Read berom 1 Begwɔ̀m 3 Bible Online

1 Begwɔ̀m 3 - berom bible

1 Begwɔ̀m 3

¹Sɔlɔmɔn a ra wenêng hwông Farawo, gbɔng gwɔ̀m Misra, ko yi ano a wuna nesa na Farawo mo. A vey na hwong o e Repomô Davit, a sangal mɛ e hwomo sɛ̌ a tala lɔ̂k lɔ rey mɛ, na Gbɔng Duk Re Fongôl Dagwi Darwey tanga jwa de ba gwɔrɔ mɛ Yɛrusalɛm.

²E jeng yane, ba ga kana lɔk gbɔng duk re a Dagwi ɛ fongol e ngyen wɛt, ko bemat ba rɔɔ nása nenɔrɔ̂ yas e nekwɔn rangas de ba lɔk e nedem detidetu e ji sevwel o.

³Mwa ano de Sɔlɔmɔn a tɛ̀ yey na Dagwi Darwey, a raa badu da mɛ Davit, ko a nása nenɔrɔ̂ yas vɔk na yɛ e nekwɔn detidetu arɔng.

⁴E jeng cak, Sɔlɔmɔn a wɔ́ e Gibɛyɔn, na a wɔ̀ nára nɔrɔ̂ yas de be yɛt vɔk na Dagwi, yaga e kwɔn a hane de gbɔng gàgbang rangâs yas wa sé ɛ. A nára nenɔrɔ̂ yas de be rangas burang naga e kwɔ̂n rangas o.

⁵E ji nabwalak, Dagwi Darwey a hwo dura tó mɛ na Sɔlɔmɔn e ji negwi, a yang ɛ, “E sɛ́ de hwo simo, me nɔng o arɛt?”

⁶Sɔlɔmɔn a toyo a yɛ, a ye, “Di, hwà ga dura gbɔng tɛ̂ yey mō na da hom Davit kayɛ jeng. Yɛ arɔng a ga tik o ko tyɔng wɛt, ko a sé cik e nuyel mō. Hwà re nuyel na dura a yɛ gbɔng tɛ̂ yey mō. Di, hwà ga nɔng ɛ hwey, hemo de hê sangal e gwofwa negwɔm e to mɛ yunung.

⁷“À Dagwi Darwey, Dagwi hom, hwà ga tɛ̀, me re negwɔm e tô da hom, mwa ano de ma rɔngɔl hwey sɛl o zɔng, vit nà tɔk sangâl jey e ngyen.

⁸Me à womo e tê bemat de hwà kasa, na be sɛ̀ bemo, yɛn ba sé bɛɛrɛ, bê tɔk bara vɛ wɛt.

⁹À Dagwi hom, nɔng me netsitsɛng nemo de mê tɔk kyè mɛ na vɛ, na me tɔk gas pyɛ́ ryat na pyɛ́ vyes, na me bin kyè na pyɛ́ cik. Ka ano wɛt, ko mê ra e rɛ̌, na me re negwɔm e ra bemat mō de ba sé pyak ano ɛ?”

¹⁰Dagwi Darwey a vɔk yey pyɛng na pyɛ de Sɔlɔmɔn a ra won o.

¹¹Yaga ano, a yang ɛ, “Hwà yâng tɔk ra won, na hwo ros e jey, kɛ hwo vɔk yas pyak, kɛ be wey na bemât repugu mō, ko hwà ra wôn netsitsɛng, na hwo ra mɛ pyɛ́ cik e ji negwɔm mō e negya.

¹²Yaga ano, ma rɔda ra a hwo pyɛ de hwà ra won o. Ma rɔda nɔng o netsitsɛng de nê dal ne bwang bemat de ba kana vɔk gyam, nà rɔda to dal ne vemo de bê vey e bama mō.

¹³Ma rɔda to nɔng o pyɛ́ de hwà ka ra won o wɛt. Hwà rɔda sè darwey, ko nerey mō nê dal ne kawɛ gbɔng gwɔ̀m e jeng mō.

