Read berom 2 Begwɔ̀m 12 Bible Online

2 Begwɔ̀m 12 - berom bible

2 Begwɔ̀m 12

¹E shey hê taama hê negwɔm Yehu wo Israyɛl, Yɔwash a hwo re negwɔm Yuda, ko a re negwɔm yi e Yɛrusalɛm neshey kuru banaas. Neng mɛ à Zibiya yi e repomô Bɛɛr-Sheba.

²A ra pyɛ́ de ya jam a Dagwi Darwey vɔk e jeng reku mɛ, yaga Yɛhɔyada piris a tɛsɛ hɛ e gwong rwat.

³Ko mwa ano, ba ka gangas nekwɔn de ba re a cī ɛ fongol wɛt. Ano, bemat ba re nuyel, be nása ɛ nenɔrɔ̂ yas na nenɔrɔ pyɛ̂ nesang hyɔɔlɔl e hwomo.

⁴Tuhak, Yɔwash a yishi bepiris, a nɔng ɛn nu, a ye, “Tula hin mwa dyām de ba vɛsɛ mɛ e Gbɔng Duk Re Fongol yaga fwôm Dagwi Darwey, yɛ à dyām de be tɛ̀ a bemat be talsa tanga dyām ye nenɔrɔ yey pyɛng.

⁵Tik na kawɛ piris a vey na myɛ à dyām de bemat de a ra a yɛn fwom ba tala. Ba rɔda ra fwom na yɛ, be yong mɛ Gbɔng Duk o e nekwɔn de na lashe hɛn.”

⁶Yɔwash a re negwɔm a wul neshey kuru baba na ne netat (23), ko bepiris ba ga ka yong Gbɔng Duk o e ngyen wɛt.

⁷Ano kwong, a hwo yila Yɛhɔyada tanga bwang bepiris o, na a rangal hɛn, a ye, “Yaga sɛ́ de yin a ga yong Gbɔng Duk o wɛt ɛ? E ngamo nuyel, yin a rɔda tik dyām de yin e sey yi na bemat e vɔ min wɛt, ko yin a rɔda vɛ̀sɛ na yɛ, na be ra mɛ fwôm yông Gbɔng Duk o.”

⁸Bepiris o ba simo ano, ko ba to simo arɔng wɔgɔ, yɛn a rɔda ra fwôm yong o wɛt.

⁹Yɛhɔyada a jut kundung a kulu revɔng e rebo mo, ko a tik gwɛ e bak yege e rwi yeles e duk o, bagat na gàgbang rangas yas de be yɛt vɔk na Dagwi. Bepiris de be gyeng kwɔ̂n yeles o, ba gyisa mwa dyām de bemat ba vɛ̀sɛ mɛ e Gbɔng Duk o.

¹⁰Kayɛ jeng de dyām o ya ga vey bɛɛrɛ e kundung o, mwat-jɛk lɔ gwɔ̀m tanga darwêy bepiris ba rɔda vey jut yɛ, be bara yɛ, ko be rɔgɔs yɛ e ji bedap.

¹¹Ano, ba rɔda nɔ̂ng bemât nuyêl bɛrɛ̂ng fwom e Gbɔng Duk o. Yɛn a rɔda talsa mɛ bemât fwôm yông cɔ́gɔt, na bemât lɔk,

¹²na bemât lɔk na beta tanga bemât tɛ̂s beta. Ba rɔda to sey mɛ cɔ́gɔt na beta de bê ra mɛ fwôm yông duk o, na be to seres mɛ bwang pyɛ̂ fwom o cak.

¹³Ba ka ye ywey a dyām o, na be yong mɛ bapěy ve dyam pyɛng, kɛ pyɛ̂ rimî kyâ kywa-kya, kɛ bèkɛt sɛ̂t nemi, kɛ bezing kɛ pyɛ̂ fwom cak yê dyam pyɛng kɛ ye dyam shinang wɛt.

¹⁴Ko ba talsa mɛ bemât fwom, ba to seres mɛ pyɛ̂ yongos o zɔng.

¹⁵Bemat de ba tik a yɛn fwom o bá sè bemat de ba vɔk tsak o. Yaga ano, vit a bare hak wɔgɔ, yɛn a nɔng nuha e ra gwong de ba ra fwom na yɛ.

¹⁶Ko dyām de ba talsa jeng de ba vey na nenɔrɔ talâ banɛn na nenɔrɔ̂ fûng banɛn, ba tɛsɛ e ji kundung o wɛt. Yane ya sé yaga bepiris nju mɛn.

¹⁷E jeng yane, Hazayɛl, gbɔng gwɔ̀m Sirya, a vey hwo e ra repomô Gat, ko a re rɛ. A to tɛ̀ e yey mɛ, na a wɔ hwo rê Yɛrusalɛm arɔng.

¹⁸Ko Yɔwash, gbɔng gwɔ̀m Yuda, a vɛ̌ hashe mwa nenɔrɔ de bedabeda mɛ Yɛhɔshafat na Yɛhɔram tanga Ahaziya ba kana nára a Dagwi Darwey nɛ. A wuna ɛ na myɛ na mwa dyam shinang de ya sè e ji begban Gbɔng Duk Re Fongol na wo lɔ gwɔ̀m. A tomo na yɛ mwa wɔ̀ nɔ̂ng Gbɔng Gwɔ̀m Hazayɛl mɛ nɔrɔ. Hazayɛl kwong a tɛ̀ bemât como mɛ ba doyo, ba hala Yɛrusalɛm.

¹⁹Bwang pyɛ́ de Yɔwash a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda

²⁰E yɛnɛ̂ rê negwɔm mɛ, bemât badu mɛ bahak ba yong gwông nengyas, na be mɔrɔ hɛ. Bemat beba e ji mɛn, yɛn à Yɔzakar Shimeyat na Yɛhɔzabat Shomer, ba mɔrɔ hɛ e lɔ de ba lɔk e ra kwɔn de ba kana sila hɛ e rwa rak na Yɛrusalɛm e ra gwong de gwa gyirik vɔk e Sila. Ba lɛrɛ hɛ e sak begwɔ̀m e ji Repomô Davit, ko sɔ mɛ Amaziya a re negwɔm e to mɛ.