Read berom 1 Begwɔ̀m 22 Bible Online

1 Begwɔ̀m 22 - berom bible

1 Begwɔ̀m 22

¹BeIsrayɛl ba tɛ̀ neshey netat e ji sangâl netyang na BeSirya.

²E shey hê tat o, Yɛhɔshafat, gbɔng gwɔ̀m Yuda, a wɔ̀ yâng Ahap, gbɔng gwɔ̀m Israyɛl show.

³Ahap a hwo rangâl bemât badu mɛ wɔgɔ, yaga sɛ́ de yɛn a tɔk toyo na repomô Ramɔt e Gileyat yi na BeSirya wɛt arɛt? Yaga ra kana se remɛn.

⁴E bama mo, a hwo rangâl Yɛhɔshafat, a ye, “Hwà rɔda sɛ̀ me, na wot wɔ hwo e ra BeSirya wɛt arɛt?” Yɛhɔshafat a hwo yang ɛ, “Ey, wot na hwo, wot a sé vining o, bemât como hom ba sé bemo, bedwa hom ba sé bemo arɔng.

⁵Ko tik na wot tanga rangâl Dagwi Darwey e ngyen.”

⁶Ahap a hwo tomo, be vey na bezarap mɛ sede naga benaas (400). A rangal hɛn, a ye, “Wot wɔ hwo e ra BeSirya e Ramɔt, kɛ wey ɛ?” Yɛn a yang ɛ, “Ey, ci! Dagwi Darwey a rɔda sɛlɛ hwo, na hwo di wɛng, hwo rɛ́ ɛn.”

⁷Ko Yɛhɔshafat, yaga e simo, na a tɔk mwin, bê di wɛng, a yâng Ahap, “Zarap hwak a to sé womo de Dagwi Darwey a rɔda ha yi na yɛ wɛt a?”

⁸Ahap a yang ɛ, “Ey, hwak a sé. Ko ma kyɛ́ me hɛ, yaga kayɛ jeng e tɔk ha a me hâ wɛng wɛt. Za mɛ à Mikaya Imla.” Yɛhɔshafat a yang ɛ, “Hwo ye ano wɛt, à gbɔng gwɔ̀m.”

⁹Ahap kwong a tomo mwât fwom hwak, a wɔ yila Mikaya, na a vey ziri.

¹⁰E jeng o, Ahap tanga Yɛhɔshafat de ba tɔrɔ hɛn na yɔ̀m negwɔm mɛn, yɛn a sè sangal e nekwɔn sangal mɛn e gazu bagat na rwi Samariya. Yɛn a sé wet betong na neha de bezarap ba sé ha a yɛn.

¹¹Zɛdɛkiya Kenaana a sè gwining e ji mɛn. A ga yong ngɛngɛ na dyam, a sé gbɔ, a tē, “À Ahap, Dagwi Darwey a ye ngan: ‘Hwà rɔda wɔ̀ hwo e ra BeSirya, ko ba rɔda tɔk di wɛng e ra hwo wɛt, tyɛng sede be tɔk di wɛng e ra mus de wa vɔk ngɛngɛ̂ dyam arɔng wɛt. Hwà rɔda wey na yɛn mwa hywiri!’ ”

¹²Mwa bezarap o ba simo, Ahap a wɔ hwo e ra BeSirya e Ramɔt, ko yɛn a sira hɛn, Dagwi Darwey a rɔda sɛlɛ hɛ, na a re ɛn.

¹³Tom de ba tomo, na a wɔ jut Mikaya, a hanat na yɛ, a ye, “Di, mwa bezarap ba ha a Ahap yɛgɛt yat. A sé naka na hwo arɔng hwo wɔ ha ano.”

¹⁴Mikaya a yang ɛ, “Ma sé sira me na Dagwi Darwey, ma rɔda ha pyɛ de ê ha a me zɔng!”

¹⁵Jeng de Mikaya a wɔ̀ wul na Ahap, Ahap o a rangal hɛ, a ye, “À Mikaya, wot wɔ hwo e ra BeSirya e Ramɔt a?” Mikaya a toyo a yɛ, a ye, “Ey, ci, hwà rɔda di wɛng! Dagwi Darwey a rɔda sɛlɛ hwo e ra yɛn.”

¹⁶Ahap a hanat, a ye, “À Mikaya, zang ala de ma rɔda yang o, hwo ha a me tsak o zɔng, jeng de hwó ha e ji rezâ Dagwi Darwey ɛ?”

