Read berom 2 Begwɔ̀m 4 Bible Online

2 Begwɔ̀m 4 - berom bible

2 Begwɔ̀m 4

¹Jeng cak, kuma hwak e ji bezarap Dagwi a wɔ́ na Elisha, a yang ɛ, “À da, rwas hom a ga ku, ko hwà tɔk, yɛ a kana sè mwât sâp Dagwi. Di, mwat hwak de a rangal hɛ badu a ga vey, e simo na a jut nèy hom bewen beba, na be wɔ tɛ́ ɛn besam mɛ e tô dyām o.”

²Elisha a rangal hɛ, a ye, “E sɛ́ de hwo simo na me ra a hwo ɛ? Há a me, e sɛ́ de hwà vɔk e lɔ mō ɛ?” Hwā mo a yang ɛ, “Ma ka vɔk pyɛ cak wɛt sɛ̌ kefus něy pwat kesɛl o zɔng.”

³Elisha a yang ɛ, “Kyè wɔ lolo bètus behak yi na beha vwara mō, de vit a něy e ji mo, jama vɛ pyak na hwo vey mɛ.

⁴Tik na hwo tanga nèy mō yin a yel e ji duk, bang in rwi, ko yin tɛrɛ něy o e ji kawɛ mo, ko yin a tikis e bak gwining, sɛ̌ ba tala hɛn mwa.”

⁵Hwā mo a kyè, ko jeng de a tula befus něy o, a yel e ji lɔ mɛ tanga nèy mɛ mo, yɛn a bang rwi, ko a hwo tɛrɛ něy nane yi e ji kefus kane e ji betus o, nèy mɛ na sé nɔngɔs hɛ betus o.

⁶Jeng de a sila bètus o, a hwo yâng hwey o hak, “Nɔng me fus o hwak”, ko ha yang ɛ, “Vit à hwak.” Něy o na vɛ̌ ne ye jɛ̌t.

⁷Hwā mo a hwo wɔ na Elisha, na a rangal hɛ pyɛ de a rɔda ra na něy o. Elisha a yang ɛ, a kyè a wɔ rɛsɛl nɛ, na a tala mɛ mwat de e rangal hɛ badu mo. Bwang dyām o gwa rɔda pɔl, na yɛ a re mɛ pyɛ́ tanga nèy mɛ, na be dal mɛ.

⁸E jeng cak, Elisha a wɔ e repomô Shunɛm. E hwomo, derwey hwak a sé ɛ, a hwo rini hɛ pyɛ́. Yi e jeng yane, kayɛ jeng de a wɔ e hwomo, e reres pyɛ́ e lɔ mɛ.

⁹Hwā mo a hwo yâng rwas mɛ, “Ma tɔk mwat womo de e vɛsɛ e ngamo a sé mwât Dagwi mwin.

¹⁰Tik na wot a lɔk a yɛ keduk e ra tɛt mwot, wot tɛ̀ ɛ gwat, na gât sangal, na ketebut, tanga kywa-kya arɔng, na yɛ a sangal ɛ kayɛ jeng de a vey e ngamo na wot.” Ko yɛn a ra ano.

¹¹Tuhak, Elisha a to toyo vey e Shunɛm, a tut vɔk e duk mɛ mo na a pɔnglɔ.

¹²A hwo yâng mwât fwom mɛ Gɛhazi, a yila a yɛ delɔ mo. Delɔ mo a vey, a tumal e jey.

¹³Elisha a yâng Gɛhazi a rangal hɛ pyɛ de ba rɔda ra a yɛ, yaga nedirik nane de a jut e ra yɛn. Gyeng rɔ̌ e simo me wɔ a yɛ na gbɔng gwɔ̀m kɛ mwât nuyêl bemât como, na me ha há rat yaga yɛ arɛt? Hwā mo a hwo ye, “Ma vɔk pyɛ́. Kayɛ pyɛ de me simo ma rɔda sɛ̀ na bemat hom.”

