Read berom 1 Begwɔ̀m 8 Bible Online

1 Begwɔ̀m 8 - berom bible

1 Begwɔ̀m 8

¹Gbɔng Gwɔ̀m Sɔlɔmɔn a rini bemakûk BeIsrayɛl tanga mwa bemât nuyêl yére na rùhup na be vey na yɛ e Yɛrusalɛm, na a wɔ̀ jut Kundung Wuna-na-Sirâ Dagwi Darwey yi e Repomô Davit, de be to tang rɛ a Siyɔn, na be vey mɛ e ji Gbɔng Duk Re Fongol.

²Bemat o mwa ba vey tula hɛn e nuyêl Gbɔng Gwɔ̀m Sɔlɔmɔn e jeng nzem e pwɛl Ɛtanim, gwɛ à pwɛl gwô netaama.

³Jeng de mwa bemakûk BeIsrayɛl ba ga tula hɛn, bepiris ba jut kundung o,

⁴ba kyè mɛ vɔk e Gbɔng Duk Re Fongol. Yɛn tanga BeLevi ba jut bûk sangâl Dagwi tanga pyɛ̂ fwom o mwa vɔk e Gbɔng Duk Re Fongol o arɔng.

⁵Gbɔng gwɔ̀m tanga mwa regyɛng BeIsrayɛl ba tula hɛn e nuyêl Kundung Wuna-na-Sira, ba nása nenɔrɔ̂ vyēl na berɔndɔng pyak vɔk na Dagwi. Nepyak yɛ na sé vit à bara.

⁶E bama mo, bepiris ba yel na kundung o e ji Gbɔng Duk Re Fongol o, ko ba tik gwɛ e Kwɔn Jɛrɛ Hê Jɛrɛ, e nɛ̂n bafabâk bekɛrup.

⁷Bafabak o ba ye gyip a kundung o tanga begele de be jurus mɛ gwɛ.

⁸Begele mo ba sé belis o; mwat de e tumal e nuyêl Kwɔn Jɛrɛ Hê Jɛrɛ zɔng de e tɔk di nenu vɛ, ko be tɔk di vɛ yi e jey wɛt. Begele mo ba rɔngɔl e hwomo vey e remo.

⁹Vit a pyɛ cak e ji kundung o sɛ̌ beta bagasak vane beba de Mose a kana tɛ̀ e ji mo. A kana sey vɛ e Raku Hɔrɛp, e jeng de Dagwi a wuna hɛ na sira na BeIsrayɛl, e bama de yɛn a ga nusu yi e Misra.

¹⁰Jeng de bepiris ba sé nusu hɛn yi e Gbɔng Duk Re Fongol o, ko wut wa vɛ̌ yi, wa ye ship a duk o.

¹¹Bepiris o ba tɔk re nuyel na râ fwom mɛn wɛt, yaga nedyɛt gbɔng nerât Dagwi Darwey na sila duk o.

¹²Ko Sɔlɔmɔn a hwo ra won, a ye, “À Dagwi Darwey, hwà kasa na hwo sangal e ji wut.

¹³A remo, ma ga lɔk a hwo gbɔng duk wo nerey, kwɔn de hwà rɔda sangal ɛ gbak-gbak.”

¹⁴Sede remo de BeIsrayɛl mwa ba tumal e hwomo, ko Gbɔng Gwɔ̀m Sɔlɔmɔn a doyo bayis vɔk na yɛn, a tɛ̀ a yɛn nerat.

¹⁵A ye, “Bē somo Dagwi Darwey, Dagwî BeIsrayɛl, de a sila pyɛ de a ga sira a da hom Davit.

¹⁶Jeng de Dagwi a nusu na bemat mɛ yi e Misra, a ye, a kana kasa gbɔng repomo rehak e ji sevwêl Israyɛl de ba rɔda lɔk a yɛ ɛ gbɔng duk, na be re a yɛ ɛ fongol wɛt. Ko a kasa Davit na a re negwɔm e ra bemat mɛ BeIsrayɛl.”

¹⁷Sɔlɔmɔn a re nuyel na ha, a ye, “Da hom Davit a kana yong ɛ, a rɔda lɔk Gbɔng Duk Re Fongol, na be re a Dagwi Darwey, Dagwî BeIsrayɛl ɛ fongol.”

