa bemakûk Israyɛl. A ha a yɛn rehâ repugu de Bɛn-Hadat a sé jama na yɛ, a ye, “Bɛn-Hadat a ye, me nɔng ɛ beha hom na nèy hom, na dyam pyɛng tanga dyam shinang mwa. Ko ma simo, ma yang ɛ ey.”

⁸Bemakuk tanga bwang bemat ba yang ɛ, “Hwo kwon wok ha mɛ wɛt! Hwo kwon simo ha mɛ wɛt.”

⁹Ahap a hwo tomo, be wɔ̀ ha a darwey mɛ, Gbɔng Gwɔ̀m Bɛn-Hadat wɔgɔ, a rɔda nɔng ɛ pyɛ́ de a ga kana simo a yɛ e susu mo zɔng. Ko a rɔda to simo a yɛ na pyɛ cak wɛt. Jeng de Bɛn-Hadat a wok ha hane,

¹⁰a to tomo a yɛ na ha hemo ngan: “Ma rɔda vey wey na Samariya mwa hywiri. Di, balê barin o bê ka vey a kawɛ mwât como hom, a jut e vwɔ vɔk e lɔ wɛt. Tik na bedagwi be wey na me, ka sede ma ra ano wɛt!”

¹¹Ko Ahap a to toyo a yɛ, a yang ɛ, “Suga e dak kaa wɛt, sɛ̌ a ka re como e ngyen!”

¹²Jeng de hâ Ahap ha pom, Bɛn-Hadat tanga bwang begwɔ̀m ba sè e de sɔ̂ siring e bǔk mɛn, a vɛ̌ yâng bemât nuyel como mɛ, be yong ɛn, na be wɔ̀ hwo e ra repomo mo. Mwa hɛn ba hwo yong ɛn e ji jeng o.

¹³E jeng yane, zarap Dagwi hwak a hwo wɔ sɛ̀ Ahap, a yang ɛ, Dagwi Darwey a ye, “Hwo kwon wok bengyip gwogyɛng como gwane wɛt! Ma rɔda tɛ̀ hwo di wɛng e ra yɛn yunung. Ano kwong, hwà rɔda tɔk, Dagwi Darwey a vɔk reto e ra kayɛ pyɛ.”

¹⁴Ahap a rangal, a ye, “E beva de ba rɔda wɔ̀ to como mo ɛ?” Zarap o a yang ɛ, “Bebot bemât nuyel como de be ra fwom e bebak bavwêl bedagwɔm mō.” Ahap a to rangal hɛ, “E wa de ê sè wo nuyel mɛn arɛt?” Zarap o a yang ɛ, “E hwo wɛ.”

¹⁵Ano kwong, Ahap a rini bebot bemât nuyel como, yɛn a sè naga beba na kuru batat na vɛ beba (232), a to rini bemât como yi e Israyɛl gu bataama (7,000), a yong ɛn, na be to como na BeSirya.

¹⁶Gbɔng Gwɔ̀m Ahap tanga bemât como mɛ yi e Israyɛl mwa ba nusu yi e Samariya gwi e tē, yɛn a ta bebot bemât nuyel como vane e yel. Bɛn-Hadat tanga begwɔ̀m vane kuru batat na vɛ beba (32) yi e Sirya ba sè feng siring. E jeng o, bemât wɛlɛ de yɛ a ga tomo mo, ba pere wɔ̀ yel e buk mɛ ba tē, “Wot a sé bɛrɛng bemât como ba sé nunus yi e Samariya!”

¹⁷

¹⁸Bɛn-Hadat a yang ɛn, “Vɔk in hɛn beken, kɛ ba vey to como, kɛ ba vey nɔng bato mɛn ow, mê ka sap wɛt.”

¹⁹Bebot bemat vane ba nusu e nuyel, ko bemât como ba dopɛ e yɛn.

²⁰Kawɛ mwat a wɔ̀ hwo e ra mumwɛ WoSirya, a mɔrɔ hɛ. Bwang bemât comô Sirya mo ba doyo, ba tele, ko vê Israyɛl ba raa hɛn, ba ró ɛn. Bɛn-Hadat tanga bwang behak à bemât bedwa ba tele, na be wɔ̀ dalas.