¹⁴Elisha a rangâl Gɛhazi, a ye, “Ko sɛ̌ yiyɛ pyɛ de mê ra a yɛ ɛ?” Gɛhazi a toyo a yɛ, a ye, “Di, a vɔk hwey wen wɛt, ko rwas mɛ a ga vey ɛ mwakuk.”

¹⁵Elisha a yang ɛ, a yâng delɔ mo a vey bagat. A hwo vey, a tumal e rwi duk.

¹⁶Elisha a yang ɛ, “Di, jeng ano nak, hwà rɔda bɔt hwey mō.” Hwā mo a ye, “Áa àa! Gabɔk à da, hwà sé mwât Dagwi. Hwo kwon ra a me bɔs wɛt.”

¹⁷Ko pyɛ de Elisha a ga kana ha ya té, e nû shey het, hwā mo a hwo tɔ hwey wen o.

¹⁸Bamâ neshey nehak e jeng hywɛp, wen o a nusu e majey nagasi, na a wɔ sɛ̀ da mɛ de a sé e hwiri tanga bemât fwom e de bwal.

¹⁹Hák! Hwey ha hwo dak sekun vɔk na da mɛ, ha tē, “Rato hom! Rato hom!” Da mɛ a hwo yâng mwât fwom hwak a jut hwey o wɔ mɛ na neng hɛ.

²⁰Mwât fwom o a wut hɛ vɔk na neng hɛ. Neng o a hwo bɔt hɛ vɔk e tê-gwi, ko hwey o ha de ku.

²¹A hwo jut hɛ, a tút mɛ vɔk e duk Elisha, a lasha hɛ e ra gwat, a tik ɛ hɛ, a nusu, a bang rwi mo.

²²Ano, a yila rwas mɛ, a yang ɛ, “Tomo a me mwât fwom hwak na gùna madung. Me kyè wɔ na mwât Dagwi e Raku Karmɛl, na me to toyo ziri.”

²³Dalɔ mɛ a rangal hɛ, a ye, “Yaga sɛ́ de hwo kyè wɔ na yɛ yunung ɛ? Yunung a sé Tuk Wusal kɛ Nzem Pwɛl Pwas wɛt.” Hwā mo a ye, “Hwo sap wɛt.”

²⁴Bama mo, ba tɛ̀ a yɛ ɛ nerwey tanga wap e madung o. A hwo yâng mwât fwom o, a ró a yɛ wɛ ziri, a kwon tɛt vwɔ wɛt, sɛ̌ a ha a yɛ.

²⁵A nusu, a kyè vɔk e Raku Karmɛl e kwɔn de Elisha e sangal ɛ. Elisha a di ɛ jeng de a sè rɔngɔl yikyik tyɔng vey pom. A hwo yâng mwât fwom mɛ Gɛhazi, “Di, hwā yi e Shunɛm a sé kyè vey.

²⁶Kyè ziri, na hwo man na yɛ. Rangal hɛ kayɛ pyɛ ya sé tyang arɛt? Rwas mɛ tanga hwey mɛ ba sé tyang arɛt?” Gɛhazi a wɔ, ko hwā mo a yang ɛ, kayɛ pyɛ ya sé gyat.

²⁷Ko jeng de a pom e ra raku na Elisha, a gaba e cât bol mɛ, a vo bol o. Gɛhazi a simo na a gangta hɛ, ko Elisha a yang ɛ, “Tik ɛ zɔng. Hwà di, a sé e ji lashê yey wɛt arɛt? Ko Dagwi Darwey a ka dura a me pyɛ cak wɛt.”

²⁸Hwā mo a hwo yang ɛ, “À da, ma kana rangal hwo, me simo hwey wen arɛt? Wey! Ma ha a hwo, hwo tɛ̀ a me ɛ yêy hwey wɛt.”

²⁹Jeng de Elisha a wok ano, a hwo doyo vɔk na Gɛhazi, a yang ɛ, “Yong o, jut gwɛlɛ hom, kyè mɛ ziri. Ka mwat hwak a kyul o, hwo toyo a yɛ na kyul o wɛt, hwo kyul mwat hwak arɔng wɛt. Kwey cik wɔ e lɔ mo, tɛ̀ gwele hom e ra bayis hwey o.” Gɛhazi mo a kyè.