¹⁸Ko Dagwi Darwey a yang ɛ, a jam de a simo a lɔk a yɛ Gbɔng Duk Re Fongol,

¹⁹ko a sé e yɛ de a rɔda lɔk wɛ wɛt. E hwey mɛ de ha rɔda ba lɔk wɛ.

²⁰“Di in, Dagwi Darwey a ga sila ha mɛ. A remo, ma sé sangal e ra gwofwa negwɔm o, ma sé re negwɔm Israyɛl, ko ma ga lɔk Gbɔng Duk Re Fongol yaga Dagwi Darwey, Dagwî BeIsrayɛl.

²¹Ma ga to yong kwɔn e ji gbɔng duk o yaga Kundung Wuna-na-Sira. E ji mo, ba tik ɛ beta bagasak de ba jɛk ɛ rehâ sirâ Dagwi Darwey na bedabeda mot, jeng de á pat ɛn yi e Misra.”

²²Sɔlɔmɔn a wɔ̀ tumal e nuyêl gàgbang rangâs yas e bayis bemat mwa, a nára vɔ mɛ vɔk e lagwi,

²³a ra won ngan: “À Dagwi Darwey, Dagwî BeIsrayɛl, vit a dagwi hwak e ji lagwi kɛ e ji jey de ba rɔda tyɛngrɛ hɛ na hwo! Hwó sila sira de hwà ga wuna na bemat mō, hwó tɛ̀ yey na bemat mō vemo de be raa hwo na yey mɛn mwa.

²⁴Hwà ga gyeng ha de hwà kana sira a sam mō, da hom Davit. Di, yunung hwà ga sila kahɛ ha.

²⁵A remo, à Dagwi Darwey, Dagwî BeIsrayɛl, sila ha hemo de hwà sira a da hom arɔng. Hwà ye, sede nèy mɛ na gyeng badu mō, tyɛng sede remo de yɛ a ra, ko gwining e ji nɛ ê dopse re negwɔm BeIsrayɛl kayɛ jeng.

²⁶À Dagwi wo Israyɛl, tik na kahɛ ha de hwà kana sira a sam mō Davit he sila.

²⁷“Ko hwo, à Dagwi, lagwi rwey wo rak o wa ka vey a hwo wɛt. Ko e rɛ̌ de hwô tɔk sangal e ji jey yemo na e ji Gbɔng Duk Re Fongol womo de ma lɔk ɛ?

²⁸Ko mwa ano, à Dagwi Darwey, Dagwi hom, wok won hom, wet betong na won hom. Me sam mō ma sé vey na won hom e nuyel mō yunung.

²⁹Bɛrɛng Gbɔng Duk Re Fongol kayɛ jeng, naturuk na nagwi! Kwɔn hemo de hwà kasa, na be dopse re a hwo ɛ fongol. Wok won hom, jeng de ma doyo bayis hom vey e wɛ, ma sé ra won.

³⁰Wok won hom na hê bemat mō BeIsrayɛl. Jeng de wot a doyo bayis vey e ngamo, wok ot, e kwɔ̂n sangal mō e lagwi, na hwo hala a wot banɛn mot.

³¹“Ka sede mwat e tono renɛn de ba ye, a ra a mumwɛ, sede ba vey na yɛ, na be nɔng ɛ sira e nuyêl gàgbang rangâs yas e ji duk womo,

³²ko tik na hwo wok yi e lagwi, na hwo yɛrɛ shɔt. Tala mwât renɛn o pyɔlɔ mɛ, ko hwo hàla mwât tsak o.

³³“Ka sede bemat mō BeIsrayɛl ba kyɛ́ ɛn nà raa ha mō, ko ba re ɛn e como, ko ka sede yɛn a doyo vey na hwo, ba tɔk o sede darwey mɛn, ba ra won, na hwo hala a yɛn banɛn e ji duk womo,

³⁴ko tik na hwo wok ɛn yi e lagwi. Hàla a yɛn banɛn mɛn, na hwo toyo na yɛn vey e ji sevwel semo de hwà kana nɔ̂ng bedabeda mɛn.

