Read berom 1 Begwɔ̀m 6 Bible Online

1 Begwɔ̀m 6 - berom bible

1 Begwɔ̀m 6

¹Neshey naga benaas na kuru rwit (480) na kwey e bama de BeIsrayɛl ba ga kana nusu yi e Misra. Gbɔng Gwɔ̀m Sɔlɔmɔn a hwo lɔk Gbɔng Duk Re Fongol Dagwi Darwey e shey hê naas e pwɛl Zif, gwɛ a pwɛl gwô neba gwô shey, gwô rê negwɔm mɛ.

²Nelîs gbɔng duk o na sé mita kuru batat (30), netes o mita kuru (10), ko nelis o vɔk e rak o mita kuru na vɛ betungun (15).

³Ba lɔk gàgbang de ba man na gbɔng duk o. Netes wɛ na sé tyɛng na ne duk o, ko nelis o na sé mita betungun.

⁴Ba tɛ̀ bapɔk e varâ duk o, bapɔk o ba sé betes e ji mo, ko ba sé ngyɔgɔdɔk e jey o.

⁵Ba to lɔk râng neduk e varâ duk o e jey tanga e bama mo, ko ba tɛ̀ nɛ e ra tɛ̂t bemɛn, ba lɔk nɛ nè vwel o, nè tē na nè yɛnɛ mo.

⁶Kawɛ duk e vwel o netês wɛ na sé mita beba na bit o, wo tē mita betat, ko wo tɛt o mita betat na bit o. Netîng varâ gbɔng duk o ne vwel o na dal ne vê tē mo na ne vê tala mo, yaga na beduk o be bin sangal gak, sana kulu vara mo na cɔ́gɔt gabeneng.

⁷Ba lɔk gbɔng duk o na beta de ba yong vɛ e kwɔ̂n dâk vɛ, yaga ano, ba ra fwom na remos kɛ tyem kɛ pyɛ fwom cak ye dyam e kwɔ̂n lɔk o wɛt.

⁸Rwi de ba kweres ɛ vɔk e neduk vwel o gwa sé e bak batin wo gbɔng duk o, ko gwa vɔk nekwɔn turus vɔk e neduk rak o wo neba tanga wo netat.

⁹E bama de ba yɛnɛ lɔ̂k varâ duk o, ba ye gyip a wɛ na babirîk cɔ́gɔt sída, ko ba lasha ɛ bebak cɔ́gɔt o.

¹⁰Nelîs karɛ râng neduk na sé mita beba na bit o vɔk e rak o. Ba lɔk ba man vɛ na vwarâ gbɔng duk o, ko ba wuna vɛ na babirîk cɔ́gɔt gabang yê sida.

¹¹Dagwi Darwey a yâng Sɔlɔmɔn,

¹²“Ka sede hwà gyeng mwa badu hom, ma rɔda ra a hwo tyɛng pyɛ de ma kana sira a da mō Davit.

¹³Ma rɔda sangal e ji duk rê fongol womo de hwà lɔk e tê bemat hom BeIsrayɛl, ko ma rɔda hala hɛn wɛt.”

¹⁴E bama de Sɔlɔmɔn a yɛnɛ lɔ̂k Gbɔng Duk Re Fongol o,

¹⁵a tɛ̀ be ngyɛrɛ bebak cɔ́gɔt bagasak e varâ duk o e ji mo yi e vwel vɔk e rak o. Ba yong retis o na cɔ́gɔt fir.

¹⁶Ba vɛ́ duk o e nu mo hê ji mo mita kuru, ba gas kwɔn o na bebak cɔ́gɔt bagasak vê sida, ko ba tɛ̀ hɛ, he se Kwɔn Jɛrɛ Hê Jɛrɛ.

¹⁷Nelis bwang duk o na sé mita kuru baba.

¹⁸Ba tsep bebak cɔ́gɔt o, ba tɔrɔ yɛ na negacɔng tanga cúyu, ba bang mɛ varâ duk o e ji mo, yaga bê kwon di beta de ba lɔk mɛ vɛ e ji mo.

