Read berom 2 Begwɔ̀m 3 Bible Online

2 Begwɔ̀m 3 - berom bible

2 Begwɔ̀m 3

¹Yɔram Ahap a hwo re negwɔm Israyɛl e shey hê kuru na hɛ rwit de Yɛhɔshafat a re negwɔm Yuda. A re negwɔm o yi e Samariya neshey kuru na nɛ neba.

²A ra banɛn e nuyel Dagwi Darwey bɛs, ko a de wul da mɛ na neng mɛ wɛt, yaga a gangas pyɛ̂ sekwit de da mɛ a kana lɔk, na a re a Baal ɛ fongol.

³Mwa ano, a ra tyɛng na Yɛrɔbɔwam Nebat de à tɛ̀, BeIsrayɛl ba ra banɛn.

⁴Mesha, gbɔng gwɔ̀m Mowap, á sè e vwɔ̂ gbɔng gwɔ̀m Israyɛl neshey pyak. Mesha a vɔk tyimit, a talsa gbɔng gwɔ̀m Israyɛl pyɛ́ de ba tɛ̀ a yɛ, a talsa hɛ na tyimit gu naga rining (100,000), a to nɔngɔs hɛ setôt beturuk gu naga.

⁵Ko jeng de Ahap a ga ku, Mesha a kyɛ́ ɛ nà raa Israyɛl.

⁶Ano kwong, Yɔram a hala Samariya, a tula bagyɛng bemât comô Israyɛl mwa.

⁷A tomo na ha vɔk na Gbɔng Gwɔ̀m Yɛhɔshafat, a yang ɛ, “Gbɔng gwɔ̀m Mowap a ga sogo a me nehywɛ. Hwà rɔda wuna hwo na me, na wot wɔ man gey na yɛ arɛt?” Yɛhɔshafat a toyo a yɛ, a ye, “Ma simo. Wot na hwo, wot a sé vining o, bemât como hom ba sé bemo, bedwa hom ba sé bemo arɔng.

⁸Ko gwɛ̌ gwong de wot ê kwey ɛ vɔk e de como mo ɛ?” Yɔram a ye, “Wot a rɔda kwey e gwông bak hêy Ɛdɔm.”

⁹Ano kwong, yɛ tanga Yɛhɔshafat ba yong ɛn, ba nusu. E gwong o, gbɔng gwɔ̀m Ɛdɔm a dop ɛ e yɛn. Bama de ba kyè pɔlɔ taama, nshi na radɛ a yɛn, vit a ninde na tɛt ɛ yaga bemat kɛ yas.

¹⁰Yɔram a tɛ̀ sekun, a ye, “Yēe kúwòo! Dagwi Darwey a yishi hot begwɔ̀m betat vemo, na a bin nára hot e vwɔ̂ BeMowap!”

¹¹Yɛhɔshafat a rangal, a ye, “Zarap Dagwi hwak a sé e ngamo de wot ê rangâl Dagwi Darwey yi na yɛ a?” Mwât nuyel comô Yɔram a toyo na ha, a ye, “Elisha Shafat a sé e ngamo. A kana sè mwât sɛlɛ̂ Eliya.”

¹²Yɛhɔshafat a ye, “E yɛ a mwat de ê tɔk ha a wot pyɛ de Dagwi Darwey e simo wot a ra.” Ano kwong, yɛn begwɔ̀m betat ba wɔ́ na Elisha.

¹³Elisha a yâng gbɔng gwɔ̀m Israyɛl, “Yaga sɛ́ de ma rɔda sɛlɛ hwo ɛ? Kyè wɔ rangâl bezarap de da mō tanga de mō ba kana rangsal hɛn!” Yɔram a toyo na ha, a ye, “Wey, a sé e Dagwi Darwey de e yishi hot begwɔ̀m betat vemo, na a bin nára hot e vwɔ̂ gbɔng gwɔ̀m Mowap.”

¹⁴Elisha a yang ɛ, “Ma sira me na Dagwi Darwey, Da Jêy Mwa, de me ra a yɛ fwom, pyɛ hom ya yang se na hwo wɛt, ka sede ma di nerêy sa mō Yɛhɔshafat, gbɔng gwɔ̀m Yuda wɛt!