²¹Ko Ahap na bemât como mɛ ba raa hɛn, ba wɔ̀ vos bedwa tanga bekyɛkyɛ̂ bedwa mɛn. Ano de Ahap tanga bemât comô Israyɛl ba wey na gwogyɛng BeSirya.

²²Bama mo, zarap Dagwi a wɔ́, na a wɔ̀ gyong Ahap, a yang ɛ, “Bɛn-Hadat a rɔda to ba hwo o na como jeng ano nak. Yaga ano, yong bagyɛng bemât como mō, na hwo to yong o naka, gyam BeSirya be to hwo e ra BeIsrayɛl.”

²³Bemât badu Bɛn-Hadat ba wɔ̀ misang a yɛ, ba ye, “Dagwî BeIsrayɛl a sé dagwî beraku. A sé yaga wot a to como na yɛn e berahwol de yɛn a di wɛng. Ko ka sede wot ê tó yɛ e tyɛl, wot ê re ɛn kpɛgɛrɛk zɔng.

²⁴“Di, pyɛ de hwà rɔda ra, paa begwɔ̀m vane kuru batat na vɛ beba, na hwo tɛ̀ bemât nuyêl como e bato mɛn.

²⁵Ko tik na hwo to gwɛ̌ bemât como, na be se tyɛng na vê raane, mwa na bedwa tanga bekyɛkyɛ̂ bedwa como arɔng tyɛng sede vê raane. Ano de bemât como mō ba rɔda to vɔk gap sede raane. Wot a rɔda to como na BeIsrayɛl e tyɛl, wot ê re ɛn kpɛgɛrɛk zɔng.” Bɛn-Hadat a sey vô redu rane.

²⁶Shey o ha doyo, ko Bɛn-Hadat a hwo yong bemât como mɛ, na be wɔ e repomô Afɛk, na be wɔ̀ to como na BeIsrayɛl.

²⁷BeIsrayɛl arɔng ba ga kana yong ɛn, na be to como mo. Yɛn a nusu gwarwang o, na be wɔ̀ man gèy na BeSirya. Bemât repugû bebak beba mo ba tɛ̀ bǔk como, be bɛrɛng bemɛn. BeSirya ba ye ship a vwel o mwa, ko ba bɛrɛng BeIsrayɛl sede nekarâ vyēl neba zɔng.

²⁸Zarap Dagwi a to wɔ́ na gbɔng gwɔ̀m Israyɛl, a yang ɛ, “BeSirya be bare, Dagwi Darwey a sé dagwî beraku, ko a sé wo benɛk wɛt. Yaga ano, Dagwi a sira hɛ, a rɔda sɛlɛ hin, na yin a di wɛng, yin re gbɔng gwogyɛng bemât como vane mo. Ano de yin a rɔda tɔk, me wɛ, Dagwi Darwey, ma vɔk reto.”

²⁹Bemât como ba sangal e ji bǔk mɛn pɔlɔ tyiimin, be bɛrɛng bemɛn. E tuk hê taama, como ya hwo, gyam na gwi gwo gaba, bemât comô BeIsrayɛl ba ga kana mɔbɔs BeSirya gu naga (100,000). Bwang bemât comô Sirya ba tele, ba toyo vɔk e Afɛk, ko vwarâ jwâ-pomo mo gwa gaba e ra yɛn gu kuru baba na vɛ bataama (27,000), gwa ngugut hɛn, gwa mɔbɔs hɛn. Bɛn-Hadat arɔng a tele, a wɔ̀ dal e Afɛk, a lɛrɛ hɛ e ji duk e bâk lɔ.

³⁰

³¹Bemât badu mɛ ba yang ɛ, “Wot a wok, begwɔ̀m Israyɛl ba sé mwishish. Yaga ano, tik, wot a tɛ̀sɛ becɛ̌k berugû sesin, na wot a rɔgɔs berawit mot, na wot a to tɛ̀ rǐk e tɔ̀ mot, na wot a wɔ̀ na gbɔng gwɔ̀m Israyɛl, gyeng rɔ̌, ê tik o kwen.”

