Read berom 1 Begwɔ̀m 7 Bible Online

1 Begwɔ̀m 7 - berom bible

1 Begwɔ̀m 7

¹Sɔlɔmɔn a lɔk lɔ gwɔ̀m, ko a tɛ̀ neshey kuru na nɛ netat e de lɔ̂k hɛ.

²A lɔk gwofwam de ba tang gwɛ a Gwofwam Rehwôt Lɛbanɔn. Nelîs gwɛ na sé mita kuru batungun (50), netes o mita kuru baba na vɛ betungun (25), ko nelis o vɔk e rak o mita kuru na vɛ betungun (15). Ba tɛ̀ sesêk cɔ́gɔt sida ràng o naas, e kahɛ rwang o ba tɛ̀ kuru na yɛ tyungun. Sesêk cɔ́gɔt o ba gyerep babirik cɔ́gɔt sida kuru banaas na vɛ betungun, ko ba yong gwofwam o gyip na bebak cɔ́gɔt sida arɔng. Ba vo a kwɔn o rezâ “Gwofwam Rehwôt Lɛbanɔn” yaga sesêk cɔ́gɔt de ba yong na cɔ́gɔt sida.

⁴E ji vara hagat ba mo, ba tɛ̀ bapɔk, ba ngyɛrɛ bapɔk o ràng tat, ko kahɛ e ji bapɔk o ha bɛrɛng bemɛn.

⁵Ba tɛ̀ ri mo e nekwɔn netat, ba bɛrɛng bemɛn arɔng.

⁶Sɔlɔmɔn a to lɔk duk o hwak de ba tang wɛ a Duk Sesêk Cɔ́gɔt. Nelîs wɛ na sé mita kuru baba na vɛ betungun, ko netes o na sé mita kuru na vɛ betungun. Ba tɛ̀ a wɛ gàgbang, ko ba gyerep sɔrɔ̂ gàgbang o na sesêk cɔ́gɔt.

⁷A to lɔk Duk Gwofwa Negwɔm de be to tang wɛ a Duk Shɔt, yaga e hwomo de Sɔlɔmɔn a ragas ɛ shɔt. Ba ngyɛrɛ bebak cɔ́gɔt sida e varâ duk o mwa.

⁸A to lɔk lɔ̂ sangal mɛ e lala hak e bamâ Duk Shɔt o tyɛng sede hane mo. A to lɔk a hwā mɛ, hwông gbɔng gwɔ̀m Misra, lɔ mo mɛ tyɛng ano arɔng.

⁹Ba lɔk mwa nelɔ nane tanga lala rey na beta berat, ba pɛrɛ mɛ yi e retis o vɔk e ragyip o. Ba yong beta mo e kwɔ̂n dâk vɛ naka, ba hyulum vɛ na yerê wal yìn yông beta.

¹⁰Ba bomo retis o na beta berey o de nelîs behak na wul mita benaas na behak mita betungun.

¹¹Ba tɛ̀ beta mo behak de ba dak vɛ e ra vane mo mwa na babit cɔ́gɔt sida.

¹²Ba lɔk jwa, ba rɔnɔ mɛ gbɔng lalâ lɔ gwɔ̀m na hê nuyêl Gbɔng Duk Re Fongol tanga hê gàgbang o. Ba lɔk gwɛ, ba ngyɛrɛ beta ràng tat e ra bemɛn, ko ba lasha babit cɔ́gɔt sida e rak o, ba re mɛ nuyel na lɔk o vɔk e yɛnɛ mo.

¹³Gbɔng Gwɔ̀m Sɔlɔmɔn a tomo, be wɔ̀ vey a yɛ na Hiram de a sé mwât tɔ̂k fwôm dyam pama yi e Tur. Hiram o a sé hwêy kuma hwak yi e yerê Naftali, de kwɔ̌ rwas mɛ á sè yi e Tur, yɛ arɔng á kana se mwât fwôm dyam pama. Hiram a vɔk tɔk ko a to vɔk sekwɛl e fwom o. A vey, ko a ra a Sɔlɔmɔn mwa fwôm dyam pama.

¹⁵Hiram a yong sesêk pama bà de nelîs kagwɛ mo na sé mita shabetat, ko sede ba gwɔrɔ gèy bek o na rwik, gwa sé mita betyiimin.

