Read berom 2 Begwɔ̀m 11 Bible Online

2 Begwɔ̀m 11 - berom bible

2 Begwɔ̀m 11

¹Jeng de Ataliya, nêng Ahaziya, gbɔng gwɔ̀m Yuda a wok, ba ga mɔrɔ sɔ mɛ, a vɛ̌ nɔng nu, be mɔbɔs belɔ gwɔ̀m mwa.

²Ko Yɛhɔshɛba, gwà Ahaziya, yɛ hwông Yɛhɔram, a jut kekwey kwɔ̌ Ahaziya mo de ba tang kɛ à Yowash. A wulu hɛ mɛ, a wɔ lɛrɛ kɛ tanga lwêk kɛ e keduk kehak e ji Gbɔng Duk Re Fongol. Yaga ano de Ataliya a mɔrɔ hɛ wɛt.

³Yɛhɔshɛba a bɛrɛng hɛ neshey netyiimin e ji Gbɔng Duk Re Fongol o. E jeng o, Ataliya a sè re negwɔm.

⁴E shey hê taama, Yɛhɔyada, piris, a hwo tomo, be wɔ yishi bemât nuyêl gyêng begwɔ̀m tanga vê bemât gyêng lɔ gwɔ̀m, na be vey e Gbɔng Duk Re Fongol. A yong ɛ na yɛn, ko a tɛ̀ ɛn ba sira e hwomo e ji lɔ Dagwi Darwey. E bama mo, a dura a yɛn Yɔwash, hwêy Gbɔng Gwɔ̀m Ahaziya,

⁵ko a nɔng ɛn nu, a ye, “Sede yin e ba vey fwom Tuk Shábat, gas in bagyɛng min batat. Regyɛng o rining rê bɛrɛng majey lɔ gwɔ̀m,

⁶rining rê bɛrɛng Rwi Sur, na re netat o rê bɛrɛng rwi e bama kwɔ̂n bemât gyêng lɔ gwɔ̀m.

⁷Bwang bagyɛng baba de be sogo hɛn fwom Tuk Shábat, tik na be bɛrɛng nelalâ Gbɔng Duk Re Fongol, na be bin gyeng gbɔng gwɔ̀m.

⁸Yɛn ê gwɔsɔ gbɔng gwɔ̀m o na celes bewal mɛn e vɔ, na yɛn a kyɔk ɛ e kahɛ kwɔn de ê kyè vɔk ɛ. Kawɛ mwat de a vey bagat na yɛn, ko be mɔrɔ hɛ.”

⁹Bemât nuyel o ba raa nu de Yɛhɔyada a nɔng ɛn. Ba vey na bemat mɛn na yɛ, bemat vemo de be ra fwom Tuk Shábat mwa tanga vemo de be sogo hɛn fwom Tuk Shábat.

¹⁰Yɛhɔyada a nɔ̂ng bemât nuyel o bebara tanga beruga vemo de ba kana se vê Gbɔng Gwɔ̀m Davit, vemo de ba tik e ji Gbɔng Duk Re Fongol.

¹¹Vê nuyel o ba nɔ̂ng bemât gyeng pyɛ́ mo e vwɔ. Yɛn a tumal mɛ, ba rɔnɔ gbɔng duk o tanga gàgbang rangas yas na be bin gyep gbɔng gwɔ̀m o.

¹²E jeng o, Yɛhɔyada a nusu na Yɔwash e majey. A tɛ̀ a yɛ kpin-negwɔm e rato mɛ, a to nɔng bwok-rwang badu negwɔm e vwɔ mɛ. Ano arɔng, ba shushu Yɔwash na něy, na a tɛ́ ɛ gbɔng gwɔ̀m, ko ba moklo ba ye, a ga tɛ́ ɛ gbɔng gwɔ̀m. Bemat mwa ba dak vɔ, ba tē, “Neken gbɔng gwɔ̀m ne ros!”

¹³Ataliya, gbɔng gwɔ̀m hwà a wok môk bemât gyêng gwɔ̀m tanga bwang bemat, a hwo nusu vɔk e Gbɔng Duk Re Fongol, kwɔn de bemat ba ga tula hɛn ɛ.

¹⁴A di gbɔng gwɔ̀m e tumal bagat na swesêk duk e rwi Gbɔng Duk Re Fongol tyɛng na negwɔn de begbɔng begwɔ̀m be raa. Bemât nuyêl bemât gyeng tanga bemât pɛsɛ̂l bezing, mwa bemât vwel o ba sè mok yaga yey pyɛng, ba sè pɛsɛl bezing. Ataliya a vɛ̌ hama gworugu mɛ yaga lashê yey, a mok, a tē, “Sógo nehywɛ! Sógo nehywɛ!”

¹⁵Yɛhɔyada a simo be mɔrɔ Ataliya mo e majey Gbɔng Duk Re Fongol wɛt. Yaga ano, a nɔ̂ng bemât nuyêl como nu, be jut ɛ yi e tê bemât gyeng o, ko kawɛ mwat de a simo a sey ɛ, yɛn a mɔrɔ hɛ.

¹⁶Yɛn a vo ɛ, ba jut ɛ wɔ mɛ e majêy lɔ gwɔ̀m. E hwomo, bagat na rwi de bedwa be yeles ɛ, ba mɔrɔ hɛ.

¹⁷Yɛhɔyada a tɛ̀ Gbɔng Gwɔ̀m Yɔwash tanga bemat be wuna hɛn na sira na Dagwi Darwey, yɛn a rɔda sangal vê Dagwi Darwey e ngamo nuyel. A to tɛ̀ bemat be wuna hɛn na sira e tē mɛn na gbɔng gwɔ̀m.

¹⁸E bama mo, regyɛng bemat ra wɔ e duk de ba re a Baal fongol, ra gangas wɛ e vwel. Yɛn a mɔbɔs nekwɔn rangas yas, tanga pyɛ̂ sekwit, ba to mɔrɔ Matan, piris Baal e nuyel nekwɔn rangas o. Yɛhɔyada a tɛ̀ bemât gyeng na be gyeng Gbɔng Duk Re Fongol.

¹⁹Ano arɔng, a yishi bemât nuyêl gyeng na bemât gyeng gwɔ̀m tanga vê gyeng lɔ gwɔ̀m tanga mwa bemat. Ba wɔ kyɔk gbɔng gwɔ̀m yi e Gbɔng Duk Re Fongol vɔk e lɔ gwɔ̀m. A yel e rwi bemât gyeng, ko a sangal e ra gwofwa negwɔm.

²⁰Mwa bemat ba vɔk yey pyɛng. Ko gbɔng repomo ra tɛ́ ɛ yaang, e bama de ba ga mɔrɔ Ataliya e majey lɔ gwɔ̀m.

²¹Yɔwash a tɛ́ ɛ gbɔng gwɔ̀m Yuda yɛ na neshey netaama zɔng.