Read berom 2 Begwɔ̀m 2 Bible Online

2 Begwɔ̀m 2 - berom bible

2 Begwɔ̀m 2

¹Jeng ya vey bagat de Dagwi Darwey a rɔda jut Eliya e ji gul sombabos vɔk e lagwi. Eliya tanga Elisha ba kaba gwong yi e Gilgal.

²Jeng de yɛn a sé kyè e gwong, Eliya a hwo yâng Elisha, “Sangal e ngamo, Dagwi Darwey a tomo me wɔ e Bet-Ɛl.” Ko Elisha a yang ɛ, “Ma sira a hwo, sede remo de Dagwi Darwey a sé kwen, ko sede remo de hwà sé kwen arɔng, ma rɔda hala hwo wɛt.” Ano kwong, yɛn a kyè vɔk e Bet-Ɛl o.

³Regyɛng bezarap de ra sé sangal e hwomo, ra wɔ̀ rangâl Elisha, ra ye, “Hwà tɔk, Dagwi Darwey a rɔda jut dalɔ mō yi na hwo yunung a?” A ye, “Ey, ma tɔk. Sǎ hin yuu!”

⁴Eliya a to yâng Elisha, “A remo, sangal e ngamo, Dagwi Darwey a tomo mɛ wɔ e Yeriko.” Ko Elisha a ye, “Ma sira a hwo, sede remo de Dagwi Darwey a sé kwen, ko sede remo de hwà sé kwen arɔng, ma rɔda hala hwo wɛt.” Ano kwong, yɛn a kyè vɔk e Yeriko mo.

⁵Regyɛng bezarap de ra sé sangal e hwomo, ra wɔ rangâl Elisha, ra ye, “Hwà tɔk, Dagwi Darwey a rɔda jut dalɔ mo yi na hwo yunung a?” A ye, “Ey, ma tɔk. Sǎ hin yuu!”

⁶Eliya a to yâng Elisha hê netat, “A remo, sangal e ngamo, Dagwi Darwey a tomo me wɔ e Rɔt Yɔrdan.” Ko Elisha a ye, “Ma sira a hwo, sede remo de Dagwi Darwey a sé kwen, ko sede remo de hwà sé kwen arɔng, ma rɔda hala hwo wɛt.” Ano kwong, yɛn a re nuyel na kwɛngɛl o.

⁷Bezarap Dagwi behak kuru batungun ba raa hɛn yi e Yeriko vɔk e Yɔrdan o. Eliya na Elisha ba hwo tumal e vwarâ rɔt o, ko bezarap o ba tumal shan yi na yɛn.

⁸Eliya a hwo pat gworugu mɛ, a ngyisi gwɛ, ko a rusu nshî rɔt o na gwɛ. Nshi mo na gas ɛn zang ba, ko yɛ tanga Elisha ba ye dɔ vɔk e gura gworo e ra vwel hwogot.

⁹E hwomo, Eliya a yâng Elisha, “Ha a me pyɛ de ma rɔda ra a hwo, gyam na be jut me yi na hwo.” Elisha a yang ɛ, “Gwɛ̌ a me numo hak hê reto de hwà vɔk, na me bin jut fwom mō.”

¹⁰Eliya a yang ɛ, “Pyɛ de hwà rangal o, ya sé negbang, na me yang o ey. Hwà rɔda sɛ̀, ka sede hwà di, jeng de ba sé jut me yi e ngamo na hwo. Ko ka ano wɛt, hwà rɔda sɛ̀ wɛt.”

¹¹Jeng de yɛn a sé kyè be rɔ̌ ha, ko ras, kyɛkyɛ de bedwâ kya ba sé hwɔlɔ wa yel e tē mɛn, ko gûl sombabos gwa vɛ̌ jut Eliya vɔk e lagwi!

¹²Elisha a di, ko a hwo mok, a sé yishi Eliya, a tē, “À da hom! À da hom! Wo dûl BeIsrayɛl!” Jeng de a tɔk to di Eliya wɛt, a hamta gworugu mɛ bebak o beba yaga lashê yey.

¹³E bama mo, a jut gworugû Eliya de gwa ga gaba, a toyo hɛ, a wɔ tumal e rekwogôm Rɔt Yɔrdan.

¹⁴A rusu nshi na gwɛ, a ye, “Dagwi Darwey, Dagwî Eliya, a wɛ̌ arɛt?” Ko nshi mo na gas ɛn zang ba, ko a ye dɔ vɔk e gura gworo.

¹⁵Jeng de bezarap kuru batungun yi e Yeriko ba di ɛ, ko ba ye, “Elisha a sey retô Eliya!” Ba kyè wɔ man na yɛ, ba ye guduruk e nuyel mɛ,

¹⁶ba ye, “Wot a vɔk bemat kuru batungun vê gap. Ka hwà simo, yɛn ê wɔ̀ jama a hwo dalɔ mō. Gyeng rɔ̌, Gabik Dagwi Darwey ha ga jut ɛ, ha wɔ tik ɛ e raku hwak kɛ e nɛk hwak ayi.” Elisha a yang ɛn, “Wey, yin kwon wɔ̀ wɛt.”

¹⁷Ko yɛn a shonong e ra yɛ, ko a de simo a yɛn, a tik ɛn, ba kyè. Yɛn a tomo bemat kuru batungun, ba wɔ́ ba kyě jama hɛ, ba tɛ̀ nepɔlɔ netat, ko ba ka sɛ̀ ɛ wɛt.

¹⁸Bama mo, yɛn a toyo vey na Elisha, á rɔngɔl e Yeriko. Yɛ kwong a hwo yang ɛn, “Má ga sè nà ha a yin, yin kwon wɔ wɛt a?”

¹⁹Bemat behak yi e Yeriko ba wɔ na Elisha, ba ye, “À da, sede remo de hwà tɔk, repomo remo ra sé rat. Ko nshî sɔ̂ rɛ na de sé neves, ko ne to paa a beha nèy e nejim.”

²⁰Elisha a yang ɛn, “Jut in kwɛt pwas, ko yin tɛ̀ nevwashe, na yin vey a me mɛ.” Yɛn a vey mɛ,

²¹ko a wɔ e kwɔ̂n lwel nshi mo, a shusha ɛ nevwashe mo e ji nɛ. Ko a ye, “Pyɛ de Dagwi Darwey a ha a yet ngan: ‘Ma sé tɛ̀ nshi nemo ne tɛ́ ɛn nerat, na rɔda to vey na rekû mwat hwak kɛ nê paa nèy yi e nejim wɛt.’ ”

²²Ko mwin nshi nane na tɛ́ ɛn nerat vey e jeng yemo, tyɛng na pyɛ de Elisha a ha.

²³Elisha a hala Yeriko vɔk e Bet-Ɛl. E gwong gwane, nèy bewen nehak na nusu yi e ji repomo, na shɛgɛsh hɛ, na gbɔ, na tē, “À hwo mwât pɔf, nusu yi e ngamo! À hwo mwât pɔf, nusu yi e ngamo!”

²⁴Elisha a doyo, a bɛɛ nɛ ting, ko a tɛ̀ gawey e ra nɛ na rezâ Dagwi Darwey. Bèguna ngyama cak beba ba nusu yi e ji rehwot ba hama nèy kuru banaas na nɛ neba yi e ji nɛ cɛk o, cɛk o.

²⁵Elisha a re nuyel, a kyè vɔk e Raku Karmɛl, ko e bamâ jeng, a toyo hɛ vɔk e Samariya.