Read berom 1 Begwɔ̀m 5 Bible Online

1 Begwɔ̀m 5 - berom bible

1 Begwɔ̀m 5

¹Gbɔng Gwɔ̀m Hiram wo repomô Tur a kana vɔk nesa na Davit. Jeng de a wok, ba tɛ̀ a Sɔlɔmɔn negwɔm e tô da mɛ Davit, a vɛ̌ tomo betom mɛ vɔk na yɛ.

²Ko Sɔlɔmɔn a toyo na ha hemo vɔk na yɛ arɔng.

³A ye, “Hwà tɔk da hom Davit á tɔk lɔk Gbɔng Duk Re Fongol yaga Dagwi Darwey, Dagwi mɛ wɛt, yaga á vɔk bemât repugu pyak. Yaga ano, á sǎ e de tô como na bemât bavwel de ba rɔnɔ hɛ sɛ̌ jeng de Dagwi Darwey a nɔng ɛ wɛng e ra vê repugu mɛ mo.

⁴Ko me a remo, Dagwi Darwey, Dagwi hom, a ga vey na sangâl netyang e bavwel de ba rɔnɔ me. Ma vɔk bemât repugu de ba rɔda ba hwo me na yol wɛt.

⁵Dagwi Darwey á kana sira a da hom, a ye, ‘Hwey de ma rɔda tɛ̀, na he re negwɔm e to mō, ha rɔda ba lɔk gbɔng duk re a me fongol.’ Di a remo, ma ga yóng me, ma rɔda lɔk gbɔng duk, na be re a Dagwi Darwey, Dagwi hom fongol.

⁶Yaga ano, tik na hwo tomo bemat mō, na be wɔ̀ tów a me cɔ́gɔt e berakû Lɛbanɔn yaga fwom o. Bemat hom ba rɔda wuna hɛn na bemo. Me kwong mê tala hwo byɛ̂ pyɛ mwa de hwô tɛ̀ a me. Sede remo de hwà tɔk, bemat hom ba tɔk fwôm tôw cɔ́gɔt sede bemat min, BeSidɔn wɛt.”

⁷Jeng de Hiram a sey reha de Sɔlɔmɔn a ha, ko a vɔk yey pyɛng sizɔng, a ye, “Bē somo Dagwi Darwey de a nɔ̂ng Davit yerê hwey de ha vɔk netsitsɛng de he re negwɔm e to mɛ e ra gbɔng yere yane!”

⁸Ano kwong, Hiram a hwo tomo a Sɔlɔmɔn na ha wɔgɔ, “Ma ga sey reha mō. Di, ma sé e yong me, na me ra mwa pyɛ́ de hwà rangal o. Ma rɔda sɛ̀ a hwo cɔ́gɔt sida tanga yê fir o.

⁹Bemat hom ba rɔda vey na babîm cɔ́gɔt o yi e beraku mo vey e gworep. Ba rɔda tula vɛ, ko be rɔgɔs, na be tɛ̀ vɛ e ra nshi vey mɛ e rekwogom vɔk e kwɔn de hwà kasa. Ba rɔda vibis vɛ e hwomo ko bemat mō ba rɔda vɔk vɛ e vɔ mɛn. Bak o mwo wɛ à, hwà rɔda nɔngɔ̂s bemât lɔ hom pyɛ̂ re.”

¹⁰Ano kwong, Hiram a vɛ̀sɛ a Sɔlɔmɔn na mwa babîm cɔ́gɔt sida tanga fir de a simo.

¹¹Sɔlɔmɔn a tomsal a Hiram alkama tɔ̂n gu baba na rebit o (2,500) tanga shǐ masa něy pwat gu naga banaas (400,000)[2] kahɛ shey, na a re mɛ na bemat mɛ.

¹²Dagwi Darwey a nɔ̂ng Sɔlɔmɔn netsitsɛng sede remo de a sira a yɛ. Sangâl netyang ha sè e tê Sɔlɔmɔn na Hiram, ko yɛn a man nesa na bemɛn, ba ra gafiri arɔng.

¹³Gbɔng Gwɔ̀m Sɔlɔmɔn a tula bemat beras gu kuru batat (30,000) yi e mwa Israyɛl, na be ragas a yɛ fwôm retek.

¹⁴A tɛ̀ Adoniram a sè wo nuyel mɛn. A gas vɛ zang tat, kahɛ zang o ha sè gu kuru (10,000). Kahɛ gyɛng o ha ragas fwom pwɛl gwining e Lɛbanɔn, ko ha sangal pɛl ba e lɔ.

¹⁵Sɔlɔmɔn a to vɔk bemat beras gu kuru rwit (80,000) e berahwol, na be dak beta, ko bemat gu kuru bataama (70,000) ba gangas vɛ vey e kwɔ̂n lɔk gbɔng duk o.

¹⁶A tɛ̀ bemât nuyêl fwom o gu batat na naga betat (3,300).

¹⁷Tyɛng na redu Gbɔng Gwɔ̀m Sɔlɔmɔn, ba yongos bègbɔng beta berat o, ko ba tɛ̀ retîs Gbɔng Duk Re Fongol na vɛ.

¹⁸Bemât fwôm Sɔlɔmɔn na vê Hiram mwa na bemât fwom yi e repomô Biblɔs ba yong beta tanga cɔ́gɔt, na be lɔk mɛ Gbɔng Duk Re Fongol o.