Read berom 2 Begwɔ̀m 1 Bible Online

2 Begwɔ̀m 1 - berom bible

2 Begwɔ̀m 1

¹Bama rekû Ahap, gbɔng gwɔ̀m Israyɛl, bemât sevwêl Mowap ba kyɛ́ ɛn nà raa Israyɛl.

²Tuhak, Ahaziya, gbɔng gwɔ̀m Israyɛl, a gaba yi e ragyip duk lɔ gwɔ̀m mɛ e Samariya, a pere wɔ mǎ hɛ ding-ding. A tomo betom mɛ behak, na be wɔ e Ɛkrɔn, repomô BeFilisti. A ha a yɛn, be wɔ rangal a yɛ Baal-Zɛbup, ci repomo mo, na a bin tɔk, kɛ gyeng a rɔda tɛ̀ tyɛng, kɛ e rɛ̌ ow. Ko tom-lagwî Dagwi Darwey a nɔ̂ng Eliya, zarap Dagwi, yi e Tishbe nu, na a wɔ man na betom Ahaziya, na a bin rangal hɛn wɔgɔ, “Vit a Dagwi e Israyɛl, de yin ê wɔ rangâl Baal-Zɛbup, ci Ɛkrɔn arɛt?

⁴Ha in a gbɔng gwɔ̀m wɔgɔ, Dagwi Darwey a ye, a rɔda sogo yi e gwat gwomo mo wɛt, a rɔda ku ɛ!” Eliya a ra pyɛ de Dagwi Darwey a ha a yɛ.

⁵Jeng de betom gbɔng gwɔ̀m ba toyo vɔk na yɛ, a hwo rangal hɛn, a ye, “Ala de yin a toyo hin ɛ?”

⁶Yɛn a toyo a yɛ, ba ye, “Wot a man na mwat de a ha a wot, wot toyo vɔk na gbɔng gwɔ̀m de a tomo hot, na wot ha a yɛ ngan: ‘Dagwi Darwey a ye: Vit à Dagwi e Israyɛl de hwà tomo, be wɔ rangal a hwo yi na Baal-Zɛbup, ci Ɛkrɔn arɛt? Yaga ano, hwà rɔda sogo yi e gwat o wɛt, hwà rɔda ku ɛ.’ ”

⁷Ahaziya a rangal hɛn, a ye, “Mwat o a sé e rɛ̌?”

⁸Yɛn a yang ɛ, “Mwat o a tɛ̀ rugu na bahwô yas, a rɔgɔs gyindî rehwo e rawit mɛ.” Ahaziya a ye, “A sé e Eliya à wane!”

⁹Ko a hwo tomo mwât nuyel como na bemât como kuru batungun, na be wɔ jut Eliya. Yɛn a pom ba sɛ̀ ɛ, a sé sangal e raku hwak, ko mwât nuyel a yang ɛ, “À mwât Dagwi, gbɔng gwɔ̀m a ye, hwo gyirik, var a wot!”

¹⁰Eliya a toyo a yɛ, a ye, “Ka sede ma sé mwât Dagwi, Dagwi a tɛ̀ kya, he gyirik yi e lagwi, na he re o tanga bemat mō!” Remo-remo, kya ha gyirik yi e lagwi, ha re mwât nuyel como mo tanga bemat mɛ mwa.

¹¹Ahaziya a to tomo mwât nuyel o hwak tanga bemat behak kuru batungun, na be wɔ̀ jut Eliya. Mwât nuyel a yang ɛ, “À mwât Dagwi, gbɔng gwɔ̀m a ye, hwo gyirik remo-remo! Var a wot!”

¹²Eliya a yang ɛ, “Ka sede ma sé mwât Dagwi, tik na kya he gyirik yi e lagwi, na he re o tanga bemat mō!” Remo-remo, Dagwi a tɛ̀ kya ha gyirik yi e lagwi, ha re ɛn mwa.

¹³Ahaziya a to tomo mwât nuyel o hwak tanga bemat kuru batungun. Yɛ kwong a tut vɔk e raku mo, a di Eliya, a gaba guduruk e ra bakwot mɛ, a ra won na yɛ, a ye, “À mwât Dagwi, gabɔk wɛt, tosho reyɔm hom tanga bemat hom! Tik ot beken.

¹⁴Kya ha ga re bemât nuyel como vane beba, ba ga wey tanga bemat mɛn. Gabɔk, tosho reyɔm hom.”

¹⁵Tom-lagwi wo Dagwi Darwey a yâng Eliya, “Gyirik tanga yɛ, hwo kwon wok bengyip wɛt.” Ano kwong, Eliya a gyirik tanga yɛ, yɛn a kyè wɔ na gbɔng gwɔ̀m.

¹⁶Jeng de ba pom, Eliya a yâng Ahaziya, “Di, Dagwi Darwey a ye: Vit a Dagwi e Israyɛl de hwà tomo, be wɔ rangal a hwo yi na Baal-Zɛbup, ci Ɛkrɔn arɛt? Yaga ano, hwà rɔda sogo yi e gwat o wɛt, hwà rɔda ku ɛ.”

¹⁷Ahaziya a ku tyɛng na ha de Dagwi Darwey a ha e nû Eliya. A kana vɔk hwey wɛt, yaga ano, gwà mɛ Yɔram a re negwɔm e to mɛ. A hwo re negwɔm o e shey hê neba de Yɛhɔram Yɛhɔshafat a sè re negwɔm Yuda.

¹⁸Bwang pyɛ́ de Ahaziya a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.