³⁰Ko hwā mo a yâng Elisha, “Ma sira a hwo, sede remo de Dagwi Darwey a sé kwen, ko sede remo de hwà sé kwen arɔng, wot ê kyè tanga hwo zɔng, ma rɔda hala hwo wɛt!” Ano kwong, a raa hɛ.

³¹Gɛhazi a tanga wɔ wul. A vɔk gwelê Elisha e vwɔ mɛ, a wɔ tik gwɛ e ra bayîs revîn hwey o, ko vit a nesong de na dura neken nê toyo. Ko a hwo toyo wɔ man na Elisha, a ha a yɛ, rebêk hwey o ha ka dura sene wɛt.

³²Jeng de Elisha a pom e lɔ mo, a yel e ji duk mɛ yɛ nju mɛ, a di revîn hwey o e dyɛngɛ e ra gwat mɛ.

³³A bang rwi, ko a ra won na Dagwi Darwey.

³⁴E bama mo, a dyɛng e ra hɛ, a tɛ̀ nu mɛ e ra nû hɛ, bayis mɛ e ra vê hɛ, vɔ mɛ e ra vɔ hɛ. Sede remo de a nára hɛ́ e ra hɛ, rebek hwey o ha hwo ye mɔɔ.

³⁵Elisha a sogo, a wɔ ko a toyo e ji duk o, a to dyɛng, a nára hɛ́ e ra hwey o. Wen o a hwo tē cìhôw, a vo dyɛ̀ng zang taama, ko a wunta bayis mɛ.

³⁶Elisha a yila Gɛhazi, a yang ɛ a yila dê hwey o. Jeng de dê hwey o a yel, a yang ɛ, “Hwey mo a hemo.”

³⁷A gaba e cât bol Elisha, a vɛ̌ jut hwey mɛ, a nusu mɛ.

³⁸E jeng cak de jey ya hworok mwa vwel o, Elisha a to wɛrɛ e Gilgal. Tuhak, a sé basa a regyɛng bezarap Dagwi, ko a ha a mwât fwom mɛ, a tɛ̀ gwogbɔng gworwey e kya, na a kyé a yɛn mɛ tɛ̀rɛ.

³⁹Hwak e ji mɛn a hwo nusu, na a wɔ̀ jama sehwonong. A wɔ̀ sɛ̀ pyɛ cak sede nèy cɔ, a vos nèy o pyak e gey. A vɛ hɛ mɛ, a yɛt, a tɛ̀ e rwey e ji tɛrɛ mo, ko vit a mwat de a ka tɔk yerê pyɛ mo.

⁴⁰Ba gas a bemat tɛrɛ mo e neshǐ na be re. Ko remo-remo de yɛn a wok wɛ, yɛn a hwo tɛ̀ sekun vɔk na Elisha, ba ye, “Nedɔm na sé e ji mo!” Ba tɔk re wɛ wɛt.

⁴¹Elisha a ye, be vey a yɛ na nemuk. A tɛ̀ nɛ e rwey o, ko a ye, be gas tɛrɛ mo. Yɛn a re wɛ, vit à pyɛ de ya té.

⁴²E jeng o cak, mwat hwak a vey yi e Baal-Shalisha, a vɔk a Elisha bagat kpam-tuk kuru baba de ba yong na baale pwas tanga batô alkama de ba mɛsɛng yɛt vɛ. Elisha a yâng mwât fwom mɛ, a nɔ̂ng regyɛng bezarap Dagwi pyɛ́ mo, na be re.

⁴³Ko a toyo a yɛ, a ye, “Pyɛ́ yemo ya rɔda vey a bemat naga wɛt.” Elisha a toyo a yɛ, a ye, “Nɔng ɛn, be re, yaga Dagwi Darwey a ye, ba rɔda re, ko bwang o gwô pɔl.”

⁴⁴Ano kwong, mwât fwom o a gas a yɛn, sede remo de Dagwi Darwey a ha. Yɛn mwa ba re, ba siris, ko bwang o gwa pɔl.