Read berom 1 Begwɔ̀m 9 Bible Online

1 Begwɔ̀m 9 - berom bible

1 Begwɔ̀m 9

¹Bama de Gbɔng Gwɔ̀m Sɔlɔmɔn a ga yɛnɛ lɔ̂k Gbɔng Duk Re Fongol na lɔ gbɔng gwɔ̀m tanga mwa pyɛ́ de a simo a lɔk,

²ko Dagwi Darwey a to dura to mɛ na yɛ, sede remo de á kana ra e Gibɛyɔn raane.

³A yang ɛ, “Ma ga wok won mō de hwà ga vey na me. Ma tik gbɔng duk womo de hwà ga lɔk jaram yaga me. Wô se kwɔn de bê re a me ɛ fongol gbak-gbak. Ma rɔda bɛrɛng wɛ, mê gyeng wɛ kayɛ jeng.

⁴Ko hwo, ka sede hwô raa me cik na yey mō mwa, sede remo de da mō Davit a kana ra, na hwo gyeng badu hom na tsak o, na hwo ra kayɛ pyɛ de ma kana nɔng o nu,

⁵ko ma rɔda gyeng ha hom de ma kana sira a da mō Davit wɔgɔ, bê bidɛ mwat yi e yere mɛ de ê re negwɔm Israyɛl wɛt.

⁶Ko ka sede hwo kɛ yére mō, yin a doyo yi na mɛ, ko yin a kyɛ́ in nà gyeng badu hom, vemo de ma ga nɔng in, na yin a to re a cī fongol,

⁷ko mê pat bemat hom BeIsrayɛl yi e sevwel de ma ga kana nɔng ɛn. Ma rɔda to ye waa a Gbɔng Duk Re Fongol womo de ma ga kana tik wɛ jaram, na wo sè kwɔn de bê re a me ɛ fongol. Bemat e kagwa bê shɛgɛsh BeIsrayɛl, na be byɛs ɛn arɔng.

⁸Gbɔng Duk Re Fongol womo wa rɔda tɛ́ ɛ bagwɔ̂t barin,[5] ko kawɛ mwat de ê kwey, ê langat hɛ, ê ye cwɛ̀ɛp. A rɔda ye, ‘Yaga sɛ́ de Dagwi Darwey a ra ano na sevwel semo tanga duk rê fongol womo ano ɛ?’

⁹Bemat ba rɔda toyo na ha wɔgɔ, BeIsrayɛl ba tik nà raa Dagwi Darwey, Dagwi mɛn, de a nusu na bedabeda mɛn yi e Misra. Yɛn a nɔng tó mɛn vɔk na cī, ba re a yɛ fongol, yaga ano de Dagwi Darwey a ga vey na mwa rezot remo e ra yɛn.”

¹⁰Gbɔng gwɔ̀m Tur, Hiram wɛ de a nɔngɔ̂s Sɔlɔmɔn mwa cɔ́gɔt sida na bwang cɔ́gɔt tanga mwa dyam shinang de a simo yaga fwôm lɔk mɛ. Sɔlɔmɔn a tɛ̀ neshey kuru baba e de lɔ̂k Gbɔng Duk Re Fongol tanga lɔ gbɔng gwɔ̀m. Bama de fwom o gwa yɛnɛ hɛ, Gbɔng Gwɔ̀m Sɔlɔmɔn a nɔ̂ng Hiram bapomo kuru baba e bak vwêl Galili.

¹²Jeng de Hiram a wɔ̀ di vɛ, a simo vɛ wɛt.

¹³Ko a yâng Sɔlɔmɔn, “À gwà hom, sɛ̌ yere vê bapomo a vemo de hwà nɔng me ano ɛ?” Ko a yila bak vwel wane mo à Kabul,[6] yaga a bare, bak o wa sé yapyi.

¹⁴Hiram a ga kana tomo a Sɔlɔmɔn na dyam shinang de ya dal kilo gu banaas (4,000).

