Read berom 2 Begwɔ̀m 23 Bible Online

2 Begwɔ̀m 23 - berom bible

2 Begwɔ̀m 23

¹Gbɔng Gwɔ̀m Yɔsiya a yishi mwa bemakuk yi e Yuda tanga Yɛrusalɛm, na be tula hɛn.

²A kyè na yɛn vɔk e Gbɔng Duk Re Fongôl Dagwi Darwey. Mwa BeYuda na bemât Yɛrusalɛm, na bepiris tanga bezarap Dagwi ba raa hɛn. Jeng de ba man e hwomo, a hwo basa a yɛn Bwok-basâ Wuna-na-sirâ Dagwi mwa gwomo de ba sɛ̀ e ji Gbɔng Duk Re Fongol o.

³Jeng de a yɛnɛ basa mo, a tumal e hagât gwobirîk dyam pama de gwa sé bagat na rwi duk o. A wuna hɛ na sira tanga Dagwi Darwey, na a raa hɛ na yey mɛ na simo mɛ mwa, na a to gyeng badu mɛ mwa. Bemat o ba vo nu, bê gyeng wuna-na-sira mo arɔng.

⁴Gbɔng Gwɔ̀m Yɔsiya a nɔ̂ng Hilkiya, darwêy bepiris, na bepiris besɛl o, tanga bemât gyeng rwi duk o nu, a ye, “Yel in e ji duk rê fongôl Dagwi Darwey, na yin wɔ paa pyɛ̂ mwa de ba kana ra mɛ fwom e de re a Baal na Ashera tanga netangacɛn fongol.” Yɛn a ra ano, ko Yɔsiya a nɔng nu be rangas yɛ e Nɛk Kidrɔn e bamâ repomô Yɛrusalɛm, na be jut fongol o vɔk e repomô Bet-Ɛl.

⁵A to tɛ̀, ba paa bedâ sekwit yi e nekwɔn sekwit e vwêl Yuda mwa na e nemo de na rɔnɔ Yɛrusalɛm. Bemat a vemo de begbɔng begwɔ̀m Yuda ba kana tɛ̀sɛ hɛn, na be nása nenɔrɔ vɔk na Baal tanga vɔk na gwi, na pwɛl tanga netangacɛn.

⁶A to tɛ̀, be pat swesêk Ashera, ci hwā mo, yi e ji duk rê fongol. Ba kyè mɛ vɔk e Nɛk Kidrɔn, ba wɔ rangas gwɛ. A tɛ̀, ba hwongo bèlili mo, ba kyè mɛ, ba wɔ bere e ra besak de ba lɛsɛ ɛ bepɛng.

⁷A tɛ̀ be gangas neduk beras de ba ragas ɛ nejwang de na sè e lalâ duk rê fongol, kwɔn a hane de beha ba lɔkɔs ɛ berugû bangâs swesêk Ashera, ci hwā mo.

⁸Yɔsiya a tɛ̀ bepiris de ba ra fwom e kahɛ pomo e vwel Yuda be vey e Yɛrusalɛm, ko a tɛ̀ mwa nekwɔn nása nenɔrɔ nane yi e Geba vɔk e Bɛɛr-Sheba na tɛ́ ɛn yapyi. A to tɛ̀ be gangas nekwɔn nása nenɔrɔ de na sè e hagât rùhup gbɔng repomô Yɛrusalɛm, a kat mɛ hemo de há sè e hagât ruhûp Yɔshuwa, gbɔng o wo repomo mo. Ha tumal e vwɔ mwɛlɛ̂ng mwat de a sé yel e repomo mo.

⁹Bepiris vane de ba vey mɛ e Yɛrusalɛm ba tɔk ra fwom e ra kwɔ̂n nása nenɔrɔ vɔk na Dagwi Darwey wɛt. Ko ba simo a yɛn be re kpam-tuk sana géy-sing wo kwɔn jɛrɛ tyɛng na bemɛn yi e Yɛrusalɛm.

¹⁰Yɔsiya a tɛ̀ Tɔfɛt, kwɔ̂n sekwit e Nɛk Hinɔm yapyi, yaga na bemat be kwon to nása ɛ nèy mɛn bewen na behwong sede nenɔrɔ̂ rangas vɔk na ci Molek wɛt.

¹¹A to tɛ̀ be wey na bedwa vane de begbɔng begwɔ̀m Yuda ba ra mɛ fwom e jeng nzem de bá re a gwi mɛ fongol, ba to rangas ɛ bekyɛkyɛ̂ bedwa mó arɔng. Ba kana tik bedwa mo bagat na kwɔ̂n yelês Gbɔng Duk Re Fongôl Dagwi Darwey e majey bagat na duk gbɔng mwât fwom de reza mɛ a Natan-Mɛlɛk.

