Read berom 2 Begwɔ̀m 16 Bible Online

2 Begwɔ̀m 16 - berom bible

2 Begwɔ̀m 16

¹E shey hê kuru na hɛ taama hê negwɔm Pɛka wo Israyɛl, Ahas Yɔtam a hwo re negwɔm Yuda.

²E jeng o, a vɔk neshey kuru baba. A re negwɔm o yi e Yɛrusalɛm neshey kuru na nɛ netyiimin. A raa begwong dâ beda mɛ Davit wɛt, yaga a ra pyɛ́ de ya jam a Dagwi Darwey, Dagwi mɛ wɛt.

³A kat ragas banɛn a dal mɛ begbɔng begwɔ̀m Israyɛl. A nára hwey mɛ nɔrɔ̂ rangas vɔk na ci. Negwɔn nemo na sé a Dagwi byɛm-byɛm. Nɛ à nane de na tɛ̀ Dagwi Darwey a pat mɛ yére bemât vwel o, na a nɔ̂ng BeIsrayɛl hɛ.

⁴Ahas a nása nenɔrɔ detidetu e nekwɔn sekwit ne berahwol tanga e nɛ̂n cɔ́gɔt ryey o.

⁵Jeng de Ahas á sè re negwɔm Yuda, ko gbɔng gwɔ̀m Sirya a to sey ɛ repomô Elat yi e vwɔ̂ BeYuda. A pat BeYuda mo na retek, ko a to nɔ̂ng BeƐdɔm rɛ, yɛn a sangal ɛ e hwomo pere vey e remo. E jeng jining a yane de gbɔng gwɔ̀m Sirya, Rezin tanga gbɔng gwɔ̀m Israyɛl, Pɛka ba kyè vɔk e Yɛrusalɛm, na be wɔ hwo e ra rɛ, ko mwa ano, yɛn a ka tɔk re rɛ wɛt.

⁷Ahas a hwo tomo vɔk na Tiglat Pilɛsɛr wo Asirya, a yang ɛ, “Neken mō ne nàra! Di, gbɔng gwɔ̀m Sirya tanga gbɔng gwɔ̀m Israyɛl ba ga vey hwo me na como, me mwat mō. Gabɔk wɛt, vey sey me!”

⁸A hashe mwa dyam pyɛng tanga dyam shinang yi e ji begban Gbɔng Duk Re Fongol tanga ve lɔ gwɔ̀m, a tomo a yɛ mɛ nɔrɔ.

⁹Tiglat Pilɛsɛr a wok won mɛ mo, a hwo sogo tanga bemât como mɛ, ba kyè vey e Sirya. A re gbɔng repomô Damaskus, ko a to hashe bemat vɔk e repomô Kir e de sesam, a to mɔrɔ Resin arɔng.

¹⁰Ahas a wɔ e Damaskus, na a wɔ man na Tiglat Pilɛsɛr. Jeng de a sé e hwomo, ko a hwo di kwɔ̂n nása nenɔrɔ, a vɛ̌ tomo a Uriya, piris e Yɛrusalɛm na zina mo, na be lɔk a yɛ yerê hɛ.

¹¹Uriya a raa wɔ́rɔ mo, ko a yong hak tyɛng na hane mo, a tala lɔk o gyam na Ahas a toyo yi e Damaskus.

¹²Bama de Ahas a toyo, a wɔ di kwɔn nása nenɔrɔ mo, na a to nára ɛ nɔrɔ̂ yas de be yɛt. A tut vɔk e kwɔ̂n nása nenɔrɔ mo,

¹³a vɛ̌ nára nɔrɔ̂ yas de be yɛt be rangas burang na nɔrɔ̂ nemuk yaga to mɛ. A shusha nɔrɔ̂ pyɛ̂ sɔ, ko a waram nemî yas ye nɔrɔ̂ wunâ nesa e ra kwɔn o arɔng.

¹⁴Bamâ ano, a tɛ̀ be sek kwɔ̂n nása nenɔrɔ hê dyam pama de há sè e nuyel Gbɔng Duk Re Fongol wɔ e bak yege, na a bin tik ɛ kwɔn mɛ pas o e dem o.

¹⁵Ko a nɔ̂ng Uriya, piris nu, a ye, “E ngamo nuyel bê nása nenɔrɔ̂ yas burang na nenɔrɔ̂ nemuk ne nagasi na ne nahywelek e ra gbɔng kwɔ̂n nása nenɔrɔ hemo. Bê nása ɛ nenɔrɔ̂ burang na nenɔrɔ̂ nemuk tanga nenɔrɔ̂ pyɛ̂ sɔ yaga gbɔng gwɔ̀m tanga ne bemat mwa arɔng, ko bê to waram nemî yas de ba ga yɛt e ra kwɔn o. Ko be tik a me kwɔ̂n nása nenɔrɔ hê dyam pama, na me bin rangsâl Dagwi ɛ pyɛ de e simo na me ra.”

¹⁶Uriya a ra kayɛ pyɛ de Ahas a nɔng ɛ nu.

¹⁷Ahas a tɛ̀, be pat bebak behak yi e bekyɛkyɛ dyam pama mwa na bèpěy vɛ de ba ra mɛ fwom e Gbɔng Duk Re Fongol. A to tɛ̀, be pat gwogbɔng gwopey yi e ra bemus dyam pama, na be tɛ̀ gwɛ e ra kwɔ̂n tikis hak de ba yong na beta.

¹⁸A tɛ̀, be jut buk gwomo de ba ra mɛ fwom yaga rê fongol Tuk Shábat, ko a bang rwi de gbɔng gwɔ̀m e kweres ɛ vɔk e de rê fongol. A ra ano, yaga na a bin pɛngɛ a Tiglat Pilɛsɛr mɛ yey.

¹⁹Bwang pyɛ́ de Ahas a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda

²⁰Jeng de a ku, ba lɛrɛ hɛ e sak begwɔ̀m e Yɛrusalɛm, ko sɔ mɛ Hɛzɛkiya a re negwɔm e to mɛ.