Read berom 1 Begwɔ̀m 21 Bible Online

1 Begwɔ̀m 21 - berom bible

1 Begwɔ̀m 21

¹Ahap, gbɔng gwɔ̀m Israyɛl, a vɔk lɔ gwɔ̀m hak e repomô Yɛzrɛɛl. Lɔ mo ha sé bagat na bwî anap Nabɔt, mwât Yɛzrɛɛl.

²Tuhak, Ahap a yâng Nabɔt, “Nɔng me bwî anap mō gwomo de gwa sé bagat na majey lɔ hom, me simo mê turus ɛ hwonong. Mê nɔng o hwak de gwa dal gwɛ na nerat, kɛ hwô dal na simo, me sey, me tala hwo mwa dyām de hwà tɛ̀ a me ɛ.”

³Nabɔt a toyo a yɛ, a ye, “Dagwi Darwey a ro mɛ! Bwi gwomo gwa sé nap hom. Ma rɔda nɔng o gwɛ wɛt.”

⁴Ahap a wok ano, a vɛ̌ a yang ɛ vwes, yaga pyɛ de Nabɔt a ha a yɛ, ko a wok shom. A kyè vɔk e lɔ, a wɔ̀ dyɛng gup, a vɛ̌ kyɛ́ ɛ na re pyɛ́.

⁵Hwā mɛ Yɛzrɛɛl a yel e ji mo, a di ɛ, a rangal hɛ, a ye, “Sɛ́ ya té ɛ? Yaga sɛ́ de hwà kyɛ́ o na re pyɛ́ ɛ?”

⁶Rwas mɛ a toyo a yɛ, a ye, “Ma yâng Nabɔt a row a me bwî anap mɛ, kɛ me nɔng ɛ hwak de gwa dal gwane mo, ko a ró mɛ, a ye, ‘Ma rɔda nɔng o bwî anap hom wɛt!’ ”

⁷Hwā mɛ a yang ɛ, “E hwo de hwà sé gbɔng gwɔ̀m Israyɛl wɛt a? Sogo, na hwo re pyɛ́. Hwo kwon lashe yey wɛt. Ma rɔda nɔng o bwî anap Nabɔt o!”

⁸Yɛzɛbɛl a hwo jɛk bebok-berang vɔk na bemakuk tanga bemât nuyêl repomô Nabɔt. E ji mo, a jɛk ɛ ngan: “Mok in a bemât repomo mwa, be tik rê pyɛ́, be tula hɛn. Ko yin tɛ̀ Nabɔt e kwɔ̂n sangal rey, ko vey in na nèy gul neba. Tɛ̀ in nɛ, ne sangal, ko ne bɛrɛng hɛ, ne vɛ́sɛ bɔs e ra yɛ, ne tē, ‘Nabɔt a ga dusa Dagwi tanga Ahap’. E bama mo, pat in hɛ e majey, na be tó ɛ na beta, na be mɔrɔ hɛ.” A tɛ̀ vwɔ e tô Ahap, a rusu ɛ yɔbɔ̂ reto mɛ, ko a tomo bemât nuyel o na vɛ.

¹¹Bama de bemât nuyêl repomo ba sey bebok-berang o, yɛn a vɛ̌ ra tyɛng na pyɛ de ba jɛk ɛ.

¹²Yɛn a mok a bemat wɔgɔ, be tik rê pyɛ́ tuk hane, be tula hɛn. Jeng de yɛn a ga man e de tula mo, yɛn a tɛ̀ Nabɔt e kwɔ̂n sangal rey.

¹³Nèy gul neba nane na vey, na sangal, ne bɛrɛng Nabɔt. Na hwo vɛ́sɛ bɔs e ra yɛ, na tē, a ga dusa Dagwi tanga Ahap. Yaga ano, ba gang ɛ vɔk e majey vɔk e bamâ repomo, ba tó ɛ na beta, a pere wɔ ku.

