Read berom 2 Begwɔ̀m 18 Bible Online

2 Begwɔ̀m 18 - berom bible

2 Begwɔ̀m 18

¹E shey hê netat hê negwɔm Hosheya wo Israyɛl, Hɛzɛkiya Ahas a hwo re negwɔm Yuda.

²E jeng o, a vɔk neshey kuru baba na ne netungun (25), ko a re negwɔm o yi e Yɛrusalɛm neshey kuru baba na ne shanetat (29). Neng mɛ à Abi, hwông Zɛkarya.

³Hɛzɛkiya a ra pyɛ́ de ya jam a Dagwi Darwey, sede remo de dabeda mɛ Davit a kana ra.

⁴A gangas nekwɔn sekwit, a to mɔbɔs beta gacik de ba tɛ̀ a cī mo, ko a to tow swesêk Ashera, ci hwā mo, de ba tɛ̀. A to bunut gwɔ̄m dyam pama de Mose a kana yong. Bemat ba ga kana tɛ̀ a wɛ ɛ rezâ Nɛhushtan, ko ba to rangas a wɛ pyɛ̂ nesang hyɔɔlɔl vey e jeng Hɛzɛkiya mo.

⁵Hɛzɛkiya a tɛ̀ gap mɛ e ra Dagwi Darwey, Dagwi Israyɛl. Vit a gbɔng gwɔ̀m hwak e Yuda de á sè sede Hɛzɛkiya kɛ vinde ba tānga re negwɔm kɛ vinde ba re e bama mɛ wɛt.

⁶Á sè pang na Dagwi Darwey na yey mɛ mwa a to gyenges badu mɛ de a ga kana nɔ̂ng Mose yaga BeIsrayɛl.

⁷Dagwi Darwey a sɛlɛ hɛ, ko a tɛ̀ ɛ, a di wɛng e ra kayɛ pyɛ de a ragas. A vɛ̌ kyɛ́ ɛ nà raa Da vwel Asirya, a to talsa hɛ dyām de ba tɛ̀ a yɛ wɛt.

⁸Hɛzɛkiya a re BeFilisti na como pere mɛ vɔk e Gaza. A sey ɛ nebapomo nesɛl o mwa na bagbɔng bapomo de ba rɔnɔ na jwa-pomo.

⁹E shey hê negwɔm Hɛzɛkiya de ha sé tyɛng shey hê taama hê Hosheya de a re negwɔm Israyɛl, Da vwel Asirya, Shalmanɛsɛr a vey na bemât como mɛ e Samariya, gbɔng repomô Israyɛl, yɛn a hwo e ra rɛ.

¹⁰Ba re rɛ e bamâ neshey netat, e shey hê netyiimin hê negwɔm Hɛzɛkiya na hê shanetat hê negwɔm Hosheya arɔng.

¹¹Da vwel Asirya mo a hashe BeIsrayɛl, a kyè mɛ ba wɔ tɛ́ ɛn besam e vwel mɛ. A tɛ̀ behak gbing-gbing ba sangal e bak vwêl Hala, behak bagat na Rɔt Habɔr e bak vwêl Gozan, ko behak arɔng e ji bapomô BeMedya.

¹²Pyɛ́ yane mwa ya té ano, yaga BeIsrayɛl ba kyɛ́ ɛn nà gyeng hâ Dagwi Darwey, Dagwi mɛn. Ba to kyɛ́ ɛn nà gyeng sira de a wuna tanga yɛn. Yɛn a to tik nà ra kayɛ pyɛ de Mose, mwât fwôm Dagwi Darwey a kana ha a yɛn.

¹³E shey hê kuru na he naas de Hɛzɛkiya a re negwɔm e Yuda, Da vwel Asirya, Senakerip a vey hwo e ra sevwel o, a vo kahɛ repomo de ba gwɔrɔ na jwâ-pomo sɛ̌ Yɛrusalɛm nju wɛ de a re wɛt.

