Read berom 2 Begwɔ̀m 15 Bible Online

2 Begwɔ̀m 15 - berom bible

2 Begwɔ̀m 15

¹E shey hê kuru baba na ne netaama (27) hê negwɔm Yɛrɔbɔwam wo Israyɛl, Amaziya a hwo re negwɔm Yuda.

²E jeng o, a vɔk neshey kuru na ne netyiimin zɔng, ko a re negwɔm o yi e Yɛrusalɛm neshey kuru batungun na ne neba (52). Neng mɛ à Yɛkɔliya yi e Yɛrusalɛm.

³A ra pyɛ́ de ya jam a Dagwi Darwey, sede remo de da mɛ Amaziya a kana ra.

⁴Ko a de gangas nekwɔn sekwit wɛt. Yaga ano, bemat ba re nuyel na nása a cī nenɔrɔ na be to rangas pyɛ̂ nesang hyɔɔlɔl e hwomo.

⁵Dagwi Darwey a tɛ̀ a Azarya rɔ ves hê rehwô rebek sede sekwa, ko rɔ mo ha nàra e rebek mɛ pere wɔ ku mɛ, ko a sangal e lɔ mɛ shan nju mɛ. Sɔ mɛ Yɔtam a bɛrɛng lɔ gwɔ̀m, ko a ra fwôm negwɔm o e to mɛ.

⁶Bwang pyɛ́ de Azarya a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda.

⁷Jeng de a ku, ba lɛrɛ hɛ e sak begwɔ̀m e Repomô Davit, ko sɔ mɛ Yɔtam a re negwɔm e to mɛ.

⁸E shey hê kuru batat na he rwit (38) hê negwɔm Azarya wo Yuda, Zɛkarya Yɛrɔbɔwam a hwo re negwɔm Israyɛl, ko a re nɛ yi e Samariya pɛl tyiimin zɔng.

⁹A ra a Dagwi Darwey banɛn, a tik negwɔn neves Yɛrɔbɔwam Nebat de a tɛ̀ BeIsrayɛl be ra banɛn wɛt.

¹⁰Shalum Yabɛsh a yong gwông nengyas, ko a mɔrɔ hɛ e bayîs bemat, a vɛ̌ re negwɔm o e to mɛ.

¹¹Bwang pyɛ́ de Zɛkarya a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

¹²Kayɛ pyɛ ya té tyɛng na nu de Dagwi Darwey a kana vo a Gbɔng Gwɔ̀m Yehu wɔgɔ, nèy mɛ na rɔda ba re negwɔm Israyɛl vɔk e zamang hê naas.

¹³E shey hê kuru batat na he shatat (39) hê negwɔm Azarya wo Yuda, Shalum Yabɛsh a hwo re negwɔm Israyɛl, ko a re nɛ yi e Samariya pwɛl gwining zɔng.

¹⁴Mɛnahɛm Gadi a yi e Tirza vɔk e Samariya, a wɔ mɔrɔ Shalum, ko a vɛ̌ tút e negwɔm o. Jeng de á sè kyè e gwong mɛ yi e Tirza, bemât repomô Tifsa ba simo be raa hɛ wɛt. Ano kwong, a vɛ̌ wey na bemat de ba sangal ɛ mwa tanga bavwel de ba rɔnɔ hwomo, a vɛ̌ vugus beha na nèy e nejim. Bwang pyɛ́ de Shalum a ra, mwa na gwông nengyas mɔrɔ̂ Zɛkarya, ba jɛk yɛ e ji Bwok-basâ Pyɛ̂ Bare yê Begwɔ̀m Israyɛl.

¹⁷E shey hê kuru batat na he shatat (39) hê negwɔm Azarya wo Yuda, Mɛnahɛm Gadi a hwo re negwɔm Israyɛl, ko a re negwɔm o neshey kuru yi e Samariya.

¹⁸A ra a Dagwi Darwey banɛn. A tik negwɔn nevês Yɛrɔbɔwam Nebat wɛt, de a tɛ̀ BeIsrayɛl be ra banɛn, mwa vɔk e jeng reku mɛ.

¹⁹E jeng negwɔm Mɛnahɛm o, Tiglat Pilɛsɛr, Da vwel Asirya, a vey hwo e ra sevwêl Israyɛl, ko Mɛnahɛm a nɔng dyam pyɛng de ya dal ton kuru batat, yaga na a bin sɛ̀ mɛ gap yi na yɛ e ra vwel o.

