Read berom 2 Begwɔ̀m 13 Bible Online

2 Begwɔ̀m 13 - berom bible

2 Begwɔ̀m 13

¹E shey hê kuru baba na hɛ tat (23) hê negwɔm Yɔwash Ahaziya wo Yuda, Yɛhɔwahas Yehu a hwo re negwɔm Israyɛl, ko a re negwɔm o yi e Samariya neshey kuru na nɛ netaama.

²A ra a Dagwi Darwey banɛn, ko a raa negwɔn nevês Yɛrɔbɔwam Nebat de a tɛ̀ BeIsrayɛl be ra banɛn arɔng, a tik nɛ wɛt.

³Yaga ano, Dagwi Darwey a vɔk shom na BeIsrayɛl, ko a simo a Hazayɛl, gbɔng gwɔ̀m Sirya tanga hwey mɛ Bɛn-Hadat, be sǎ e de rê BeIsrayɛl na como.

⁴Ano kwong, Gbɔng Gwɔ̀m Yɛhɔwahas a hwo tosho a Dagwi Darwey, ko Dagwi Darwey o a di neves reyɔm de gbɔng gwɔ̀m Sirya a tak a BeIsrayɛl, a vɛ̌ wok won mɛ.

⁵A tomo a yɛn mwât sey ɛn, ko yɛn a hywit ɛn yi e vwɔ̂ BeSirya. Yi ano, BeIsrayɛl ba sangal tyang, tyang sede raane.

⁶Ko mwa ano, yɛn a tik ragas banɛn wɛt, ko ba raa gwông belɔ Gbɔng Gwɔ̀m Yɛrɔbɔwam. Ba to tik ɛ swesêk Ashera, ci hwā mo, de ba tɛ̀ e Samariya.

⁷Yɛhɔwahas a vɔk bemât como bedwa kuru batungun, na bekyɛkyɛ̂ bedwa kuru tanga bemât bol gu kuru (10,000) zɔng, yaga gbɔng gwɔ̀m Sirya a ga kana wey na bwang o, a ga bɔrɔs hɛn mwa sede fongol zɔng.

⁸Bwâng Pyɛ́ de Yɛhɔwahas a ra tanga wɛng de a bɛrɛng, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

⁹Jeng de a ku, ba lɛrɛ hɛ e Samariya, ko sɔ mɛ Yɛhɔwash a re negwɔm e to mɛ.

¹⁰E shey hê kuru batat na hɛ taama (37) hê negwɔm Yɔwash, gbɔng gwɔ̀m Yuda, Yɛhɔwash Yɛhɔwahas a hwo re negwɔm Israyɛl, ko a re negwɔm o yi e Samariya neshey kuru na ne netyiimin.

¹¹Yɛ arɔng a ra a Dagwi Darwey banɛn, a tik negwɔn neves Yɛrɔbɔwam Nebat wɛt, de a tɛ̀ BeIsrayɛl be ra banɛn.

¹²Bwang pyɛ́ de Yɛhɔwash a ra tanga wɛng de a bɛrɛng, mwa na cōmo de a tó na Gbɔng Gwɔ̀m Ahaziya wo Yuda, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

¹³Jeng de a ku, ba lɛrɛ hɛ e sak begwɔ̀m e Samariya, ko sɔ mɛ Yɛrɔbɔwam a re negwɔm e to mɛ.

¹⁴Elisha a hwo rō ɛ, ko rɔ mo ha sé hê dal wɛt. Jeng de a sé e dyɛngɛ na serɔ mo, Gbɔng Gwɔ̀m Yɛhɔwash wo Israyɛl a wɔ̀ di ɛ, a hwo tosho, a tē, “À da! À da! Hwà sé a BeIsrayɛl sede besugâ como na bekyɛkyɛ bedwa mɛn.”

¹⁵Elisha a yang ɛ, “Vey na gbang tanga ket.” Ko gbɔng gwɔ̀m o a vey mɛ.

¹⁶Elisha a yang ɛ, “Wunta repɔk duk de re bɛrɛng vɔk e rwa rak. Tɛ̀ kwet e gbang.” Gbɔng gwɔ̀m a ra ano. Elisha a tɛ̀ vɔ mɛ e ra vè gbɔng gwɔ̀m o, ko a yang ɛ, “Ta!” Gbɔng gwɔ̀m a ta, ko Elisha a ye, “Kwet hemo ha dura sɛlɛ de yin ê sɛ yi na Dagwi Darwey. Yɛ a rɔda sɛlɛ hin e de tô como na BeSirya, ko hwô wey na yɛn hywiri e Afɛk.”

¹⁸Elisha kwong a to yâng gbɔng gwɔ̀m a jut bwang ket o, na a rusu mɛ vwel na vɛ, ko a rusu vwel na vɛ zang tat, a tumal ano.

¹⁹Hane ha tɛ̀ Elisha a wok shom, ko a yâng gbɔng gwɔ̀m o, “Ka hwà yang rusu zang tungun kɛ zang tyiimin ayi, ka hwà vɛ̌ hwo di wɛng, na hwo re BeSirya mwa! Ko di a remo, hwô re ɛn zang tat zɔng.”

²⁰Elisha a ku, ko ba lɛrɛ hɛ e fwara de ba lɛsɛ ɛ bavin bemat. Kahɛ pɛrɛ̂ shey, bemât jugu yi e Mowap ba kyese wɔ yeles e vwêl Israyɛl.

²¹Tuhak, bemat behak bá sè lɛrɛ revîn mwat mɛn. E jeng o, yɛn a di regyɛng BeMowap o, ko ba vɛ̌ bomo revîn mwat o e ji sak Elisha, ba tele. Remo-remo de revin rane ra ra bekup Elisha, mwat o a vɛ̌ sene, a pere sogo e tumal.

²²Hazayɛl, gbɔng gwɔ̀m Sirya, a tak a BeIsrayɛl reyɔm e mwa jeng negwɔm Yɛhɔwahas.

²³Ko Dagwi Darwey a wok nemwishish, a tosho reyɔm mɛn, ko a sɛlɛ hɛn yaga sira de a wuna na Abraham, na Yishak tanga Yakɔp. Mwin, a ga sang ye bam a bemat mɛ wɛt.

²⁴E bamâ rekû Hazayɛl, sɔ mɛ Bɛn-Hadat a re negwɔm e to mɛ.

²⁵Ano kwong, Yɛhɔwash, gbɔng gwɔ̀m Israyɛl, a di wɛng e ra BeSirya zang tat. A to sey ɛ bapomo barey de Hazayɛl a re na como yi na da mɛ Yɛhɔwahas.