¹⁴Ko Hɛzɛkiya a hwo tomo na ha vɔk na yɛ womo de á sè e repomô Lakish, a ye, “Ma ga buru a hwo de ma sogo nehywɛ, ko ma rɔda tala hwo kayɛ pyɛ de hwó simo, ka sede hwà tik nà vey hwo e ra wot.” Senakerip a toyo a Hɛzɛkiya na ha wɔgɔ, a tala hɛ sede ton dyam pyɛng kuru, na a to tala dyam shinang de ya wul ton gwining arɔng.

¹⁵Ano kwong, Hɛzɛkiya a tula mwa dyam pyɛng yi e begban duk rê fongol Dagwi Darwey tanga vê lɔ gwɔ̀m.

¹⁶A tɛ̀ be paa befereng dyam shinang de yɛ pyɛ mɛ a kana tɛ̀ be dak e mwa ri duk rê fongol o. A nɔng yɛ mwa vɔk na Da vwel Asirya.

¹⁷Ko mwa ano, Da vwel Asirya mo a tomo begbɔng bemât nuyel mɛ betat yi e Lakish tanga gbɔng regyɛng bemât como, na be kyè vɔk e Yɛrusalɛm. Jeng de yɛn a pom, begbɔng o mo ba tumal bagat na cwɛl de ba kus ɛ berugu e gwông nshi de gwa yi e kadûng bato.

¹⁸Yɛn a tomo, be simo be ha na Gbɔng Gwɔ̀m Hɛzɛkiya. Ko bemât nuyel mɛ betat ba nusu, na be wɔ man na yɛn, hwak e ji mɛn à Ɛliyakim Hilkiya, womo de a se mwât bɛrɛng lɔ gwɔ̀m, bwang beba mo ba sé Shɛbna, mwat-jɛk, tanga Yowa Asaf, mwat-jɛk pyɛ̂ bare yê negwɔm arɔng.

¹⁹Hwak e ji bemât nuyêl BeAsirya mo a ha a yɛn, “Ma vɔk neha yaga Hɛzɛkiya yi na gbɔng o Da vwel Asirya.” Yang ɛ ngan: Hwá tɛ̀ gap mō e ra wa arɛt?

²⁰Hwó bare, hwó yong begwong como, na hwo re yɛ na nu zɔng arɛt? E wa de a rɔda sɛlɛ hwo a remo de hwà ga sogo a gbɔng gwɔ̀m Asirya nehywɛ ɛ?

²¹Hwó tɛ̀ gap mō e ra Misra tanga gbɔng gwɔ̀m mɛn arɛt? Hwà sé sede mwat de a tē yìk e ra cwang sere. Ê kwɔrɔ hɛ zɔng, ko ê sɔklɔ hɛ e vwɔ. Ano de gbɔng gwɔ̀m Misra a sé a mwa vemo de ba tɛ̀ gap mɛn e ra yɛ.

²²Kɛ gyeng hwô yang me, “Wot a sé tɛ̀ gap e ra Dagwi Darwey, Dagwi mot.” Ko di, e hwo de hwà tɛ̀ be gangas nekwɔn re a yɛ fongol tanga nekwɔn nása a yɛ nenɔrɔ wɛt arɛt? E hwo de hwà yang bemât Yɛrusalɛm tanga vê Yuda be re a yɛ fongol e kwɔn hining e Yɛrusalɛm wɛt arɛt?

²³“Tik na hwo yong ɛ na darwey hom, Da vwel Asirya. A rɔda nɔng o bedwa gu beba, ka sede hwô sɛ̀ bemât lagsa vɛ.

²⁴Hwô ka tɔk re mwât nuyêl como mot swɛl o wɛt! Hwo de hwà ye yɛndɛng e ra BeMisra, na be nɔng in bekyɛkyɛ̂ como na bedwa arɔng.