²⁰Mɛnahɛm a sey dyām o yi na bedaberêy Israyɛl, a tɛ̀ kawɛ mɛn a nɔng ɛ rebît kilo. Yi ano, gbɔng gwɔ̀m Asirya a toyo vɔk e sevwel mɛ.

²¹Bwang pyɛ́ de Mɛnahɛm a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl

²²Jeng de a ku, ba lɛrɛ hɛ, ko sɔ mɛ Pɛkahiya a re negwɔm e to mɛ.

²³E shey hê kuru batungun hê negwɔm Azarya wo Yuda, Pɛkahiya Mɛnahɛm a hwo re negwɔm Israyɛl, ko a re negwɔm o yi e Samariya neshey neba.

²⁴A ra a Dagwi Darwey banɛn, a tik negwɔn neves Yɛrɔbɔwam Nebat wɛt, de a tɛ̀ BeIsrayɛl be ra banɛn.

²⁵Hwak e ji bemât nuyêl comô Pɛkahiya de ba tang ɛ à Pɛka Remaliya a yong gwông nengyas na a mɔrɔ gbɔng gwɔ̀m. Yɛ tanga bemat behak kuru batungun yi e bak vwêl Gileyat ba mɔrɔ gbɔng gwɔ̀m o e majêy lɔ gwɔ̀m, ba wuna ɛ Argop tanga Ariye. Ko Pɛta a hwo re negwɔm o e to mɛ.

²⁶Bwang pyɛ́ de Pɛkahiya a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

²⁷E shey hê kuru batungun na he ba (52) hê negwɔm Azarya wo Yuda, Pɛka Remaliya a hwo re negwɔm Israyɛl, ko a re nɛ yi e Samariya neshey kuru baba.

²⁸A ra a Dagwi Darwey banɛn, a tik negwɔn neves Yɛrɔbɔwam Nebat wɛt, de a tɛ̀ BeIsrayɛl be ra banɛn.

²⁹Á sè e jeng de Pɛka e re negwɔm, de Tiglat Pilɛsɛr, Da vwel Asirya, a hwo yel e vwêl Israyɛl. Á hwo re bapomô Iyɔn, na Abel-Bet-Maaka, na Yanowa, na Kɛdɛsh tanga Hazor. A to re bebak vwêl Gileyat na Galili mwa na vwêl yerê Naftali, ko a hashe bemat o vɔk e Asirya e de sesam.

³⁰E shey hê kuru baba hê negwɔm Yɔtam Azarya wo Yuda, Hosheya Ela a yong gwông nengyas, na a mɔrɔ Gbɔng Gwɔ̀m Pɛka, a mɔrɔ hɛ, ko a re negwɔm o e to mɛ.

³¹Bwang pyɛ́ de Pɛka a ra, ba jɛk yɛ e Bwok-basâ Pyɛ̂ Bare yê Begwɔ̀m Israyɛl.

³²E shey hê neba hê negwɔm Pɛka Remaliya wo Israyɛl, Yɔtam Azarya a hwo re negwɔm Yuda.

³³E jeng o, a vɔk neshey kuru baba na ne netungun, ko a re negwɔm o yi e Yɛrusalɛm neshey kuru na nɛ netyiimin. Neng mɛ à Yɛrusha Zadɔk.

³⁴Yɔtam a ra pyɛ́ de ya jam a Dagwi Darwey, tyɛng sede remo de da mɛ Azarya a ra.

³⁵Ko a de gangas nekwɔn sekwit wɛt. Yaga ano, bemat ba re nuyel na nása a cī nenɔrɔ, na be to rangas pyɛ̂ nesang hyɔɔlɔl e hwomo. E Yɔtam wɛ de a to lɔk Ruhûp Batô lalâ Gbɔng Duk Re Fongol.

³⁶Bwang pyɛ́ de Yɔtam a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda.

³⁷Á sè e jeng Yɔtam o de Dagwi Darwey á pɛrɛ tómo Gbɔng Gwɔ̀m Rezin wo Sirya tanga Gbɔng Gwɔ̀m Pɛka wo Israyɛl, na be wɔ hwo e ra Yuda na como.

³⁸Jeng de Yɔtam a ku, ba lɛrɛ hɛ e sak begwɔ̀m e Repomô Davit, ko sɔ mɛ Ahas a re negwɔm e to mɛ.