¹⁴E bama mo, ba tomo na ha vɔk na Yɛzɛbɛl wɔgɔ, ba ga tó Nabɔt na beta, a ga ku.

¹⁵Remo-remo de a wok ha mo, a hwo ha a rwas mɛ, “A remo, wɔ̀ jut bwi gwomo de Nabɔt a ga ró mɛ nà row a hwo! A ga ku. Gwa ga tɛ́ ɛ mwo.”

¹⁶Ahap a hwo sogo, a kyè wɔ jut bwî anap o, gwa tɛ́ ɛ mwɛ.

¹⁷Dagwi Darwey a hwo yâng Eliya, zarap mɛ,

¹⁸“Kyè wɔ na Ahap, gbɔng gwɔ̀m Israyɛl. Á wane a sé e ji bwî Nabɔt a remo, a sé jut gwɛ, gwo tɛ́ ɛ mwɛ.

¹⁹Kyè wɔ̀ ha a yɛ, yang ɛ, me Dagwi Darwey, ma ye, ‘Hwà ga mɔrɔ Nabɔt, ko hwà sé jut pyɛ́ mɛ. Di, kwɔn de bevu ba lɛlɛ ɛ nemî Nabɔt, kwɔn a hemo de bevu ba rɔda ba lɛlɛ ɛ nemo arɔng!’ ” Jeng de Eliya a wɔ sɛ̀ ɛ,

²⁰Ahap a hwo yang ɛ, “À mwât repugu hom, hwà ga sɛ̀ me a?” Eliya a toyo a yɛ, a ye, “Ey. Di, hwà ga ye ngyɛ́k, na hwo ra pyɛ de Dagwi Darwey a ga kyɛ́ ɛ.

²¹A remo, Dagwi Darwey a rɔda tɛ̀ gawey e ra hwo, a rɔda teshe na hwo ves. A rɔda mɔbɔs mwa beras na nèy mō bewen e cang mō, besam tanga nèy lɔ.

²²A rɔda tala lɔ mō mwa hwiri tyɛng sede remo de ba ra na belɔ Yɛrɔbɔwam tanga yɛ Baasha. Hwà ga tɛ̀ a Dagwi Darwey shom sizɔng yi na banɛn mō, na hwo to tɛ̀ BeIsrayɛl mwa be ra banɛn.

²³Ko di, Dagwi Darwey a to ha e ra Yɛzɛbɛl, bevu ba rɔda ba re banama mɛ e vwâ repomô Yɛzrɛɛl.

²⁴Kawɛ mwât lɔ mō de a ku e ji repomo, bevu ba rɔda re, ko vemo de ba ku e hey, bejagawey ba rɔda re.”

²⁵Ey mwin, e ji bemat de ba ra neves e jey, vit a mwat de nemɛ na vey ne Ahap. Hwā mɛ Yɛzɛbɛl arɔng a gwɛsɛ a yɛ gap.

²⁶A kyɛ́ ɛ nà raa badu Dagwi Darwey. Pyɛ de ya dal mwa, a to re a pyɛ̂ sekwit fongol, tyɛng sede remo de BeAmɔr bà kana ragas, gyam na Dagwi Darwey a pat ɛn yi e ji vwel o, na a de nɔ̂ng BeIsrayɛl hɛ.

²⁷Jeng de Eliya a tala ha a Ahap, Ahap o a vɛ̌ hama berugu mɛ, ko a tɛ̀sɛ berugû sesin kayɛ jeng, turuk na gwi. A vɛ̌ bɛrɛng rishish yaga lashê yey, a to kyɛ́ ɛ pyɛ́ nà re arɔng.

²⁸E bamâ jeng yane, Dagwi Darwey a yâng Eliya,

²⁹“Hwà di Ahap de a sé lashe yey yaga pyɛ de a ga ra wɛt a? Ma rɔda teshe na belɔ mɛ, jeng de a sé rɔngɔl kwen wɛt. Ma rɔda gyeng, sɛ̌ hwey mɛ ha ba re negwɔm.”