²⁵Hwó bare, darwey hom a hwo e ra vwel hemo, na a wey na hɛ, ko Dagwi Darwey sana nɔng ɛ nu a? Kée wey! A sé Dagwi Darwey pyɛ mɛ de a nɔng ɛ nu ano!”

²⁶Ɛliyakim na Shɛbna tanga Yowa ba yang ɛ, “Gabɔk, ha na wot e ji lêm BeAram. Wot a tɔk hɛ. Hwo ha e ji lêm BeIbrani wɛt, yaga bemat de ba sé e ra jwâ-pomo ba sé wokos ha mō.”

²⁷Ko mwât nuyêl BeAsirya mo a toyo a yɛn, a ye, “Darwey hom a tomo me, na me vey ha na bemat mwa, ko na darwey min tanga yin bemât nuyel nju min zɔng wɛt. Bemat vemo ba vey bagat rê beving mɛn, na be sɔ nshî tɔs mɛn, tanga mwa yin betat vemo!”

²⁸Ko a to gwɛ ha na gbɔng fwɔ rɛng-rɛng yaga na kawɛ mwat a wok e ji lêm BeIbrani, a ye, “Wok in pyɛ de gbɔng o, Da vwel Asirya a ye:

²⁹Yin kwon tɛ̀ tong na hâ kwɛlɛ̂ng Hɛzɛkiya wɛt! A rɔda tɔk sey in yi e vwɔ hom wɛt.

³⁰E tang in, yin tɛ̀ gap min e ra Dagwi Darwey de ê sey in. E to tang in, gbɔng repomo remo rê gaba e vwɔ̂ Da vwel Asirya wɛt.”

³¹Kyɛ́ in nà wok ha mɛ, tɛ̀ in betong na hâ Da Vwel hom e negya. Ha mɛ ma hemo ngan: Nɔng in bato min e vwɔ hom, nusu hin yi e ji repomo mo! Ko kawɛ e ji min ê tɔk re nèy cɔ́gɔt anap na ne regwi mɛ, ê to sɔ nshî hwes mɛ arɔng.

³²Sɛ̌ jeng de ma rɔda ba hashe hin vɔk e vwel de ha sé tyɛng na min, kwɔn de yin ê how ɛ pyɛ̂ yeneng. Yin ê tus ɛ cɔgɔ̂t anap na ye regwi, ko yin ê sɛ̀ kpam-tuk, na nshî anap, na něy pwat tanga shok arɔng. Wok in ha hom, ko yin ê sangal beken, yin ê wey wɛt. “Yin tɛ̀ tong na hâ Hɛzɛkiya wɛt! E kwɛlɛng hin zɔng, jeng de e tang in wɔgɔ, Dagwi Darwey a rɔda sey in.

³³Cī yerê bemât jey cak ya ga sang dul bavwel mɛn yi na Da vwel Asirya arɛt?

³⁴E sɛ́ de ya té na cî bapomô Hamat tanga Arpat arɛt? E sɛ́ de ya té na cî Sɛfarvayim na Hena tanga Iva ɛ? Ya tɔk dul me nà re Samariya arɛt?

³⁵Vit a cak e ji yɛ de ya tɔk sey bemat mɛn yi e vwɔ hom. Ko yin e bare, Dagwi Darwey, Dagwi min a rɔda tɔk sey Yɛrusalɛm yi e vwɔ hom arɛt?”

³⁶Bemat de ba sé e hwomo ba saa yuu. Vit a hwak de a hanat pyɛ cak, yaga Gbɔng Gwɔ̀m Hɛzɛkiya a kana nɔng nu, be sǎ yuu. Ɛliyakim na Shɛbna tanga Yowa ba hama berugu mɛn yaga lashê yey. Yɛn a wɔ ha a Hɛzɛkiya mwa pyɛ́ de mwât nuyêl BeAsirya mo a ga ha.