Read berom 1 Begwɔ̀m 4 Bible Online

1 Begwɔ̀m 4 - berom bible

1 Begwɔ̀m 4

¹Sɔlɔmɔn a re negwɔm e ra BeIsrayɛl mwa.

²Bemât nuyel mɛ vɛ a: Azarya Zadɔk a sé piris,

³Ɛlihɔrɛf tanga Ahiya, nèy Shisha, ba sé bemât jɛ̂k gbɔng gwɔ̀m, Yɛhɔshafat Ahilut a sé gbɔng mwât jɛk,

⁴Bɛnaya Yɛhɔyada a sé wo nuyêl bemât como. Zadɔk tanga Abiyatar ba sé bepiris

⁵Azarya Natan a sé mwât nuyêl Bedagwɔm Zabut Natan, piris, a to sé mwât vos badu gbɔng gwɔ̀m wo tó mɛ.

⁶Ahishar a sé wo nuyêl bemât fwôm lɔ gbɔng gwɔ̀m, Adoniram Abda a sé wo nuyêl fwôm retek.

⁷Sɔlɔmɔn arɔng a to tɛ̀ bedagwɔm bebak bavwel kuru na vɛ beba (12) e ra BeIsrayɛl mwa. Ba vɛ̀sɛ a gbɔng gwɔ̀m tanga lɔ mɛ na pyɛ̂ re yi e bebak mɛn. Kawɛ e ji mɛn a rɔda vey na pyɛ̂ re yê pwɛl gwining e shey.

⁸Bazâ bedagwɔm na bebak vwel mɛn a vemo: Bɛn-Hur a sé wo bak berahwôl Ɛfrayim.

⁹Bɛn-Dɛkɛr a sé wo bapomô Makas, na Shaalbim, na Bet-Shɛmɛsh tanga Ɛlɔn-Bet-Hanan.

¹⁰Bɛn-Hɛsɛt a sé wo bapomô Arubot na Sɔkɔ mwa na bak vwêl Hɛfɛr.

¹¹Bɛn-Abinadap a sé wo bak berahwol de wa sé bagat na Dɔr. A ra wenêng Tafat, hwông Sɔlɔmɔn.

¹²Baana Ahilut a sé wo bapomô Taanak na Megido tanga mwa bak vwel bagat na Bet-Sheyan, bagat na repomô Zaretan e rwa batîn repomô Yɛzrɛɛl, pere wɔ̀ wul mɛ repomô Abel-Mehola tanga rê Yɔkmɛyam.

¹³Bɛn-Gɛbɛr a sé wo repomô Ramɔt-Gilɛyat tanga mwa nebapomô Yayir, hwêy Manase, nemo de na sé e bak vwêl Gileyat, tanga bak Argop womo de wa sé e ra tas Bashan. Mwa bagbɔng bapomo mo ba sé kuru batyiimin, ba rɔnɔ vɛ na jwâ-pomo, ba tɛ̀sɛ a vɛ ɛ ri de ba bangas na begelê dyam pama.

¹⁴Ahinadap Ido a sé wo repomô Mahanayim.

¹⁵Ahimaas a sé wo bak yerê Naftali. Yɛ arɔng a to ra wenêng Basemat, hwông Sɔlɔmɔn hwak.

¹⁶Baana Hushai a sé wo bak yerê Ashɛr tanga bak Alot.

¹⁷Yɛhɔshafat Paruwa a sé wo bak yerê Isakar.

¹⁸Shimei Ela a sé wo bak yerê Bɛnyamin.

¹⁹Gɛbɛr Uri a sé wo bak Gileyat. Sihɔn, gbɔng gwɔ̀m BeAmɔr tanga Ɔk, gbɔng gwɔ̀m Bashan ba kana re negwɔm bak o. Bama bedagwɔm vane kuru na vɛ beba, hwak a sé e ra bebak bavwel o mwa.[1]

²⁰BeYuda na BeIsrayɛl ba sé pyak sizɔng vit a bara, sede bazɛk de ba sé e vwarâ gworep. Ba re pyɛ́, ba sɔ, ba to vɔk yey pyɛng arɔng.

