Read berom 2 Begwɔ̀m 20 Bible Online

2 Begwɔ̀m 20 - berom bible

2 Begwɔ̀m 20

¹E jeng yane, Hɛzɛkiya a hwo serɔ, a vey bagat ku. Yɛshaya Amotsi, zarap Dagwi a wɔ ha a yɛ, a yang ɛ, “Dagwi Darwey a ye, yong lɔ mō, yaga hwà rɔda dal yi e rɔ hemo wɛt. Hwó kyè wɔ ku.”

²Hɛzɛkiya a hwo doyo vɔk e vwarâ duk, ko a ra won, a ye,

³“Gabɔk wɛt, à Da, hwà tɔk, ma ga raa hwo sana tô yey. Ma ga ra pyɛ́ de hwó simo na mwa yey hom. Ma to ra kayɛ pyɛ de hwà ye, ya sé ryat.” Ko a hwo tosho sizɔng.

⁴Yɛshaya a nusu. Ko gyam na a wɔ wul lalâ lɔ gwɔ̀m, Dagwi Darwey a yang ɛ,

⁵“Toyo wɔ na Hɛzɛkiya, mwât nuyêl bemat hom, ko ha a yɛ ngan: Ma sé Dagwi Darwey, Dagwi de dâ beda mō Davit a re a yɛ fongol. Ma wok won mō, ko ma di nemwishil mō. Ma rɔda tɛ̀ o tyang. E pɔlɔ hê tat, hwà rɔda wɔ e ji gbɔng duk re a me fongol.

⁶Ma rɔda gwɛ̌ a hwo neshey kuru na ne netungun, ko ma rɔda dul o tanga gbɔng repomo mō yi na Da vwel Asirya. Ma rɔda gyeng gbɔng repomo remo yaga nerey hom, ko yaga tɛ̂ yey na mwât fwom hom Davit arɔng.”

⁷Yɛshaya a wo nɔng ha mo, ko a yâng bemât fwôm gbɔng gwɔ̀m o, “Vey in na nèy regwi de ba farang, na yin bana e ra râm gbɔng gwɔ̀m, ko a rɔda tɛ̀ tyang.”

⁸Hɛzɛkiya a rangâl Yɛshaya, a ye, “E sɛ́ yɛ à pyɛ de yê dura mwin, Dagwi Darwey a rɔda tɛ̀ me tyang, na me wɔ re a yɛ fongol e duk rê fongol mɛ e tuk hê tat arɛt?”

⁹Ko Yɛshaya a toyo a yɛ, a ye, “Dagwi Darwey a rɔda dura a hwo, a rɔda sila vonu mɛ. Pyɛ dura de ê nɔng o à yemo: Ê tɛ̀ necam gwi ne sek e nekwɔn bɔrɔs kuru e ra Kwɔ̂n Turûs Ahas. Hwô simo na ne tut kɛ ne gyirik arɛt?”

¹⁰Hɛzɛkiya a toyo a yɛ, a ye, “A sé negbang na necam ne tut e nekwɔn bɔrɔ̂s kuru wɛt. Me simo na ne gyirik.”

¹¹Yɛshaya a ra won, ko Dagwi Darwey a tɛ̀ necam ne gyirik e nekwɔn bɔrɔs kuru e ra kwɔ̂n turus o.

¹²Jeng de Mɛrɔdak Baladan, Da vwel Babilɔnya a wok, Hɛzɛkiya a kana ro ɛ, ko a ga tɛ̀ tyang a hwo tomo betom na bwok-rwang tanga nenɔrɔ vɔk na yɛ.

¹³Hɛzɛkiya a sey betom o na yey pyɛng, ko a dusa a yɛn mwa pyɛ̂ nedanerey mɛ, yɛ à dyam pyɛng, na dyam shinang, na pyɛ̂ nesang hyɔɔlɔl tanga něy nesang nerat de na sé e ji gban mɛ. A to gwɛ dura a yɛn pyɛ̂ como mɛ na mwa bwang pyɛ́ de a vɔk e begban mɛ. Vit a pyɛ de a tik nà dura a yɛn e ji lɔ gwɔ̀m na e ji segwɔm mɛ mwa.

¹⁴Ko Yɛshaya a vey na Hɛzɛkiya, a rangal hɛ, a ye, “Bemat vemo ba yi e gwa arɛt? E sɛ́ de yɛn e simo arɛt?” Hɛzɛkiya a toyo na ha, a ye, “Yɛn a vey yi e hwomo yikyik, yi e Babilɔnya.”

¹⁵Yɛshaya a to rangal hɛ, a ye, “E sɛ́ na sɛ́ de yɛn a di e ji lɔ mō ɛ?” Hɛzɛkiya a toyo a yɛ, a ye, “Yɛn a di kayɛ pyɛ. Vit a pyɛ e ji begban hom de ma tik nà dura a yɛn.”

¹⁶Ano kwong, Yɛshaya a yang ɛ, “Ma vɔk a hwo ha yi na Dagwi Darwey:

¹⁷Tuhak, ba rɔda ba hashe pyɛ̂ mwa de hwo na bedabeda mō ba kana bang, vɔk e Babilɔnya. Ey, Dagwi Darwey a ye, vit a pyɛ jining de ba rɔda tɛt ɛ.

¹⁸Ba rɔda ba hashe nèy mō nehak vɔk e Babilɔnya arɔng. E hwomo, bê byɛs nɛ, bê tɛ̀ nɛ, ne ra fwom e lɔ gwɔ̀m.”

¹⁹Hɛzɛkiya a yâng Yɛshaya, “Ha de hwà vey a me mɛ yi na Dagwi Darwey ha sé naka.” A to yâng to mɛ, “Ko sangâl netyang hê sè e jeng hom.”

²⁰Bwang pyɛ́ de Hɛzɛkiya a ra na mwa wɛng de a bɛrɛng tanga kadung na gwong nshi de a yong na ne yel e ji Yɛrusalɛm, ba jɛk yɛ mwa e ji Bwok-basâ Pyɛ̂ Bare yê Begwɔ̀m Yuda

²¹Jeng de a ku, ba lɛrɛ hɛ e sak beda mɛ, ko sɔ mɛ Manase a re negwɔm e to mɛ.