¹⁷Mikaya a yang ɛ, “E ji negwi-ywey, ma di bemât comô Israyɛl ba shara hɛn shǎm e rahwol sede vyēl de vit a lwêk yɛ. Ko Dagwi Darwey a ye, ‘Di, bemât comô Israyɛl de vit a hɛn à mwât nuyel. Tik na yɛn a toyo hɛn vɔk e lɔ yaang zɔng.’ ”

¹⁸Ahap a hwo doyo wɔ na Yɛhɔshafat, a yang ɛ, “Má ga sè na ha a hwo, yɛ e mok a me gawey a?”

¹⁹Mikaya a to yang ɛ, “Wok hâ Dagwi Darwey hemo! Ma to di Dagwi Darwey a sé sangal e gwofwa negwɔm mɛ, kayɛ pyɛ cen e ji lagwi ya rɔnɔ hɛ.

²⁰Dagwi Darwey a rangal, ‘E wa de ê tɔk wɔ kwɛlɛng Ahap, na a wɔ e Ramɔt e kwɔn de bê wɔ mɔrɔ hɛ arɛt?’ Cak ya ye pyɛ cak, ko cak ya ye pyɛ cak detu.

²¹Ko gabik hak ha yi, ha yâng Dagwi Darwey, ‘Ma rɔda wɔ kwɛlɛng hɛ!’ Dagwi Darwey a rangal hɛ, a ye, ‘E rɛ̌ de hwà rɔda ra ɛ?’

²²Ha ye, ‘Ma rɔda tɛ̀ bezarap mɛ, be vɛ́sɛ a yɛ bɔs!’ Dagwi Darwey a yang ɛ, ‘Ey, a jam ano! Ci, na hwo wɔ̀ ra ano!’ ”

²³Mikaya a yâng gbɔng gwɔ̀m, “Pyɛ mo ya té tyɛng ano. Di, Dagwi Darwey a tɛ̀ bezarap mō, be vɛ́sɛ a hwo ɛ bɔs, ko mwin, a ga yong ɛ̀, gawey hê hwo e ra hwo!”

²⁴Zɛdɛkiya a hwo sogo, a kyè wɔ na Mikaya, a vɛ̌ rusu hɛ e rwanang. A yang ɛ, “E rɛ̌ de Dagwi Darwey a tik nà ha na me, na a vey ha na hwo ɛ?”

²⁵Mikaya a toyo a yɛ, a yang ɛ, “Hwà rɔda di pyɛ mo tuk de hwà rɔda tele wɔ lɛrɛ hwo e ji duk e zɔrɔk lɔ hak.”

²⁶Ahap a nɔng nu, be vo Mikaya, be kyè mɛ, na be tɛ̀ ɛ e vwɔ̂ sɔ mɛ Yowash tanga Amɔn, gwɔmna Samariya.

²⁷Be ha a yɛn, be tɛ̀ ɛ e ji duk ngyang, na be nɔngɔs hɛ kekpam-tuk tanga kenshi zɔng, sɛ̌ jeng de yɛ a ba toyo tyang e ngyen!

²⁸Mikaya a yang ɛ, “Ka sede hwà ba toyo tyang, ko sɛ̌ Dagwi Darwey a ha yi na me wɛt.” Ko a yâng bemat de ba tula hɛn, “Yin ye bam a ha hom wɛt!”

²⁹Ahap, gbɔng gwɔ̀m Israyɛl, tanga Yɛhɔshafat gbɔng gwɔ̀m Yuda, ba hwɔlɔ a bemât como mɛn gwong vɔk e de como e Ramɔt e Gileyat.

³⁰Gyam na yɛn a sogo vɔk e de como mo, Ahap a ha a sa mɛ Yɛhɔshafat, a ye, “Ma rɔda doyo me, na me tɛ́ me sede gwining e ji bemât como, ko hwô tɔrɔ hwo na yɔ̀m negwɔm mō.” Ano de Ahap a doyo hɛ, a tɔrɔ hɛ na pyɛ̂ como zɔng, ba kyè vɔk e de como mo.

³¹Gbɔng gwɔ̀m Sirya a ga kana nɔ̂ng bemât nuyel bekyɛkyɛ̂ bedwa como mɛ kuru batat na vɛ beba (32) nu, yɛn a kwon ra mwat hwak wɛt, sɛ̌ gbɔng gwɔ̀m Israyɛl.

³²Yaga ano, jeng de yɛn a di Yɛhɔshafat, yɛn a bare, a sé gbɔng gwɔ̀m Israyɛl, ko yɛn a doyo, na be hwo e ra yɛ. Ko jeng de a pɛl sekun,

³³yɛn a pere wɔ̀ tɔk, a sé gbɔng gwɔ̀m Israyɛl wɛt, yɛn a tik nà hwo e ra yɛ.