¹²Yɔsiya a to tɛ̀ be gangas nekwɔn nása nenɔrɔ de begbɔng begwɔ̀m Yuda ba kana lɔk e ragyip duk lɔ gwɔ̀m Ahas. A tɛ̀ be gangas bwang nekwɔn nása nenɔrɔ nemo de Manase a kana lɔk e nelala neba ne Gbɔng Duk Re Fongol hywiri. Ba bomos beta mo e Nɛk Kidrɔn.

¹³Bama hane, a tɛ̀ nekwɔn sekwit de Sɔlɔmɔn a kana lɔk e rwa batîn Raku Pat de wa sé e rwa rak na Yɛrusalɛm, nà tɛ́ ɛn yapyi. E nekwɔn nane mo ba sap ɛ cī byɛm-byɛm, yɛ à Astarte, ci hwā ye BeSidɔn, na Kɛmɔsh, ci BeMowap tanga Milkɔm ci BeAmɔn.

¹⁴A tɛ̀ be mɔbɔs beta gacik de bemat ba tɛ̀ vɛ pyɛ̂ sekwit, na be tow sesêk Ashera, ci hwā mo. Ko ba tula bekup bemat, ba bang mɛ kwɔn o.

¹⁵Ko Yɔsiya a ka tala e ngyen wɛt. E Bet-Ɛl a to wɔ wey na kwɔ̂n nása nenɔrɔ mwa na kwɔn sekwit de Yɛrɔbɔwam Nebat a kana lɔk, womo de a tɛ̀ BeIsrayɛl be ra banɛn. Yɔsiya a tɛ̀ be rangas kwɔ̂n sekwit o mwa na swesêk Ashera na kya, a hwongo, nè tɛ́ ɛn fongol.

¹⁶Sede a gwɔrɔ na bayis, a bɛrɛng, ko a di besak e bak rahwol, a tɛ̀, be wɔ paa bekup yi e ji mo, be hashe vɛ, be rangas e ra kwɔ̂n nása nenɔrɔ na he tɛ́ ɛ yapyi. Pyɛ́ yemo ya té tyɛng na pyɛ de zarap Dagwi a kana ha jeng de Yɛrɔbɔwam a tumal bagat na kwɔ̂n nása nenɔrɔ á sè ra nzem. Ko Yɔsiya a di sak de ba lɛrɛ ɛ zarap wane mo.

¹⁷Ko a rangal, a ye, “Sak wà a vane ɛ?” Bemât repomo mo ba toyo na ha, ba ye, “Ba sé ve zarap yi e Yuda, womo de a ha pyɛ́ de ya rɔda té na kwɔ̂n nása nenɔrɔ hemo mo.”

¹⁸Yɔsiya a yang ɛn, “Tik in vɛ. Yin kwon paa bekup mɛ wɛt!” Yaga ano, yɛn a ra bekup mɛ mwa na vê zarap wane de a yi e Samariya arɔng wɛt.

¹⁹Begbɔng begwɔ̀m Israyɛl ba kana lɔkɔs nekwɔn sekwit e bapomô vwêl Samariya. Yi ano, bá tɛ̀ shom ya sogo a Dagwi Darwey. Ko Yɔsiya a tomo be wɔ gangas nekwɔn o, tyɛng sede remo de a ga tɛ̀, be ra e Bet-Ɛl.

²⁰A mɔbɔs bedâ sekwit o mwa e ra nekwɔn nása nenɔrɔ mo, ko a rangas bekup bemat e ra nɛ arɔng. Bamâ pyɛ́ yane mwa, Yɔsiya a toyo vey e Yɛrusalɛm.

²¹Yɔsiya a nɔ̂ng BeYuda mwa nu, a ye, “Rá in Nzem Gyilsit Nelɔ, yaga na be nɔ̂ng Dagwi Darwey, Dagwi min mɛ nerey tyɛng sede remo de ba jɛk e ji Bwok-basâ Wuna-na-sirâ Dagwi.”

²²Ba kana ra Nzem Gyilsit Nelɔ e gwong gwomo e jeng bemât nuyêl Israyɛl kɛ e jeng begbɔng begwɔ̀m Israyɛl na Yuda wɛt.

²³Ko e shey hê kuru na hɛ rwit hê negwɔm Yɔsiya, bemat ba hwo ra nzem o e Yɛrusalɛm e gwong de ba jɛk e ji bwok-basa mo.

