Read berom 2 Begwɔ̀m 5 Bible Online

2 Begwɔ̀m 5 - berom bible

2 Begwɔ̀m 5

¹Mwât nuyel bemât comô Sirya, ba tang ɛ à Naaman. Yi na yɛ de Dagwi Darwey a tɛsɛ BeSirya ba bɛrɛng wɛng. Yaga ano, gbɔng gwɔ̀m Sirya a nɔngɔs hɛ nerey tyɔng wɛt. A sè gbɔng suga, ko a de vɔk rɔ ves hê rehwô rebek kē.

²E jeng cak de BeSirya ba kana wɔ̂ jugu e vwêl BeIsrayɛl, ba vo ɛ̀ kehwong kehak, kemo de ka tɛ́ ɛ hwông fwôm hwâ Naaman.

³Tuhak, hwong o a hwo yâng delɔ mɛ, “Káa! Ka dara mot a yang wɔ na zarap Dagwi de a sé sangal e Samariya, ka a yang tɛ̀ ɛ tyang yi e rɔ hemo.” Hwā mo a ha a rwas mɛ.

⁴Jeng de Naaman a wok ha hane, a vɛ̌ wɔ̀ ha a gbɔng gwɔ̀m pyɛ de hwong o a ha.

⁵Gbɔng gwɔ̀m a yang ɛ, “Ci e hwomo! Mê nɔng o bwok-rwang vɔk na gbɔng gwɔ̀m Israyɛl.” Naaman kwong a hwo sogô wɔ, a vɔk ɛ dyam pyɛng nedirik o sede kilo naga betat (300), na dyam shinang kilo kuru batyiimin tanga bègbɔng berugu kuru.

⁶A to vɔk ɛ bwok-rwang de gbɔng gwɔ̀m a jɛk. Pyɛ de ba jɛk e ji bwok-rwang o a yemo ngan: “Ma sé tomo na bwok-rwang gwomo, na me dura a hwo mɛ mwat hom Naaman. Me simo na hwo tɛ̀ ɛ tyang yi e rɔ hemo.”

⁷Jeng de gbɔng gwɔ̀m Israyɛl a basa bwok-rwang o, a vɛ̌ hama gworugu mɛ yaga lashê yey, a ye, “Ma sé Dagwi a? Ma vɔk retô reku tanga neken a? Yaga sɛ́ de gbɔng gwɔ̀m Sirya a rɔda ye, me tɛ̀ mwat womo tyang ɛ? Di in, a sé jama me na yol.”

⁸Jeng de Elisha mwât Dagwi, a wok pyɛ de ya té, a hwo tomo wɔ na gbɔng gwɔ̀m, a yang ɛ, “Yaga sɛ́ de hwà lashe yey ɛ? Tomo mwat o vey na me, yaga na a tɔk, ba vɔk zarap Dagwi e ji Israyɛl.”

⁹Ano kwong, Naaman a wɔ́ na bedwa tanga bekyɛkyɛ̂ bedwa mɛ, a wɔ̀ tumal e rwi lɔ Elisha.

¹⁰Elisha a hwo tomo mwât fwom mɛ, a wɔ̀ ha a yɛ, a wɔ̀ ye pyɔp, a kus ɛ e Rɔt Yɔrdan zang taama, na a bin tɛ́ ɛ tyang gyat yi e serɔ mɛ mo.

¹¹Ko Naaman a vɛ̌ vo shom, a ye, “Me tē, kɛ gyeng a rɔda nusu a tumal, a ríp vwɔ mɛ e ra kwɔ̂n rɔ mo, na a ra won na Dagwi Darwey, Dagwi mɛ, na a tɛ̀ me tyang.

¹²Hane zɔng wɛt. Nshî bègwɔrɔt Abana tanga Parfer e Damaskus na dal mwa nshî vwêl Israyɛl wɛt a? Ka ma yang kus me e hwomo na me tɛ̀ tyang wɛt arɛt?”

¹³Ko bemat mɛ ba wɔ́ na yɛ, ba yang ɛ, “À da, ka zarap Dagwi o a yang ha a hwo, hwo ra pyɛ negbang cak, hwà yang ra wɛt arɛt? A remo, yaga sɛ́ de hwô tɔk yel e nshi mo na hwo kus o, sede remo de a ha, na hwo tɛ̀ tyang wɛt ɛ?”

¹⁴Ano kwong, Naaman a yel e ji Rɔt Yɔrdan, a ye ɛ̀ pyɔp zang taama tyɛng na pyɛ de Elisha a ha. Ko a vɛ̌ tɛ̀ tyang, rebek mɛ ra tɛ́ ɛ hyul-hyul sede rebêk hwey.