¹⁵A remo, tik na yin vey a me na mwât râ lwɛlɛ na yòm.” Jeng de mwât ra yom o a sé ra lwɛlɛ, ko Dagwi Darwey a nɔ̂ng Elisha ha,

¹⁶a ye, “Pyɛ ma yet de Dagwi Darwey a ye, ‘Kás in bepǒl e rɔt hwogot hemo mo.

¹⁷Yin ê ka di rwak kɛ gul wɛt, ko mwa ano, rɔt o ha rɔda sila na nshi, ko yin na yas min mwa yin a rɔda sɔ nshi shɛrɛk.’ ”

¹⁸Elisha a re nuyel, a ye, “Pyɛ yemo ya sé negbang na Dagwi Darwey wɛt. A rɔda to nɔng in wɛng e ra BeMowap arɔng!

¹⁹Yin a rɔda re bapomo mɛn barat o, mwa na vemo de ba rɔnɔ na bejwâ-pomo. Yin a rɔda tow mwa cɔ́gɔt marâ nèy mɛn, yin a rɔda to bangas mwa lel nshi mɛn, ko yin ê lashe cāp mɛn, yin a rɔda tula ɛ beta e ra yɛ.”

²⁰Ko mwin, nusu hwol nagasi, tyɛng e jeng nása nɔrɔ̂ yas de be yɛt vɔk na Dagwi, nshi na hwo tele vey yi e bak Ɛdɔm, nà vɛ̌ kyiri vwel o mwa.

²¹Jeng de BeMowap ba kana wok wɔgɔ, begbɔng begwɔ̀m betat ba ga wuna bato mɛn, na be vey hwo e ra yɛn, yɛn a vɛ̌ rini mwa beras, na bemakuk na bewen, ba hashe pyɛ̂ como, ba wɔ tula hɛn e yɛnɛ̂ vwel mɛn.

²²Jeng de yɛn a sogo, e het à gasi e zang-gwi, jeng de gwi gwa sé nɛp e ra nshi, ha tɛ̀ nshi mo na senge sede nemi.

²³Yɛn a tē, “Di, nemi a nane!” Yɛn a bare, begwɔ̀m vane betat ba ga ra yol, ba mɔbɔs bato mɛn, ko yɛn a ye, “Tik wot wɔ hashe pyɛ́ de ba hala e bǔk como mɛn!”

²⁴Ko jeng de yɛn a wɔ wul bǔk mɛn o, BeIsrayɛl ba wɔ hwo e ra BeMowap o, ba ró ɛn, ba raa hɛn vɔk e ji vwel mɛn, ba mɔbɔs,

²⁵ko ba lashe bapomo mɛn. Sede remo de ba sé kweres cāp mɛn ryat o, kawɛ mwat a bomo ɛ gwofwa e ra cap o, ba pere wɔ bang cāp o na beta, ba to bangas lel nshi, ko ba tow cɔ́gɔt de ye mara nèy. E yɛnɛ mo, ba de tik ɛ gbɔng repomo rining zɔng, rɛ a Kir-Hareset, ko bemât begazit ba gwɔrɔ rɛ, na be hwo e ra rɛ.

²⁶Jeng de gbɔng gwɔ̀m Mowap a tɔk, como mo ye kyè wɔ dal gap mɛ, a vɛ̌ jut bemât comô bewal naga betaama, a ye ngyɛ́k, na a bin wɔ nusu mɛ e tê bemât comô gbɔng gwɔ̀m Ɛdɔm, ko a wɔ radɛ hɛ.

²⁷Ano kwong, a jut hwey kinat mɛ hemo de ha yang re negwɔm e to mɛ, ko a nára hɛ vɔk na ci BeMowap e ra jwa de ba gwɔrɔ mɛ pomo sede nɔrɔ̂ yas de be yɛt. Pyɛ yane ya tɛ̀ BeIsrayɛl ba tɛ̀ bengyip sizɔng, ko yɛn a toyo hɛn na bama yi e gbɔng repomo mo, yɛn a toyo vɔk e vwel mɛn.