³²Yɛn a hwo tɔrɔ hɛn na becɛk berugu sesin, yɛn a tɛ̀ rik e tɔ̀ mɛn, yɛn a wɔ́ mɛ na Ahap, ko yɛn a yang ɛ, “Sam mō Bɛn-Hadat e ra won na hwo, na hwo tik ɛ kwen.” Ahap a rangal hɛn, a ye, “Bɛn-Hadat o a rɔngɔl kwen a? Yɛ a sé gwa hom gwɔ̀m.”

³³Jeng de bemât fwôm Bɛn-Hadat ba wok pyɛ de Ahap a hanat, yɛn a ye dedung ba toyo a yɛ, ba ye, “Ey, yin tanga Bɛn-Hadat, yin a sé begwa.” Ahap a ye, “Ci in, jut in hɛ, na yin a vey mɛ.” Jeng de Bɛn-Hadat a nusu vey, ko Ahap a yang ɛ, a tut e ra kyɛkyɛ̂ dwa mɛ.

³⁴Bɛn-Hadat a ye, “Ma rɔda toyo a Israyɛl na bapomo de da hom á kana sey ɛ yi na da mō. Ko ma rɔda nɔng o kwɔ̂n rɛsɛl pyɛ́ e Damaskus, tyɛng sede remo de da hom á kana vɔk e Samariya.” Ahap a yang ɛ, ka sede a ra ano, ko a rɔda hala hɛ, a kyè washak. Bama mo, yɛn a wuna hɛn na sira sangâl netyang. Ahap kwong a hala hɛ, a kyè.

³⁵E jeng yane, Dagwi Darwey a nɔ̂ng zarap hwak nu wɔgɔ, a yâng sa mɛ, a rusu hɛ, ko sa mɛ mo a kyɛ́ ɛ.

³⁶Ano kwong, zarap o a yang ɛ, “Hwà kyɛ́ o na raa hâ Dagwi Darwey a! Jeng de hwô sè kyè e gwong, gukum wa rɔda mɔrɔ hwo.” Jeng de sa mɛ mo a nusu, ko gukum wa vɛ̌ hwo e ra yɛ, wa mɔrɔ hɛ.

³⁷Zarap o a man na sa mo hwak, a yang ɛ, a rusu hɛ, ko sa mo a vɔk a dak ɛ, a mǎ hɛ.

³⁸Zarap o a rɔgɔs bayis mɛ na cɛk rugu, yaga na a bin doyo hɛ mɛ, yaga bê tɔk ɛ, ko a kyè a wɔ̀ tumal e vwarâ gwong, a sè gyeng Ahap de a rɔda kwey e hwomo.

³⁹Jeng de gbɔng gwɔ̀m a sè kwey, ko zarap o a moklo na gbɔng fwɔ, a yang ɛ, “À da, neken mō ne ros! Ma sè e tê tô como, ko mwat hwak a vɛ̌ vey na mwat de a vo e como mo na me, na me gyeng a yɛ hɛ. A yang me, ka sede mwat o a tele, ko ma rɔda tala na neken hom, kɛ mê tala hɛ dyam pyɛng kilo kuru batat na vɛ betungun (35).

⁴⁰Ko jeng de ma sè e de bûm fwom, mwat o a vɛ̌ hywit ɛ, ko a tele!” Ahap a yang ɛ, “Hwà yɛrɛ a to mō shɔt gyam!”

⁴¹Remo-remo, mwat o a hwo pat cɛk rugu yane yi e bayis mɛ, ko gbɔng gwɔ̀m a vɛ̌ di, a sé hwak e ji bezarap Dagwi.

⁴²Zarap o a ye, “Dagwi Darwey a nɔng o redu, na hwo wey na Bɛn-Hadat, ko hwà hala hɛ, a kyè washak. Di, a remo hwà rɔda ku e to mɛ! Bemat mō ba rɔda kushu e tô bemat mɛ arɔng!”

⁴³Ko a yâng Ahap vwes, a toyo vɔk e Samariya na shom.