¹⁶A to yong a kagwɛ swesek o bong de nelîs wɛ na sé mita beba na bit o.

¹⁷A tɔrɔ nû bong o na pyɛ̂ nzem de ba lɔk na ngyang tyaama.

¹⁸A to tɔrɔ nû kawɛ bong o na betan-gyirî pama beba sede nèy cɔgɔ̂t pomigiranet, naga e kawɛ tan-gyiri mo. A yong ratɛ̂t bong o, de nelîs rɛ ra sé mita beba, sede cuyu. Ba tɛ̀ sesek o e nuyêl gàgbang Gbɔng Duk Re Fongol. Ba tâng gwomo de gwa sé e vwɔ yege à Yakin (wɔgɔ, Dagwi a ga tòro), ko ba tâng gwo vwɔ mwɛlɛng à Bowas (wɔgɔ, na gâp Dagwi).

²³Hiram a to yong gwogbɔng gwopey dyam pama de ba tâng gwɛ a Gworep. Neciwil o na sé mita beba na bit o, nerêy gwɛ e ji mo na sé mita betungun, ko sede ba gwɔrɔ gèy bek o na rwik gwa sé mita kuru na vɛ betungun.

²⁴Ba yong negacɔ̂ng dyam pama, ba tɛ̀ mɛ̀ tan-gyiri e vwarâ nu mo zang ba, kuru e karɛ rebit mita. Ba yong na dyam jining o na gwopey o.

²⁵Ba to yong bemus dyam pama kuru na vɛ beba, ba ngyɛrɛ vɛ, ba tɛ̀ vɛ tibetat, be bɛrɛng rǎ naas ve jey, ko ba tik ɛ gwogbɔng gwopey o e rak o.

²⁶Netîng gwɛ na sé sede tas vwɔ. Nu mo ha sé gbey sede nû wáng, sede cuyu. Gwopey o gwô re betsûng nshi sede gu baba na naga betungun (2,500).

²⁷Hiram a to yong bekyɛkyɛ kuru vê dyam pama. Netes o tanga nelis o na sé tyɛng, mita beba, ko necik o na sé mita gwining na rebit o.

²⁸Ba yong vɛ tyɛng, ba tɛ̀ a vɛ bebak, ko ba de manas vɛ na begele de ba yong sede rwi duk, de ba to tɔrɔ vɛ na bazinâ rwîk cúyu. Ba tɔrɔ bebak o na bazina arɔng, bazinâ begukum na bemus rɔndɔng tanga bekɛrup.

³⁰Kawɛ kyɛkyɛ mo wa vɔk bol naas de ba man na begele. Mwa pyɛ́ mo ba yong na dyam pama. Ba to yong pyɛ́ nyaas sede bapik, ba tɛ̀ jining e kagwɛ kwɔng na ye gyerep pyɛ cak sede gwobing. Ba tɔrɔ yɛ̄ na bazinâ cúyu arɔng. Nelîs gwobing o na sé sɛntimita kuru bataama na vɛ betungun (75). Ba tɔrɔ gwobing o arɔng. Ba tòro gwɛ e ra bapik o e ji kyɛkyɛ mo, ko bwang o gwa sé e jey.

³²Negarang bol o vey e rak o na sé sɛntimita kuru bataama na ve betungun (75). Bol o na begelê vɛ ba sé e nɛn kyɛkyɛ, ko ba man begele mo na kyɛkyɛ mo.

³³Bol o ba sé sede bo bekyɛkyɛ̂ bedwa. Ba yong kawɛ bak bol o na begelê dyam pama arɔng.

³⁴Ba yong mwa pyɛ́ nyaas o de ya sé sede bapik na jining o na kyɛkyɛ mo.

³⁵Ba to yong tan-gyiri de nerey o na sé sɛntimita kuru baba na vɛ betungun (25), ko ba rɔnɔ mɛ nû kyɛkyɛ mo. Ba yong tan-gyiri mo na pyɛ̂ manas wɛ na dyam jining o na bebak kyɛkyɛ mo.