¹⁹Ba yong duk ji mo mo, yaga na be tik ɛ Kundung Wuna-na-Sirâ Dagwi Darwey.

²⁰Nelîs wɛ na sé mita kuru, netes o mita kuru tanga nelis o vɔk e rak o mita kuru arɔng. Ba dak vara mo na celes dyam shinang. Ba to ra ano na duk jey o arɔng. Ba dul gwông yel vɔk e duk ji mo na ngyâng dyam shinang, ko ba tɛ̀ gàgbang rangâs pyɛ́ de ba yong na cɔ́gɔt sida, ba to dak na dyam shinang arɔng, ba tɛ̀ hɛ e nuyêl duk ji mo.

²²Ano kwong, ba dak mwa jî Gbɔng Duk Re Fongol o na dyam shinang mwa tanga gàgbang rangâs pyɛ́ arɔng.

²³Sɔlɔmɔn a tɛ̀, be tsep bekɛrup beba, na cɔ́gɔt pwat, na be tɛ̀ yɛ e Kwɔn Jɛrɛ Hê Jɛrɛ. Nelîs kawɛ kɛrup o na sé mita betungun.

²⁴Bekɛrup vane mo ba sé tyɛng e kawɛ bak, nerêy vɛ tanga yông vɛ arɔng. Kawɛ mo wa vɔk bafabak baba. Netês bafabak o yi e nu mo het vɔk e here na sé mita betungun.

²⁷Ba tyɛngrɛ vɛ e Kwɔn Jɛrɛ Hê Jɛrɛ, yaga na bafabak mɛn vê jey be ra varâ duk o, na bwang bafabak o baba be man na bemɛn e tē.

²⁸Ba dak bekɛrup o na dyam shinang arɔng.

²⁹Ba tɔrɔ varâ duk jey o tanga duk ji mo na cɔ́gɔt de ba tsep sede cɔ́gɔt tyet na cúyu tanga bekɛrup.

³⁰Ba dak retîs mwa duk o na dyam shinang arɔng.

³¹Ba tɛ̀ ri bà de ba yong na cɔ́gɔt pwat e rwi Kwɔn Jɛrɛ Hê Jɛrɛ. Ba yong rak rwi mo kwɔɔl sede gbang.[3]

³²Ba tɔrɔ ri mo na bekɛrup de ba tsep, na cɔ́gɔt tyet tanga cúyu. Ba dak pyɛ́ de ba tɔrɔ mo na dyam shinang.

³³Ba yong rwi yel vɔk e gbɔng duk o na cɔ́gɔt pwat arɔng,

³⁴ko ba tɛ̀ ɛ ri ba de bê tɔk gunus vɛ na cɔ́gɔt fir.

³⁵Ba to tɔrɔ vɛ na bekɛrup de ba tsep na cɔ́gɔt tyet tanga cúyu, ko ba to dak pyɛ́ mo na dyam shinang.

³⁶Ba tɛ̀ lala e nuyêl gbɔng duk o, ba lɔk vwara, ba rɔnɔ mɛ. Ba lɔk gwɛ, ba ngyɛrɛ beta de ba táng vɛ rang tat e ra bemɛn, ko ba lasha babit cɔ́gɔt sida e rak o, ba re mɛ nuyel na lɔk o vɔk e yɛnɛ mo.

³⁷Ba pɛrɛ lɔ̂k retîs Gbɔng Duk Re Fongol o e pwɛ̂l Zif e shey hê naas hê rê negwɔm Sɔlɔmɔn.

³⁸Ko ba yɛnɛ mwa lɔk o e pwɛ̂l Bul, gwɛ a pwɛl gwo rwit, e shey hê kuru na hɛ hining hê negwɔm o. Ba yɛnɛ fwom o tyɛng sede remo de ba yong ɛ. Sɔlɔmɔn a tɛ̀ neshey netaama e ji fwôm lɔk o.