¹⁴Ko ka sede hwà gyeng badu hom, tyɛng sede remo de da mo Davit a ra, ko ma rɔda tɛ̀, hwo ros e jey.”

¹⁵Jeng de Sɔlɔmɔn a sene, a de tɔk, e Dagwi de a ha na yɛ e ji negwi. Ko a hwo kyè vɔk e Yɛrusalɛm, a wɔ̀ tumal e nuyêl Kundung Wuna-na-Sirâ Dagwi Darwey, a nára nenɔrɔ̂ yas de be rangas burang tanga nenɔrɔ̂ wunâ nesa vɔk na Dagwi Darwey. Bama mo, a yong a bemât fwom mɛ mwa pyɛ̂ nzem.

¹⁶Tuhak, bedebeves behak beba ba wɔ́ na shɔt mɛn na Gbɔng Gwɔ̀m Sɔlɔmɔn.

¹⁷Hwak e ji mɛn a hwo ye, “Neken mo ne ros, à gbɔng gwɔ̀m! Wot a sé sangal e lɔ hining o, wot beba tanga hwā womo, wot a hwo vɔk nejim, ko ma tɔ̀ hwey hom wen o, yɛ e lɔ mo.

¹⁸Bamâ pɔlɔ ba, yɛ arɔng a tɔ̀ mɛ́ wen o arɔng. Wot a sé nju mot beba zɔng e lɔ mo, vit a mwat de a sé tanga wot.

¹⁹E turuk hak, a hwo dyɛng e ra hwey mɛ, a pere wɔ̀ mɔrɔ hɛ.

²⁰E tê turuk, jeng de a sene a di hwey mɛ revin o, a hwo jut rɛ, a lasha rɛ bagat na me jeng de ma sê nevwa, ko a jut nang ken o, a lasha hɛ bagat na vasal mɛ.

²¹Jeng de ma sene nagasi, ma simo na me ngas hwey hom, ma de di ha sé revin o. Ko jeng de ma bɛrɛng hɛ yɛɛlɛl, ma di ha sé nang wɛt.”

²²Hwā mo wòt a ye, “Wey, hwey ken o mo ha sé nang, ko revin o ra sé remó.” Yɛn a tó mɛ cuna e nuyêl gbɔng gwɔ̀m ano.

²³Ano kwong, gbɔng gwɔ̀m Sɔlɔmɔn a ye, “Sede remo de yin a sé to cuna, kawɛ e ji min a sé tē, hwey ken o ha sé mɛ, ko revin o ra sé rê hywi mɛ.”

²⁴Ko tik na be wɔ̀ vey a me na wal. A hwo tomo, be wɔ̀ vey na wal. Sede ba vey mɛ,

²⁵a ye, “Be gas hwey ken o mo e tē, na be nɔ̂ng kawɛ mɛn bit o.”

²⁶Ko dê hwey ken o de a wok nemwishish hɛ a ye, “Wey, wey, à gbɔng gwɔ̀m, be mɔrɔ hɛ wɛt! Be nɔ̂ng hwā woro mo hɛ ken zɔng!” Ko hwā woro mo a ye, “Wey, be nɔ̂ng hwak hɛ ken wɛt. Be gas hɛ ba zɔng.”

²⁷Ano kwong, gbɔng gwɔ̀m a ye, “Be mɔrɔ hɛ wɛt! Be nɔ̂ng hwâ mɛsɛng de a tanga vey na sekun o hɛ. E yɛ de a sé tsak dê hwey o.”

²⁸Jeng de BeIsrayɛl mwa ba wok yerê shɔt de Sɔlɔmɔn a yɛrɛ, ba langat hɛn, ko ba nɔngɔs hɛ nerey tyɔng wɛt. Yɛn a tɔk, e Dagwi de a nɔng ɛ netsitsɛ̂ng gâs ha e tē.