Read berom 2 Begwɔ̀m 21 Bible Online

2 Begwɔ̀m 21 - berom bible

2 Begwɔ̀m 21

¹Manase a vɔk neshey kuru na nɛ neba jeng de a hwo re negwɔm, ko a re negwɔm o neshey kuru batungun na nɛ netungun (55) e Yɛrusalɛm. Neng mɛ à Hɛfsi-Ba.

²Manase a ra a Dagwi Darwey banɛn, a raa negwɔn byɛm-byɛm yere ne bemât vwel de Dagwi Darwey a ró ɛn yi na BeIsrayɛl.

³A to lɔk nekwɔn sekwit de da mɛ Hɛzɛkiya a kana gangas nɛ. A lɔk nekwɔn nása nenɔrɔ vɔk na ci Baal, ko a to tɛ̀ swesêk Ashera, ci hwā mo, tyɛng sede remo de Gbɔng Gwɔ̀m Ahap wo Israyɛl á kana ra. A to re a netangacɛn fongol.

⁴E ji Gbɔng Duk Re Fongol e Yɛrusalɛm, a lɔkɔs ɛ nekwɔn nása nenɔrɔ vɔk na cī. A ra ano, mwa ano de Dagwi Darwey a kana ye, e kwɔn a hemo de bê re a yɛ fongol.

⁵A to tɛ̀sɛ nekwɔn nása nenɔrɔ vɔk na netangacɛn e nelala neba ne Gbɔng Duk o.

⁶A nára sɔ mɛ sede nɔrɔ̂ rangas vɔk na cī. A ra vyoshon na bes tanga negarap, ko a ha na bevuvwel. A ra a Dagwi Darwey pyɛ́ vyes ding-ding, yemo de ya tɛ̀ shôm Dagwi Darwey ya sogo.

⁷A tɛ̀ swesêk Ashera, ci hwā mo, e ji Gbɔng Duk Re Fongol arɔng. A ra ano, mwa ano de Dagwi Darwey a kana yâng Davit tanga sɔ mɛ Sɔlɔmɔn, a ye, “A sé e ngamo e Yɛrusalɛm e ji Gbɔng Duk womo de me simo be re a me fongol nesheneshey. Ma ga kasa gbɔng repomo mo yi e mwa bavwêl yére kuru na yɛ bya ye Israyɛl.

⁸Ka sede BeIsrayɛl ba rɔda raa badu hom mwa, na be to gyeng badu de mwât fwom hom Mose a kana nɔng ɛn, ko ma rɔda simo be pat ɛn yi e vwel de ma kana nɔ̂ng bedabeda mɛn wɛt.”

⁹Ko BeYuda ba ka raa Dagwi Darwey wɛt. Manase a hwɔlɔ hɛn, ba ragas banɛn de ba dal vê bemât bavwel de Dagwi Darwey a ga ró ɛn ɛ jeng de bemat mɛ bá sè kyè vey.

¹⁰Tuhak, Dagwi Darwey a yâng bezarap mɛ behak, a ye,

¹¹“Gbɔng Gwɔ̀m Manase a ga ra pyɛ́ byɛm-byɛm de ya dal ye BeAmɔr. Yaga cī mɛ, a ga tɛ̀ bemat hom be ra banɛn.

¹²Di, me Dagwi Darwey, Dagwî Israyɛl ma rɔda wey na Yuda tanga Yɛrusalɛm! Bemat ba rɔda wok ha mo, ko yɛn ê tē jigim.

¹³Yɛrusalɛm wa ga tɛ́ ɛ wo banɛn tyɛng sede remo de Ahap tanga bemât Samariya bá sè. Ma rɔda tabak wɛ siitit. Ma rɔda yishing bemat yi e wɛ, sede remo de mwat a yishing shǐ, na a ye gup a hɛ, he hworok.

¹⁴“Ma rɔda kyini bwang bemat hom de ba dalas. Ma rɔda nára vɛ e vwɔ̂ bemât repugu mɛn vemo de bê sey ɛ pyɛ́ mɛn.

¹⁵Mê ra ano, yaga bemat hom ba ga ra pyɛ́ de ma kyɛ́ mɛ́. Yimo de bedabeda mɛn ba nusu yi e Misra vey e yunung, yɛn a dopse tɛ̀sɛ a me ɛ shom.”

¹⁶Manase a tɛ̀, be mɔbɔs bemat hyiw de ba ka ra nɛn wɛt. Ano de nemi mɛn na sila nehyok Yɛrusalɛm. A ra ano, a gwɛ̌ e ra banɛn de a ga tɛ̀ BeIsrayɛl be ragas.

¹⁷Bwâng pyɛ́ de Manase a ra mwa na banɛn baves mɛ, ba jɛk yɛ e ji Bwok-basâ Pyɛ̂ Bare yê Begwɔ̀m Yuda.

¹⁸Jeng de a ku, ba lɛrɛ hɛ e bwi bagat na majey lɔ gwɔ̀m de ba tang gwɛ a Bwî Uza. Ko sɔ mɛ Amɔn a re negwɔm e to mɛ.

¹⁹Amɔn a vɔk neshey kuru baba na nɛ neba jeng de a hwo re negwɔm, ko a re negwɔm o yi e Yɛrusalɛm neshey neba. Neng mɛ à Mɛshulɛmɛt, hwông Harus yi e Yɔdba.

²⁰Amɔn a ra a Dagwi Darwey banɛn tyɛng sede da mɛ Manase.

²¹A raa negwɔn neves tyɛng na da mɛ. A sap cī, ko a re a yɛ fongol, sede remo de da mɛ a ra.

²²A doyo a Dagwi Darwey ma, Dagwi de bedabeda mɛ ba kana re a yɛ fongol, ko a kyɛ́ ɛ nà raa badu mɛ.

²³Behak e ji bemât nuyel fwom mɛ ba yong begwong nengyas, ko ba mɔrɔ hɛ e ji lɔ gwɔ̀m.

²⁴Ko BeYuda ba mɔbɔs bemât mɔrɔ mɛ mo mwa, ko yɛn a tɛ̀ a hwey mɛ Yɔsiya ɛ negwɔm.

²⁵Bwang pyɛ́ de Amɔn a ra, ba jɛk yɛ e ji Bwok-basâ Pyɛ̂ Bare yê Begwɔ̀m Yuda.

²⁶Ba lɛrɛ hɛ e sak mɛ e Bwî Uza, ko hwey mɛ Yɔsiya a re negwɔm e to mɛ.