Read berom 2 Begwɔ̀m 22 Bible Online

2 Begwɔ̀m 22 - berom bible

2 Begwɔ̀m 22

¹Yɔsiya a vɔk neshey rwit zɔng jeng de a hwo re negwɔm, ko a re negwɔm o neshey kuru batat na hɛ hining. Neng mɛ à Yɛdida, hwông Adaya yi e Boskat.

²Yɔsiya a raa pyɛ́ de ya jam a Dagwi Darwey. A raa negwɔn da mɛ Davit, ko a ka hala nɛ ko tyɔng wɛt.

³E shey hê kuru na hɛ rwit hê negwɔm mɛ, Yɔsiya a tomo Shafan Azaliya Mɛshulam, mwat-jɛk mɛ, vɔk e ji Gbɔng Duk Re Fongol. A yang ɛ,

⁴“Wɔ yang Hilkiya, darwey bepiris, a tula dyām de bemat ba nɔngɔs yi e vwɔ bemât gyeng duk o.

⁵Tɛ̀ ɛ, a nɔ̂ng bemât nuyêl bɛrɛ̂ng fwôm yongôs Gbɔng Duk o yɛ. Bê vɛ dyām o cak, bê talsa mɛ bemât fwom,

⁶vɛ à bemât fwôm yông cɔ́gɔt, na bemât lɔk, na bemât lɔk na beta. Yɛn ê jut bwang o, na be sey mɛ cɔ́gɔt na beta de bê ra mɛ fwôm yông duk o arɔng.

⁷Bê rangal hɛn gwong de ba ra mɛ fwom na dyām o wɛt, yaga yɛn a sé bemat de ba vɔk tsak o.”

⁸Jeng de Shafan a ga kana nɔng hâ gbɔng gwɔ̀m o, Hilkiya a nára a yɛ bwok-basa, a yang ɛ, “Di, Bwok-basâ Badu Dagwi de ma sɛ̀ e ji Gbɔng Duk Re Fongol o.” Shafan a basa gwɛ.

⁹E bama mo, a toyo vɔk na Yɔsiya, a wɔ̀ nɔng ɛ nuha, a ye, “Bemât nuyêl fwom mō ba tula dyām e ji Gbɔng Duk Re Fongol, ba ga nɔ̂ng bemât bɛrɛ̂ng fwôm yongôs duk rê fongol yɛ.”

¹⁰Ko a to ye, “Di, à da! Hilkiya, darwêy bepiris a nɔng me Bwok-basa gwomo.” Ko a hwo basa a yɛ gwɛ.

¹¹Jeng de Yɔsiya a wok pyɛ́ de ba jɛk e ji Bwok-basa Badu Dagwi o, a vɛ̌ hama gworugu mɛ yaga lashê yey.

¹²Ko a tɛ̀, be yishi bemât nuyel mwa, vɛ à Hilkiya, na Ahikam Shafan, na Akbɔr Mikaya, tanga Shafan, mwat-jɛk, na Asaya, mwat ra a yɛ fwom. A yang ɛn,

¹³“Cī in, na yin wɔ rangal a me tanga bemat mwa e vwêl Yuda, yi na Dagwi Darwey. Rangal hin hɛ e ra pyɛ́ de ba jɛk e ji bwok-basa gwomo. Dagwi Darwey a vɔk shom sizɔng na wot, yaga bedabeda mot ba kyɛ́ ɛn nà gyeng badu de ba jɛk e ji bwok-basa mo.”

¹⁴Bemat vane betungun ba nusu yi e hwomo, ba pere wɔ na Hulda, hwā zarap. Rwas mɛ à Shalum Tikva Harhas, mwat de berugû gbɔng gwɔ̀m be se e vwɔ mɛ. Hulda mo á sè na sangal e bak pwas wo Yɛrusalɛm. Yɛn a pom, ko yɛn a ha a yɛ hâ gbɔng gwɔ̀m o.

¹⁵A toyo a yɛn na ha, a ye, “Ha in a mwat de a tomo hin na me ngan: Pyɛ́ ma yemo de Dagwi Darwey, Dagwî Israyɛl a ha: Ma rɔda tɛ̀ rezot re hwo e ra Yɛrusalɛm mwa na bemat de be sangal ɛ, tyɛng na pyɛ de ba jɛk e ji bwok-basa gwomo de gbɔng gwɔ̀m Yuda a ga basa.

¹⁷Bemât Yuda ba ga kyɛ́ ɛn me. Ba ga nása a cī nenɔrɔ. Yɛn a tɛ̀ shom hom ya sogo yaga pyɛ̂ sekwit de yɛn a ga yong. Shom hom ye lolo sede kya e ra repomo remo. Vit a pyɛ de yê rimi yɛ wɛt.”

¹⁸“Ko yaga gbɔng gwɔ̀m de a tomo hin, na yin vey rangâl Dagwi Darwey, ma vɔk neha nemo ngan: Pyɛ́ ma yemo de Dagwi Darwey, Dagwî Israyɛl a ha: Hwà wok neha bwok-basa gwomo,

¹⁹ko nà ra a hwo yey. Hwà dyɛng to mō jeng de hwà wok pyɛ́ de ma ha e ra Yɛrusalɛm na bemat wɛ. Mwin, ma ye, mê tɛ̀ repomo mo re tɛ́ ɛ sede hêy gbingiring, kwɔn de ma kyini hɛ. Hwà hama berugu mō, ko hwà tosho. Yaga ano, ma ga wok won mō.

²⁰Ma rɔda tik hwô ku e ji netyang, ko bê lɛrɛ hwo e ji sak beda mō. Ano de hwô tɔk di rezot de mê vey mɛ e ra Yɛrusalɛm wɛt.” Bemat o ba toyo vɔk na Yɔsiya na ha mo.