²⁴Yɔsiya a raa pyɛ́ de ba jɛk e ji Bwok-basâ Badu gwomo de Hilkiya, darwêy bepiris a sɛ̀ e ji Gbɔng Duk Re Fongol. A ro bemat de ba ha na bevuvwel. A mɔbɔs mwa yére pyɛ̂ sekwit tanga pyɛ̂ byɛm-byɛm de ba sɛ̀ e vwêl Yuda mwa na Yɛrusalɛm.

²⁵Vit a gbɔng gwɔ̀m de a tānga re negwɔm e ra yɛ kɛ wo bama mɛ de a ye ngyɛ́k na a sè pang na Dagwi Darwey na yey mɛ, na simo mɛ, na gap mɛ mwa, sede Yɔsiya. A raa pyɛ́ de ba jɛk e ji Badu Mose tyɛng.

²⁶Ko mwa ano, Dagwi Darwey a rɔɔ tē puu na shom na BeYuda. E Manase de a tɛ̀ a yɛ shom o yi na pyɛ́ vyes de a ra.

²⁷Pyɛ ma yemo de ya tɛ̀ Dagwi Darwey a ye, “Ma rɔda ro BeYuda, na me gas ɛn na me, tyɛng sede remo de ma ga ra na BeIsrayɛl. Ma rɔda kyɛ́ me Yɛrusalɛm, mwa ano de ma kasa wɛ yaga to hom. Ma rɔda kyɛ́ me duk rê fongol de ba lɔk, yaga na be nɔ̂ng reza hom mɛ nerey.”

²⁸Bwang pyɛ́ de Yɔsiya a ra, ba jɛk yɛ e Bwok-basâ Pyɛ Bare yê Begwɔ̀m Yuda.

²⁹Jeng de Yɔsiya a re negwɔm, Gbɔng Gwɔ̀m Neko wo Misra a kyè tanga bemât como mɛ wɔ e Gwɔrɔt Ɛifaratɛs, na a wɔ sɛlɛ Da vwel Asirya. Gbɔng Gwɔ̀m Yɔsiya a wɔ wul na Neko mo, ko ba vɛ̌ mɔrɔ hɛ e Megido e susû como mo.

³⁰Bemât fwom mɛ ba jut revin mɛ, ba tɛ̀ rɛ e ji kyɛkyɛ̂ como, ba kyè mɛ vɔk e Yɛrusalɛm, ko ba lɛrɛ rɛ e ji sak mɛ. BeYuda ba shushu Yɛhɔwahas, na něy pwat e rato, na be tɛ̀ ɛ gwɔ̀m mɛn e to mɛ.

³¹Yɛhɔwahas a vɔk neshey kuru baba na nɛ netat (23) jeng de a hwo re negwɔm, ko a re negwɔm o yi e Yɛrusalɛm pɛl tat zɔng. Neng mɛ à Hamutal, hwông Yirmiya yi e Libna.

³²A ra a Dagwi Darwey banɛn, tyɛng sede remo de bedabeda mɛ ba ra.

³³Gbɔng Gwɔ̀m Neko wo Misra a tɛ̀ be vo Yɛhɔwahas, ba tɛ̀ ɛ e ngyang e Ribla e bak vwêl Hamat. Ko a tɛ̀ BeYuda be talsa hɛ dyam pyɛng sede ton benaas, na dyam shinang de ya wul sede kilo kuru batat.

³⁴E bama mo, a tɛ̀ Ɛliyakim hwêy Yɔsiya hak, ha tɛ́ ɛ gbɔng gwɔ̀m Yuda, ko a sege a hɛ rezâ Yɛhɔyakim. A tɛ̀ Yɛhɔwahas e ngyang, a kyè mɛ vɔk e Misra. E hwomo de Yɛhɔwahas o a ku.

³⁵Yɛhɔyakim a tɛ̀sɛ BeYuda be talsa hɛ dyâm vwel de ya dal yemo de be talsa yaga na a bin tala mɛ Gbɔng Gwɔ̀m Neko dyam pyɛng tanga dyam shinang de a tɛ̀ a yɛ ɛ.

³⁶Yɛhɔyakim a vɔk neshey kuru baba na nɛ netungun (25) jeng de a hwo re negwɔm, ko a re negwɔm o neshey kuru na hɛ hining yi e Yɛrusalɛm. Neng mɛ à Zɛbida, hwông Pedaya yi e Ruma.

³⁷Yɛhɔyakim a ra a Dagwi Darwey banɛn, tyɛng sede remo de bedabeda mɛ ba ra.