Read berom 2 Begwɔ̀m 25 Bible Online

2 Begwɔ̀m 25 - berom bible

2 Begwɔ̀m 25

¹E shey hê shanetat hê negwɔm Zɛdɛkiya, gbɔng gwɔ̀m Babilɔnya, Nɛbukadnɛzar a tula bemât como mɛ mwa. E pɔlɔ pwɛl hê kuru e pwɛl gwo kuru, a vey hwo e ra Yɛrusalɛm. Ba rɔnɔ gbɔng repomo mo ko ba lɔkɔs nekwɔn kweres wɔ tut e ra jwâ-pomo mo.

²Bamâ shey hining na bit o, pyɛ̂ re e Yɛrusalɛm ya ga tala hɛ. Ko e pwɛl gwo naas e pɔlɔ hê shatat,

⁴bemât comô Babilɔnya ba kulu jwâ-pomo, ba yel e ji gbɔng repomo mo. E ji turuk hane mo, Gbɔng Gwɔ̀m Zɛdɛkiya tanga bemât como mɛ ba tele, ba nu ɛn e rwi de gwa sé e tê bejwâ-pomo beba bagat na bwî lɔ gwɔ̀m, mwa ano de bemât comô Babilɔnya ba ga rɔnɔ Yɛrusalɛm. Yɛn a tele wɔ e gwong vɔk e Nɛk Yɔrdan.

⁵BeBabilɔn ba raa hɛn, ba vo gbɔng gwɔ̀m e Tyɛ̂l Yeriko. Ko bemât como mɛ ba shara hɛn kpɛɛ.

⁶Ba kyè na Zɛdɛkiya vɔk na Nɛbukadnɛzar e Ribla. Ba ra a yɛ shɔt e hwomo, ba sɛ̀ ɛ na renɛn.

⁷Ba mɔbɔs nèy mɛ bewen o e hwomo e bayis mɛ. Ba to paa a yɛ bayis arɔng, ba rɔgɔs hɛ na ngyang yê dyam pama, ko ba kyè mɛ vɔk e gbɔng repomô Babilɔn.

⁸E shey hê kuru na he shatat hê negwɔm Nɛbukadnɛzar, e pɔlɔ pwɛl hê taama e pwɛl gwo netungun, Nebuzaradan a vey pom e Yɛrusalɛm. Yɛ á sè gbɔng o wo bemât gyêng Da Vwel.

⁹A dak kya e Gbɔng Duk Re Fongôl Dagwi Darwey, na lɔ gwɔ̀m tanga mwa nelɔ begbɔng o e ji repomo mo, na mwa pyɛ de kya hê tɔk re.

¹⁰Ko a nɔ̂ng bemât como mɛ mwa redu, na be gangas jwa de ba rɔnɔ mɛ gbɔng repomo mo.

¹¹E bama mo, a tɛ̀ be kyè na mwa bwang bemat de ba tɛt ɛ e ji repomo mo tanga vemo de ba kana wɛrɛn e bǔk BeBabilɔn vɔk e de sesam.

¹²Ko a de tɛt ɛ behak e ji bepɛng zɔng, yaga na be ra fwom e ji bě anap tanga cāp.

¹³Bemât comô Babilɔnya ba mɔbɔs bègbɔng bebirik ve dyam pama beba vemo de ba tɛ̀ cik e nuyel Gbɔng Duk Re Fongol, na bekyɛkyɛ̂ dyam pama kuru, mwa na gwogbɔng gwopey dyam pama de ba tang gwɛ à Gworep, yaga na be bin kyè na dyam pama yane mwa vɔk e Babilɔnya.

¹⁴Ba hashe mwa pyɛ̂ dyam pama yemo de ba ra mɛ fwom e ji duk rê fongol, ba wuna ɛ na mwa berwey, na becebut, na pyɛ̂ rimî kyâ kywa-kya tanga begance.

¹⁵Ba to hashe pyɛ̂ mwa de ba yong na dyam shinang na dyam pyɛng, ba wuna ɛ na bapêy cilâ kya tanga bèkɛt sɛ̂t nemi.

¹⁶Nètey dyam pama de ba kaba yi e bègbɔng bebirik beba mo, na gwogbɔng gwopey o tanga bekyɛkyɛ mo, vemo de Sɔlɔmɔn a kana yong yaga duk rê fongôl Dagwi Darwey na dal gâp mara.