²¹Sɔlɔmɔn a re negwɔm e ra mwa bemât bavwel yi e Gwɔrɔt Ɛifaratɛs vɔk mɛ e vwêl BeFilisti wɔ̀ sɛ̀ mɛ yɛnɛ mo na vwêl Misra. Bavwel o ba talsa hɛ dyām de a tɛ̀sɛ a vɛ, ba to how a yɛ cāp arɔng vɔk e jeng reku mɛ.

²²Pyɛ̂ re de ba vɛ̀sɛ a Sɔlɔmɔn mɛ kahɛ tuk a yet ngan: nemuk manjang tɔn benaas tanga nemuk myeenen tɔn rwit,

²³berɔndɔng de ba mɔsɔ kuru (10), na berɔndɔng de ba gyenges vɛ e hey kuru baba (20), tanga tyīmit naga, ko ba ka wuna ɛ ngyāma sede bevow na lyop na colom tanga cóngot wɛt.

²⁴Ano kwong, Sɔlɔmɔn a re negwɔm e ra mwa sevwêl rwa batin na Gwɔrɔ̂t Ɛifaratɛs, yi e Tifsa pere wɔ̀ wul mɛ rwa ta vɔk mɛ e repomô Gaza. Mwa begwɔ̀m rwa ta na Ɛifaratɛs ba sè e vwɔ mɛ, ko a to sangal tyang na mwa bavwêl vwara mɛ.

²⁵Yaga ano, mwa BeYuda na BeIsrayɛl ba sangal tyang yi e yɛnɛ̂ vwel e rwa bato vɔk e rwa batin. Kawɛ mwat a tus cɔ́gɔt anap tanga yê regwi mɛ mwa jeng de Sɔlɔmɔn a sé kwen.

²⁶Sɔlɔmɔn a vɔk beduk gu kuru banaas (40,000) yaga bedwâ bekyɛkyɛ como tanga bedwâ suga gu kuru na vɛ baba (12,000).

²⁷Bedagwɔm vane kuru na vɛ beba (12), kawɛ a vɛ̀sɛ a Sɔlɔmɔn na pyɛ̂ re e pwɛl gwining, na yê mwa bemat de be re pyɛ́ tanga yɛ e ra tebut mɛ. Ba tɔk bidɛ pyɛ cak e pwɛl hwak wɛt.

²⁸Kawɛ dagwɔm a vɛ̀sɛ na baale tanga sehwey sehwogot yaga bedwa de ba hwɔlɔ bekyɛkyɛ tanga bwang bedwa mo behak arɔng. Kawɛ mo a vɛ̀sɛ mɛ, vɔk e kwɔn de ba tɛ̀ a yɛ.

²⁹Dagwi a ga nɔ̂ng Sɔlɔmɔn netsitsɛng ne ciwil tanga tɔ́k pyak sana yɛnɛ.

³⁰Sɔlɔmɔn a vɔk netsitsɛng a dal mɛ bemât netsitsɛ̂ng BeArap tanga BeMisra.

³¹A dal bemasi mwa na netsitsɛng, a dal mɛ Ɛtan WoƐzra, na Heman, na Kalkɔl, na Darda, yɛn a nèy Mahɔl. Reza mɛ ra shara hɛ vɔk e mwa bavwel de ba sé e vwara mɛ.

³²A yong cīnat ha gu batat (3,000) na lɛlɛ de ba dal gu rining.

³³A ha e ra yére cɔ́gɔt detidetu de ya tabas, yi e sída e berakû Lɛbanɔn vey mɛ na necɔgɔ̂t hísɔ̀p de na tabas e vwarâ duk. A to ha e ra ngyāma, na benon, na pyɛ̂ gabaga, tanga betɔk.

³⁴Begbɔng begwɔ̀m bavwel mwa jey ba wok rehâ netsitsɛng mɛ, ko yɛn a tomsal bemat, na be vey wok hɛ.