³⁵“Ka sede bemat mō ba kyɛ́ ɛn nà raa ha mō, ko hwà ró na rwak, ko ka sede yɛn a doyo yi e banɛn mɛn, ba tɔk o sede darwey mɛn, yɛn a doyo bayis mɛn vey e duk womo, ba ra won,

³⁶ko tik na hwo wok ɛn yi e lagwi. Hàla banɛ̂n gbɔng gwɔ̀m tanga vê BeIsrayɛl. Basa a yɛn pyɛ́ de ya sé tyɛng. Ano, à Dagwi Darwey, tomo na rwak e ra sevwel mō semo de hwà nɔ̂ng bemat mō, na se sè semɛn.

³⁷“Ka sede vyong kɛ tumbang wa hwo, kɛ pyɛ́ ya lashe hɛ yaga gûl rak gwa pɛl, kɛ bekǔt ba lashe yɛ, kɛ rawal wa re yɛ, kɛ bemât repugu mɛn ba vey jugu, kɛ serɔ sa vey e tɛ̂ yɛ,

³⁸ko tik na hwo wok won mɛn. Sede hwak e ji bemat mō BeIsrayɛl a yel e reyɔm, ko a nára vɔ mɛ vey e duk womo,

³⁹wok won na won mɛ e ji kwɔ̂n sangal mō e lagwi. Hàla a yɛ, na hwo to sɛlɛ hɛ. Ko tala kawɛ mwat tyɛng na pyɛ de a ra yaga hwà tɔk yey mɛ. Ey mwin, hwo wɛ nju mo hwà tɔk yêy mwasi.

⁴⁰Ano de bemat mō ba rɔda ba ra tyɛng pyɛ de hwà ha a yɛn, ba rɔda wok ha mō kayɛ jeng de yɛn a sé na sangal e sevwel de hwà ga nɔ̂ng bedabeda mot.

⁴¹“Jeng de ba rɔda rèmo gbɔng reza mo na pyɛ́ de hwà ra na gbɔng reto mō, bemat beduk ba rɔda wok. Ano kwong, ka sede mwat hwak de a sé WoIsrayɛl wɛt a vey yi e vwel hak yikyik, na a ra won vey e duk womo,

⁴²

⁴³ko tik na hwo wok won mɛ e ji kwɔ̂n sangal mō e lagwi, na hwo to nɔng ɛ pyɛ de a ra won o. Ano de bemât jey mwa bê tɔk o, na be sap o, sede bemat mō BeIsrayɛl. Yɛn a rɔda to tɔk, ma lɔk Gbɔng Duk Re Fongol womo, na wo se kwɔn de be re a hwo ɛ fongol.

⁴⁴“Ka sede hwà tɛ̀ bemat mō ba wɔ̀ to como na bemât repugu mɛn, ko ba sé ra won e kwɔn de ba sé ɛ, be bɛrɛng gbɔng repomo remo de hwà kasa, tanga gbɔng duk womo de ma lɔk yaga hwo,

⁴⁵ko tik na hwo wok won mɛn, na hwo nɔng ɛn wɛng.

⁴⁶“Vit a mwat de a sé sana ra banɛn. Ko ka sede bemat mō ba ra a hwo banɛn, ka hwà tɛ̀ shom na yɛn, hwà tik ɛn bemât repugu mɛn be re ɛn e como, be hashe hɛn vɔk e sevwel sehak yikyik, na be tɛ́ ɛn besam.

⁴⁷Ko ka sede e hwomo yɛn a tosho gabɔk na tsak o, ba kulsa banɛn mɛn, ba doyo vey na hwo na yey rining, ko yɛn a doyo bayis mɛn, be ra won be bɛrɛng vey e sevwel semo de hwà ga nɔ̂ng bedabeda mot, na gbɔng repomo remo de hwà ga kasa, tanga gbɔng duk womo de ma ga lɔk a hwo.

⁴⁸

⁴⁹Tik na hwo wok won mɛn e ji kwɔ̂n sangal mō e lagwi, na hwo tosho reyɔm mɛn.

⁵⁰Hàla a yɛn banɛn o tanga nekashalang mɛn de ba vɔk e ra hwo. Hwo tik bemât repugu mɛn be tak a yɛn wɛt, ko be vɔk ɛn na nehywɛ.

⁵¹Yɛn a sé bemat mō, vemo de hwà kana nusu mɛ yi e Misra, kwɔn de ba sɔ ɛ rezot sede e ji kya.

⁵²“À Darwey, Dagwi Darwey, tik na hwo bɛrɛng bemat mō BeIsrayɛl tanga me, gbɔng gwɔ̀m mɛn. Wok won mot kayɛ jeng de wot a ra wôn sɛlɛ na hwo.