¹⁷Nelîs kagwɛ gwobirik o na wul mita shabetat. Kagwɛ mo gwa vɔk bong dyam pama de nelîs wɛ na se mita gwining na bit o. Ba tɔrɔ nû kawɛ bong o na bewɔ́rɔ dyam pama de ba sɔksɔl ɛ tanga nèy cɔ́gɔt pomigiranet ne dyam pama arɔng.

¹⁸Nebuzaradan gbɔng o wo bemât gyeng Da Vwel a tɛ̀ be vo Seraya, darwêy bepiris, na Tsefanya, mwat swɛl o, tanga bepiris betat de ba gyenges rwi duk rê fongol o.

¹⁹A tɛ̀ be to vo mwât nuyel bemât como hwak, na bemat de be vos a gbɔng gwɔ̀m badu betungun, tanga mwât fwom de a tulsa bemat vɔk e de como. Ba to vo bemat behak kuru batyiimin vemo de ba rɔngɔl e Yɛrusalɛm.

²⁰Nebuzaradan a kyè na yɛn mwa vɔk na Da vwel Babilɔnya de á sè e Ribla, e bak vwêl Hamat. Ko Nɛbukadnɛzar a tɛ̀, be mɔbɔs hɛn e hwomo. Ano de ba hashe BeYuda yi e vwel mɛn.

²²Nɛbukadnɛzar a tɛ̀ Gedaliya Ahikam Shafan a bɛrɛng kebwang bemat de ka tɛt ɛ e vwêl Yuda na sangal.

²³Jeng de bemât nuyêl como vemo de ba sɛ̀ be vos ɛn wɛt ba wok, Gedaliya a ga tɛ́ ɛ gwɔmna mɛn, ba wɔ man na yɛ e Mizpa tanga bemât como mɛn. Bemât nuyel o vɛ a Ishmayɛl Netaniya, na Yohanan Kareya, na Seraya Tanhumat yi e Netofa tanga Yaazaniya yi e Maaka.

²⁴Gedaliya a yang ɛn mwa, “Yin kwon wok bengyip BeBabilɔn wɛt. Sangal hin e ji vwel o na yin raa pyɛ de Da vwel Babilɔn a ha. Ma sira me, kayɛ pyɛ yê sè gyat.”

²⁵E shey hane mo e pwɛl gwo netaama, Ishmayɛl Netaniya Ɛlishama de á sè yi e lɔ gwɔ̀m Yuda a vey tanga bemat kuru e Mizpa. Ba vɛ̌ mɔrɔ Gedaliya tanga BeYuda na BeBabilɔn de ba sé tanga yɛ.

²⁶Bemât mwa yi e begbɔng o vɔk e bepɛng ba hala Mizpa tanga bemât nuyel como. Ba wɛrɛn e vwêl Misra, yaga yɛn a wok bengyip pyɛ de BeBabilɔn ba rɔda ra a yɛn.

²⁷Gbɔng gwɔ̀m Yuda, Yɛhɔyacin a kana sè e rɔgɔs e duk ngyang e gbɔng repomô Babilɔn neshey kuru batat na nɛ netaama (37). E bama mo Ɛvil-Mɛrɔdak a tɛ́ ɛ Da vwel Babilɔnya, ko e shêy mɛsɛng hê negwɔm mɛ e tuk hê kuru baba na hɛ taama e pwɛl gwo kuru na vɛ ba, a pat Yɛhɔyacin yi e duk ngyang o.

²⁸Ɛvil-Mɛrɔdak a ra a yɛ pyɛ ryat, ko a nɔng ɛ nerey de na dal ne kawɛ gwɔ̀m de ba vey mɛ e Babilɔn arɔng.

²⁹Ba simo a Yɛhɔyacin a pat berugû duk ngyang na a tɛsɛ bemɛ, na a to re pyɛ́ tanga Da Vwel o vɔk e yɛnɛ̂ neken mɛ.

³⁰Da Vwel o a tɛ̀, be nɔngɔs Yɛhɔyacin pyɛ́ de ya jam ye kahɛ tuk, mwa jeng de á sè kwen.