¹⁵A toyo vɔk na Elisha tanga mwa bemat mɛ, a tumal e nuyel mɛ, a ye, “A remo, ma tɔk vit a Dagwi hwak e neyɛnɛ̂ jey mwa sɛ̌ Dagwi wo Israyɛl. Gabɔk, à da, sey nɔrɔ het de ma vey mɛ.”

¹⁶Ko Elisha a toyo a yɛ, a ye, “Me sap Dagwi Darwey de a sé kwen, ko ma sira me, ma rɔda sey nɔrɔ hak wɛt.” Naaman a shonong e ra yɛ, ko Elisha a kyɛ́ ɛ.

¹⁷Naaman kwong a ye, “Ka sede hwô sey nɔrɔ hom wɛt, ko tik na me vɛ fongol yi e ngamo de bedwa-madung beba be tɔk jut, na me vɔk wɔ e lɔ. Yi e remo vɔk e nuyel, ma rɔda to nára nɔrɔ̂ yas de be yɛt kɛ nɔrɔ de be rangas burang vɔk na ci cak wɛt, sɛ̌ Dagwi Darwey nju mɛ zɔng.

¹⁸Ko me tɛ̀ e yey, Dagwi Darwey a rɔda hala a me: Jeng de ma wɔ̀ kyɔk gbɔng gwɔ̀m hom e duk re fongôl Rimɔn, yɛ ci Sirya, na a bin re a yɛ fongol, e ye yìk e ra me. Tik na Dagwi Darwey a hala a me, jeng de mê ye ngyuk arɔng.”

¹⁹Elisha a yang ɛ, “Kyè tyang!” Ko Naaman a hwo vo gwong, a kyè. Bama de a ga kyè tyɔng zɔng,

²⁰Gɛhazi, mwât fwôm Elisha, a ye e yey mɛ, “Sɛ̌ dalɔ hom a ga tik Naaman a kyè na pyɛ́ mɛ vit à tala pyɛ cak a! A yang sè naka, ka a sey pyɛ́ de WoSirya wane a nɔng ɛ. Ma sira me na Dagwi Darwey de a sé kwen ma rɔda tele, me raa hɛ, na me wɔ̀ sey pyɛ́ cak yi na yɛ.”

²¹A hwo dopɛ e Naaman. Jeng de Naaman o a doyo, a di bama, a di mwat hwak a sé tele, e raa hɛn, a hwo gyirik yi e ra kyɛkyɛ̂ dwa mɛ, na a man na yɛ. A rangal hɛ, a ye, “Ala ɛ?”

²²Gɛhazi a ye, “Vit à pyɛ. A sé e dalɔ hom de a tomo me, na me vey ha a hwo wɔgɔ, remo-remo bewen beba bekɛnɛt ba sé vey a yɛ yi e berakû Ɛfrayim. Ba sɛ bezarap. Yaga ano, e simo ka hwo nɔng ɛn dyam pyɛng kilo kuru batat tanga begbɔng berugu beba.”

²³Naaman a yang ɛ, “Gabɔk, sey dyam pyɛng kilo kuru batyiimin.” A shonong mɛ e ra yɛ, ko a rɔgɔs a yɛ e ji bedap beba. A to nɔng ɛ berugu beba, ko a tomo mɛ bemât fwom mɛ beba, ba wɔ kyɔk ɛ mɛ, yɛn a kwey e yêl Gɛhazi.

²⁴Jeng de yɛn a wɔ wul rahwol e rwi yel e repomo mo, Gɛhazi a jut pyɛ́ mo, a yel mɛ e lɔ. Ko a tɛ̀ bemât fwôm Naaman e gwong, ba kyè.

²⁵A toyo hɛ vɔk e ji lɔ, ko Elisha a hwo rangal hɛ, a yi e gwa arɛt? A toyo a yɛ, a ye, “À da, ma ka wɔ́ e kwɔn hak wɛt.”

²⁶Ko Elisha a ye, “Hwà tɔk, ma sè e ji gabik tanga hwo jeng de mwat o a gyirik yi e ra kyɛkyɛ̂ dwa mɛ, na a man na hwo wɛt a? Di, jeng yemo ya sé ye serês dyām na berugu, kɛ bɛ̌ pat, na anap, kɛ vyēl na berɔndɔng kɛ besam wɛt.

²⁷A remo kwong, rɔ̂ Naaman ha rɔda toyo e ra hwo, hwo tanga cáng mō. Yin a rɔda vɔk hɛ gbak-gbak.” Jeng de Gɛhazi a sè nusu, rɔ mo ha kaba hɛ, bek mɛ ha pere fosok hɛ.