³⁶Ba tɔrɔ pyɛ́ de ya sé sede bapik o, mwa na bebak kyɛkyɛ mo, na bazinâ bekɛrup, na begukum tanga batîn tyet e kahɛ kwɔn de ba di ɛ pyol, ko ba gwɛ̌ bazinâ rwîk cúyu.

³⁷Gwong a gwane de ba yong mɛ bekyɛkyɛ mo. Nerey mɛn na sé nining o, ko yong o ha sé yerê hining o arɔng.

³⁸Hiram a to yong bapey kuru, hining yaga kawɛ kyɛkyɛ mo. Nerêy kagwɛ gwopey e ji mo na sé mita beba. Kagwɛ mo gwô re betsûng nshi sede kuru batungun (50).

³⁹A tik bekyɛkyɛ mo betungun e bak batô Gbɔng Duk Re Fongol o, ko a tik bwang betungun e bak batin. A tòro gwogbɔng gwopey o gwo bɛrɛng rwa rak.

⁴⁰Hiram a to yong bapêy paà fongôl kya na becebut tanga bèkɛt sɛ̂t nemi. A tala fwom mɛ mwa de a ra a Gbɔng Gwɔ̀m Sɔlɔmɔn yaga Gbɔng Duk Re Fongol. Pyɛ́ de a yong o a yet ngan: Bagbɔng babirîk dyam pama baba, Bebong beba de ba sé sede bèkɛt, de a tɛ̀ e ra bagbɔng babirik o, Bezen beba de a tɔrɔ mɛ nû kawɛ bong swesêk dyam pama mo, Nèy cɔ́gɔt pomigiranet ne dyam pama naga benaas (400) de ba tɛ̀ e ra betan-gyiri, a tɛ̀ nèy o e ra bezen o, na sé naga e kawɛ tan-gyiri mo, Bekyɛkyɛ kuru, bapey kuru, gwogbɔng gwopey, Bemus rɔndɔng kuru na vɛ beba de be gyerep gwopey o, Bapêy paà fongôl kya na becebut tanga bèkɛt sɛ̂t nemi. Hiram a yong a Gbɔng Gwɔ̀m Sɔlɔmɔn pyɛ́ yane mwa na dyam pama de ba rugut yɛ.

⁴⁶Ba yong yɛ̄ e kwɔ̂n secwem e tê Sukɔt na Zaretan e ji Nɛk Yɔrdan.

⁴⁷Pyɛ́ mo ya kat hyɔt. Yaga ano, Sɔlɔmɔn a ka tɛ̀ be masa nedirik yɛ̄ wɛt. A sé ano de ba ka tɔk nedirîk dyam pama de ba ra mɛ fwom o wɛt.

⁴⁸Sɔlɔmɔn a to tɛ̀ be yong pyɛ́ mo cak na dyam shinang yaga Gbɔng Duk Re Fongol o, yɛ a yet ngan: Kwɔ̂n rangas pyɛ̂ nesang hyɔɔlɔl, na tebut kpam-tuk de be nása a Dagwi, Pyɛ̂ tikîs bekywa-kya kuru yemo de ba tik yɛ e nuyêl Kwɔn Jɛrɛ Hê Jɛrɛ — ba tik tyungun e rwa batin ko tyungun e rwa bato, Cúyu na nekwɔn kaba bekywa-kya tanga bekabra, Bekwôp, na pyɛ̂ rimi kyâ kywa-kya, na bèkɛt sɛ̂t nemi, na begance tanga bapêy cilâ kya, Bedyam vɔ̂k ri duk Kwɔn Jɛrɛ Hê Jɛrɛ tanga ve ri jey ve Gbɔng Duk Re Fongol. Mwa pyɛ́ yane ba yong yɛ na dyam shinang.

⁵¹Bama de Gbɔng Gwɔ̀m Sɔlɔmɔn a ga tala mwa fwôm lɔ̂k Gbɔng Duk Re Fongol, a vey mɛ na pyɛ́ mwa de da mɛ Davit a kana nára a Dagwi Darwey yaga gbɔng duk o. Ba tɛ̀ dyam shinang na dyam pyɛng tanga bwang pyɛ́ mo cak e ji beduk tikîs pyɛ́ vê Gbɔng Duk Re Fongol o.