³⁴Ko mwât comô Sirya hwak a ta kwet kpɛɛ zɔng, ko kwet o gwa kwey e tê pyɛ̂ comô Ahap, gwa wɔ toro hɛ. A hanat, “Ba ga mǎ me!” A yâng mwât hwɔlɔ̂ kyɛkyɛ̂ dwa mɛ, a pat ɛ yi e kwɔn o.

³⁵Jeng yane, como mo ya fes. Ba gyepes Ahap e ji kyɛkyɛ mɛ, e bɛrɛng BeSirya. Nemi mɛ na lusha hɛ, na kyiri jî kyɛkyɛ mo, ko nahywegelek, a ku.

³⁶Jeng de gwi gwa sé kyè wɔ gaba, bemât nuyel comô BeIsrayɛl ba tɛ̀, be mok, be tē, “Kawɛ mwat a toyo vɔk e bak vwel mɛ na pomo mɛ!”

³⁷Ano de Gbɔng Gwɔ̀m Ahap, a ku. Ba jut revin mɛ wɔ e Samariya, ba lɛrɛ rɛ e hwomo.

³⁸Ba kus kyɛkyɛ̂ dwâ como mɛ e didêng Samariya, ko bevu ba lɛlɛ nemi mɛ, bedebeves be kurus hɛn e kwɔn o arɔng, tyɛng sede remo de Dagwi Darwey a ga kana ha.

³⁹Bwang pyɛ́ de Ahap a ra, mwa na lɔ gwɔ̀m de a lɔk, na a to tɔrɔ hɛ̄ na yìn gbin de ba tsep, tanga bapomo de a dul na bejwâ-pomo, ba jɛk yɛ e Bwok-basa Pyɛ̂ Bare yê Begwɔ̀m Israyɛl.

⁴⁰Jeng de Ahap, gbɔng gwɔ̀m Israyɛl, a ku, ba lɛrɛ hɛ, ko hwey mɛ Amasiya a re negwɔm e to mɛ.

⁴¹Yɛhɔshafat Asa a hwo re negwɔm Yuda e shey hê naas de Ahap a sè re negwɔm Israyɛl.

⁴²A vɔk neshey kuru batat na nɛ netungun (35), ko a re negwɔm o yi e Yɛrusalɛm neshey kuru baba na nɛ netungun (25). Dē mɛ Azuba a sè hwông Shilhi.

⁴³A ra pyɛ́ de ya jam a Dagwi Darwey, sede remo de da mɛ, Asa, a kana ra. Ko a ka gangas nekwɔn sekwit wɛt, yaga ano, bemat ba re nuyel, be ragas sekwit, be nása ɛ nenɔrɔ̂ yas mɛn.

⁴⁴Yɛhɔshafat a sè sangâl netyang na gbɔng gwɔ̀m Israyɛl.

⁴⁵Bwang pyɛ́ de Yɛhɔshafat a ra, mwa na cōmo de a to tanga wɛng de a bɛrɛng, ba jɛk yɛ e Bwok-basa Pyɛ̂ Bare yê Begwɔ̀m Yuda.

⁴⁶A ro bwang bejwang bemat, beras na beha, vemo de bà ragas tomong ves e nekwɔn sekwit, vemo de da mɛ, Asa, a kana tɛt ɛ.

⁴⁷E jeng o, vwêl Ɛdɔm ha kana vɔk gwɔ̀m wɛt, ko ba vɔk mwât bɛrɛng hɛn zɔng.

⁴⁸Yɛhɔshafat a tɛ̀, be yong begbɔng bedwa-nshi, na be wɔ hashe a yɛ dyam shinang e vwêl Ofir. Ko ba ka ra fwom o wɛt, yaga gwogul gwa kwɔrɔs vɛ bagat na Ɛziyɔn-Gɛbɛr.

⁴⁹Amasiya, gbɔng gwɔ̀m Israyɛl, a nɔng bemât fwôm, bedwa-nshi mɛ, na be ra fwom tanga vê Yɛhɔshafat, ko a kyɛ́ ɛ.

⁵⁰Yɛhɔshafat a ku, ba lɛrɛ hɛ e sak begwɔ̀m e Repomô Davit, ko hwey mɛ Yɛhɔram a re negwɔm e to mɛ.

⁵¹Ahaziya Ahap a hwo re negwɔm Israyɛl e shey hê kuru na hɛ taama de Yɛhɔshafat a sè re negwɔm Yuda, ko a re negwɔm o yi e Samariya neshey neba.

⁵²A ra banɛn e nuyel Dagwi Darwey, yaga a raa negwɔn neves da mɛ tanga neng mɛ, na ne Yɛrɔbɔwam de a tɛ̀ BeIsrayɛl, be ra banɛn.

⁵³A re a Baal fongol, a tɛ̀ shôm Dagwi Darwey, Dagwî Israyɛl ya sogo, tyɛng sede remo de da mɛ à ra.