Read berom 2 Begwɔ̀m 14 Bible Online

2 Begwɔ̀m 14 - berom bible

2 Begwɔ̀m 14

¹E shey hê neba hê negwɔm Yɛhɔwash Yɛhɔwahas wo Israyɛl, Amaziya Yɔwash a hwo re negwɔm Yuda.

²E jeng o, a vɔk neshey kuru baba na ne netungun (25), ko a re negwɔm o yi e Yɛrusalɛm neshey kuru baba na ne shanetat (29). Neng mɛ à Yɛhɔwadin yi e Yɛrusalɛm.

³Amaziya a ra pyɛ́ de ya jam a Dagwi Darwey, sede remo de da mɛ Yɔwash a kana ra, ko mwa ano, a ka wul mɛ dâ beda mɛ Gbɔng Gwɔ̀m Davit wɛt.

⁴Ko a de gangas nekwɔn sekwit wɛt. Yaga ano, bemat ba re nuyel na nása a cī nenɔrɔ, na be to rangas pyɛ̂ nesang hyɔɔlɔl e hwomo.

⁵Bama de Amaziya a ga tɛ̀ gap e ji negwɔm, a vɛ̌ wey na bemât nuyel de bá mɔrɔ da mɛ gbɔng gwɔ̀m.

⁶Ko a ka mɔbɔs nèy mɛn wɛt, yaga a raa badu de Dagwi Darwey a kana nɔ̂ng Mose wɔgɔ, bê tɔk mɔbɔs nèy yaga banɛn de beda mɛn ba ra wɛt, kɛ be mɔbɔs beda yaga banɛ̂n nèy mɛn arɔng wɛt. Ba rɔda mɔrɔ mwat de a ra banɛn pyɛ mɛ.

⁷Amaziya a wey na bemât comô Ɛdɔm gu kuru (10,000) e Nɛk Nevwashe, ko a re repomô Sɛla e ji como mo, a vo a rɛ rezâ Yɔktɛɛ. Za mo a hane de ba rɔɔ yishi mɛ rɛ vey e remo.

⁸Tuhak, Amaziya a tomo betom vɔk na Yɛhɔwash, gbɔng gwɔ̀m Israyɛl a ragas hɛ na be tó como.

⁹Ko Gbɔng Gwɔ̀m Yɛhɔwash a toyo a yɛ na gwɔrɔ-há, a ye, “Jeng cak, rezîk rɔgɔ de ra sé e ra berakû Lɛbanɔn ra tomo a retîn cɔgɔ̂t sida wɔgɔ, ‘Nɔ̂ng hwey hom hwóng mo, he ra weneng mɛ.’ Ko ngyama cak ya kwey, ya bɔrɔs rezîk rɔgɔ mo.

¹⁰Di, à remo, hwo Amaziya hwà ga re BeƐdɔm na como, ko hwà sé dak ragey. A sé naka na hwo feng na reza de hwà ga sɛ̀, ko sangal mɛ e lɔ kē. Yaga sɛ́ de hwà sé jama yol de yê vey na reyɔm e ra hwo tanga BeYuda ɛ?”

¹¹Ko Amaziya a kyɛ́ ɛ nà wok. Ano kwong, Gbɔng Gwɔ̀m Yɛhɔwash a nusu tanga bemat mɛ, ba man gey na yɛ e Bet-Shɛmɛsh e vwêl Yuda.

¹²Bemât comô Israyɛl ba re vê Yuda e como mo, ko BeYuda mo ba tele vɔk e nelɔ mɛn.

¹³Yɛhɔwash a vo Amaziya, a tɛ̀ ɛ e ngyang. A to re nuyel vɔk e gbɔng repomô Yɛrusalɛm, a gangas jwâ-pomo mo yi e Ruhup Ɛfrayim vɔk e Ruhup To-Kwɔng, neyikyik o na wul sede mita naga beba.

¹⁴A hashe mwa dyam shinang na dyam pyɛng tanga pyɛ̂ fwom de a sɛ̀ e Gbɔng Duk Re Fongol tanga e ji begban lɔ gwɔ̀m. Ba kyè mɛ mwa vɔk e Samariya na besam de ba re e como.

¹⁵Bwang pyɛ́ de Yɛhɔwash a ra tanga wɛng de a bɛrɛng, mwa na como de a to na Gbɔng Gwɔ̀m Amaziya wo Yuda, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

¹⁶Jeng de a ku, ba lɛrɛ hɛ e sak begwɔ̀m e Samariya, ko sɔ mɛ Yɛrɔbɔwam a re negwɔm e to mɛ.

¹⁷Gbɔng Gwɔ̀m Amaziya a ra neshey kuru na ne netungun e bamâ rekû Gbɔng Gwɔ̀m Yɛhɔwash wo Israyɛl.

¹⁸Bwâng pyɛ́ de Amaziya a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda.

¹⁹Ba yong gwông nengyas, na be mɔrɔ Amaziya, ko a tele wɔ e gbɔng repomô Lakish. Ko bemât repugu mɛ ba tomo bemat mɛn na be raa hɛ vɔk e hwomo, ba wɔ mɔrɔ hɛ.

²⁰Ba jut revin mɛ vey mɛ e Yɛrusalɛm e ra dwa, ba lɛrɛ rɛ e sak begwɔ̀m e Repomô Davit.

²¹BeYuda ba tɛ̀ sɔ mɛ Azarya a tɛ́ ɛ gbɔng gwɔ̀m mɛn. E jeng o, Azarya á vɔk neshey kuru na ne netyiimin zɔng.

²²E yɛ de a to re repomô Elat, a to lɔk rɛ e bamâ rekû da mɛ.

²³E shey hê kuru na he tungun hê negwɔm Amaziya wo Yuda, Yɛrɔbɔwam Yɛhɔwash a hwo re negwɔm Israyɛl, ko a re nɛ yi e Samariya neshey kuru banaas na hɛ hining (41).

²⁴A ra a Dagwi Darwey banɛn, a tik negwɔn neves ne Yɛrɔbɔwam Nebat de a tɛ̀ BeIsrayɛl be ra banɛn wɛt.

²⁵A to re mwa bavwel de bá kana sè vê Israyɛl, yi e Hamat e rwa bato vɔk e Gworep Nevwashe e rwa batin. Pyɛ ma yemo de Dagwi Darwey, Dagwî Israyɛl a kana sira yi e nû sam mɛ Yɔna Amitai, zarap mɛ yi e Gat-Hɛfɛr.

²⁶Dagwi Darwey a ga di rezôt BeIsrayɛl, yaga vit a mwat ko gwining de ê sɛlɛ hɛn.

²⁷Ko a sé simo mɛ de be wey na BeIsrayɛl mwa hywiri wɛt, yaga ano, a sɛlɛ Gbɔng Gwɔ̀m Yɛrɔbɔwam o, na a sey ɛn.

²⁸Bwâng pyɛ́ de Yɛrɔbɔwam a ra, tanga wɛng de a bɛrɛng e ji como, tanga gwong de a toyo a Israyɛl na Damaskus tanga Hamat, ba jɛk yɛ e ji Bwok-basâ Pyɛ̂ Bare, yê Begwɔ̀m Israyɛl.

²⁹Jeng de a ku, ba lɛrɛ hɛ e sak begwɔ̀m Israyɛl, ko sɔ mɛ Zakariya a re negwɔm e to mɛ.