⁵³E hwo de hwà kasa hot yi e ji yére bemât jey mwa, na wot a tɛ́ ot bemat mō. Pyɛ ma yemo de hwà ha yi na sam mō Mose, jeng de hwà nusu na bedabeda mot yi e Misra.”

⁵⁴E bama de Sɔlɔmɔn a yɛnɛ râ won vɔk na Dagwi Darwey, a tumal e nuyêl gàgbang rangâs yas, kwɔn de a kana sè ye ɛ guduruk na vɔ mɛ de a nára e gwi.

⁵⁵A tɛ̀ a BeIsrayɛl mwa de ba tula hɛn e hwomo nerat, a moklo na gbɔng fwɔ, a ye,

⁵⁶“Bē somo Dagwi Darwey de a ga nɔ̂ng bemat mɛ sangâl netyang, sede remo de a ga ha. A ga gyeng sira mɛ hemo de a kana ha yi na sam mɛ Mose.

⁵⁷Tik na Dagwi Darwey, Dagwi mot, a sè tanga wot, sede remo de a kana sè tanga bedabeda mot. Yɛ a kwon tik ot, kɛ a ye waa a hot wɛt.

⁵⁸Tik na yɛ a tɛ̀, wot a raa ha mɛ, na wot a sangal sede remo de yɛ a nɔng ot nu, na wot a gyeng mwa badu de a kana nɔ̂ng bedabeda mot.

⁵⁹Tik na Dagwi Darwey, Dagwi mot, a bare na won hom, na won de ma ra a yɛ kayɛ jeng. Tik na yɛ a bɛrɛng me, sam mɛ, tanga yin, de wot a sé bemat mɛ, na nemwishish, na a nɔng ot pyɛ de wot a bidɛ kahɛ tuk.

⁶⁰Ano de yére bemât jey mwa ba tɔk, Dagwi Darwey nju mɛ de a sé Dagwi, vit a hwak sɛ̌ yɛ zɔng.

⁶¹Tik na yin sangal pang na Dagwi na yey rining, na yin to gyeng mwa badu mɛ, sede remo de yin a sé ra yunung.”

⁶²Bama mo, Gbɔng Gwɔ̀m Sɔlɔmɔn tanga mwa BeIsrayɛl ba nása nenɔrɔ̂ yas de be yɛt vɔk na Dagwi.

⁶³Gbɔng gwɔ̀m o a nára nenɔrɔ̂ wunâ nesa vɔk na Dagwi Darwey, a nára berɔndɔng gu kuru baba na vɛ baba (22,000), na vyēl gu naga na yɛ gu kuru baba (120,000). Yi ano, gbɔng gwɔ̀m tanga mwa BeIsrayɛl ba tik Gbɔng Duk Re Fongol jaram yaga Dagwi Darwey.

⁶⁴Remo de gàgbang rangâs yas wo dyam pama de wa sé e nuyêl rwi duk o wa sé swɛl o tyɔng wɛt, ko ba tɔk rangas ɛ mwa nenɔrɔ mo wɛt. Ano kwong, e tuk hane, Sɔlɔmɔn a to tik majey de wa sé e nuyel Gbɔng Duk o jaram. E hwomo de a nára ɛ nenɔrɔ̂ yas burang, na ne nemuk, tanga sebwêp yas de ba yɛt yaga nenɔrɔ̂ wunâ nesa.

⁶⁵E jeng o, Sɔlɔmɔn tanga mwa BeIsrayɛl ba ra Nzem Bǔk pɔlɔ taama.[4] Bemat pyak zá wɛt ba vey yi e mwa sevwel Israyɛl, yi e Lebo-Hamat e rwa bato vɔk e rɔt de ha sé yɛnɛ̂ vwel Misra e rwa batin, ko ba tula hɛn e nuyêl Dagwi Darwey, Dagwi mot.

⁶⁶E pɔlɔ hê rwit, Sɔlɔmɔn a tɛ̀ bemat o e gwong. Bemat o ba somo hɛ, yɛn a kaba begwong vɔk e nelɔ mɛn na yey pyɛng. Yɛn a feng yaga nerat de Dagwi Darwey a tɛ̀ a sam mɛ Davit tanga bemat mɛ BeIsrayɛl.