Read berom 2 Begwɔ̀m 24 Bible Online

2 Begwɔ̀m 24 - berom bible

2 Begwɔ̀m 24

¹Jeng de Yɛhɔyakim á sè re negwɔm, Nɛbukadnɛzar, Da vwel Babilɔnya a vey hwo e ra Yuda. Yɛhɔyakim a vɛ̌ nɔng to mɛ, a raa hɛ neshey netat. E bama mo, a sogo nehywɛ, a kyɛ́ ɛ nà raa hɛ.

²E jeng yane, Dagwi Darwey a hwo tomo bagyeng bemat yi e Babilɔnya, na Sirya, na Mowap tanga Amɔn, na be wɔ jugu vwêl Yuda. Ba yel e vwel o, ko ba lashe hɛ, sede remo de Dagwi Darwey a kana ha yi e nû bemât fwom mɛ, bezarap mɛ.

³Dagwi Darwey a tɛ̀ negbang nemo ne hwo e ra BeYuda, na a bin ro ɛn, na a gas ɛn na yɛ yaga banɛn mwa de Manase a kana ra.

⁴A kana tɛ̀ be mɔbɔs bemat de ba ka ra nɛn wɛt. Ano de nemi mɛn na sila Yɛrusalɛm. Ko Dagwi Darwey a simo a hala pyɛ́ yane wɛt.

⁵Bwang pyɛ́ de Yɛhɔyakim a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda.

⁶Jeng de a ku, ba lɛrɛ hɛ e sak beda mɛ, ko sɔ mɛ Yɛhɔyacin a re negwɔm e to mɛ.

⁷E jeng o, Gbɔng Gwɔ̀m Nɛbukadnɛzar a ga kana re Gbɔng Gwɔ̀m Neko wo Misra na como, a vɛ̌ vɔk reto e ra mwa vwel mɛ yi e Rɔt Misra vɔk e Gwɔrɔt Ɛifaratɛs. Yaga ano Gbɔng Gwɔ̀m Neko a tɔk to nusu yi e vwel mɛ wɛt.

⁸Yɛhɔyacin a vɔk neshey kuru na nɛ rwit jeng de a hwo re negwɔm, ko a re negwɔm o pɛl tat zɔng yi e Yɛrusalɛm. Neng mɛ à Nɛhushta, hwông Ɛlnatan yi e Yɛrusalɛm.

⁹Yɛhɔyacin a ra a Dagwi Darwey banɛn, tyɛng sede remo de da mɛ a ra.

¹⁰E bamâ jeng tyɔng de Yɛhɔyacin a mɛsɛng re negwɔm o, Da Vwel Nɛbukadnɛzar wo Babilɔnya a tomo bagyɛng bemât como mɛ ba vey hwo e ra Yɛrusalɛm, ba rɔnɔ wɛ.

¹¹E jeng o, Nɛbukadnɛzar pyɛ mɛ a pom e ra gbɔng repomo mo.

¹²Ko Yɛhɔyacin tanga neng mɛ, mwa na bemât badu, na bemât nuyêl como, na bemât nuyêl lɔ gwɔ̀m ba nára to mɛn e vwɔ̂ Nɛbukadnɛzar. Nɛbukadnɛzar kwong a tɛ̀ Yɛhɔyacin e ngyang. Pyɛ́ yane ya té e shey hê rwit hê negwɔm Nɛbukadnɛzar, Da vwel Babilɔnya.

¹³A tɛ̀ be hashe pyɛ́ ryat mwa yi e lɔ gwɔ̀m tanga yi e Gbɔng Duk Re Fongol. Ba to paa mwa dyam shinang de ba tɔrɔ mɛ duk rê fongol de Sɔlɔmɔn a kana yong mɛ wɛ, tyɛng sede remo de Dagwi Darwey a kana ha.

¹⁴A to hashe bemat gu kuru (10,000) yi e Yɛrusalɛm vɔk e de sesam, vɛ à mwa bedagwɔm na bemât nuyêl como, na mwa bemât sekwɛl tanga bezu. A de tik ɛ bepɛng zɔng e Yuda.

¹⁵Nɛbukadnɛzar a jut Gbɔng Gwɔ̀m Yɛhɔyacin vɔk e Babilɔn, a wuna ɛ neng mɛ, na bemât nuyêl lɔ gwɔ̀m, tanga begbɔng BeYuda arɔng.

¹⁶A kyè na bemât como gu bataama tanga bemât sekwɛl na bezu gu rining, mwa yɛn de bê sɛlɛ e como.

¹⁷E bama mo, Nɛbukadnɛzar a tɛ̀ Mataniya, gwasha Yɛhɔyacin, a tɛ́ ɛ gbɔng gwɔ̀m Yuda, ko a sege a yɛ reza à Zɛdɛkiya.

¹⁸Zɛdɛkiya a vɔk neshey kuru baba na hɛ hining (21) jeng de a hwo re negwɔm, ko a re negwɔm o yi e Yɛrusalɛm neshey kuru na hɛ hining. Neng mɛ à Hamutal, hwông Yirmiya yi e Libna.

¹⁹Zɛdɛkiya a ra a Dagwi Darwey banɛn, tyɛng sede remo de Yɛhɔyakim a ra.

²⁰Pyɛ mo ya ga vey a Dagwi Darwey ano. Shom mɛ ya sogo ding-ding na bemât Yɛrusalɛm na BeYuda. Yaga ano, a ro ɛn, a gas ɛn yi na yɛ. Ko Zɛdɛkiya a sogo a Da vwel Babilɔnya nehywɛ.