¹⁵Sɔlɔmɔn a lɔk Gbɔng Duk Re Fongol, na lɔ gbɔng gwɔ̀m, e ra tas de ba tang wɛ a Milo, tanga jwa de ba rɔnɔ mɛ repomo mo na fwôm retek. A gwɛ ra fwom na retek, na a lɔk mɛ bapomô Hazor, na Megido tanga Gɛzɛr.

¹⁶Gbɔng gwɔ̀m Misra a ga kana hwo e ra repomô Gɛzɛr o, a re rɛ na como, a mɔbɔs bemat o, a vɛ̌ tɛ̀ kya e rɛ. Bama mo a de nɔng rɛ e nɔrɔ na a kyɔk mɛ hwóng mɛ, jeng de a nɔ̂ng Sɔlɔmɔn hɛ.

¹⁷Sɔlɔmɔn a to de lɔk rɛ. Sɔlɔmɔn o a to lɔk Bet-Hɔrɔn,

¹⁸na Baalat, na Tamar e hêy Yuda,

¹⁹na bapomo de a tikis ɛ pyɛ̂ re mɛ, na bedwa na bekyɛkyɛ̂ como mɛ, tanga kayɛ pyɛ de a simo a lɔk e Yɛrusalɛm na Lɛbanɔn tanga e kahɛ kwɔn e ji sevwêl negwɔm mɛ.

²⁰Sɔlɔmɔn a tɛ̀ yére BeKanaan vemo de BeIsrayɛl ba kana tɔk wey na yɛn wɛt, jeng de ba sey ɛ sevwel mɛn, be ra fwôm retek. Yɛn vɛ à BeAmɔr, na BeHiti, na BePɛrizi na BeHivi tanga BeYebus. Yére mɛn ya re nuyel na râ fwôm sesam vey e jeng yemo.

²²Ko Sɔlɔmɔn a tɛ̀ BeIsrayɛl ba ra fwôm sesam wɛt. Yɛn a ra a yɛ fwom sede bemât como, na bemât nuyêl bemât como, na bemât nuyêl bekyɛkyɛ̂ como mɛ tanga besuga na bemât bedwa.

²³Sɔlɔmɔn a tɛ̀ bemât nuyêl fwôm retêk naga betungun na kuru batungun (550) e nekwɔn fwôm lɔk mɛ detidetu.

²⁴Hwâ Sɔlɔmɔn, hwông gbɔng gwɔ̀m Misra, a sɛk yi e Repomô Davit vɔk e lɔ de rwas mɛ a lɔk a yɛ. E bama mo, Sɔlɔmɔn a lɔk e ra tas de ba tang wɛ a Milo.

²⁵Sɔlɔmɔn a nása nenɔrɔ̂ yas burang tanga nenɔrɔ̂ wunâ nesa zang tat e shey. A rangas nenɔrɔ mo vɔk na Dagwi e ra gàgbang rangâs yas de a lɔk a Dagwi Darwey. Ano de ba ra fwom na Gbɔng Duk Re Fongol o tyɛng na bare de ba vɔk yaga wɛ.[7]

²⁶Gbɔng Gwɔ̀m Sɔlɔmɔn a to lɔk begbɔng bedwa-nshi. Ba lɔk vɛ e Ɛziyɔn-Gɛbɛr de wa sé bagat na Elat, e rekwogôm Rep Swinang e sevwel Ɛdɔm.

²⁷Gbɔng Gwɔ̀m Hiram a tomo bemat de ba ga tɔ́k ɛn na fwôm dwa-nshi yi e bedwa-nshi mɛ, na be ba ra fwom tanga bemât Sɔlɔmɔn.

²⁸Yɛn a kyè vɔk e sevwêl Ofir, ba wɔ̀ toyo a Sɔlɔmɔn na dyam shinang de nedirik o na dal kilo gu kuru na vɛ banaas (14,000).