Read berom 2 Begwɔ̀m 6 Bible Online

2 Begwɔ̀m 6 - berom bible

2 Begwɔ̀m 6

¹Tuhak, regyɛng bezarap de Elisha a sè mwât nuyel rɛ ra tosho a yɛ wɔgɔ, kwɔn de ba sangal ɛ ha radɛ a yɛn.

²Yɛn a rangal hɛ, a simo a yɛn, na be wɔ̀ lɔk kwɔ̂n sangal e vwâ Rɔt Yɔrdan. Kawɛ e ji mɛn a vɔk ɛ cɔgɔt, na a lɔk mɛ kwɔn o. Elisha a yang ɛn, “A sé naka. Ci in.”

³Hwak e ji mɛn a shonong e ra yɛ, na a wɔ́ tanga yɛn, ko a simo.

⁴A kyè tanga yɛn. Jeng de yɛn a wɔ wul Rɔt Yɔrdan, ba hwo tow cɔ́gɔt.

⁵Jeng de hwak e ji yɛn a sé tow cɔgɔt o, remo-remo celes tyem mɛ ya ye fɔ́ng, ya gaba e ji nshi. A pɛl sekun, a ye “Yɛ́ɛ! Mê ra sɛ́, à da ɛ? Ma ra wôn tyem o.”

⁶Elisha a hwo yang ɛ, “Kwɔn a hɛ de ya gaba ɛ?” Mwat o a dura a yɛ kwɔn o, ko Elisha a kwɔrɔ lâng cɔgɔt, a bomo e ji nshi mo, ko ya pere wɔ̀ tɛ̀ celes tyem o ya nusu tǎlu e ra nshi.

⁷A nɔ̂ng mwat o nu, a ye ngyuk na a jut yɛ.

⁸Gbɔng gwɔ̀m Sirya a sè tô como na Israyɛl. A ra badu na bemât nuyêl como mɛ, ko a nɔng ɛn nu, na be wɔ̀ tɛ̀ bǔk como e kwɔn hak.

⁹Ko Elisha, mwât Dagwi, a tomo a gbɔng gwɔ̀m Israyɛl na ha wɔgɔ, a tē naka, a kwon wɔ e kwɔn hane wɛt, yaga BeSirya ba sé e waba e hwomo.

¹⁰Ano kwong, gbɔng gwɔ̀m Israyɛl a tomo a bemat mɛ de ba sangal e kwɔn de mwât Dagwi a ha a yɛ, be bɛrɛng nekanang. Pyɛ́ yane ya té zang pyak.

¹¹Gbɔng gwɔ̀m Sirya a tɛ̀ shom e ra pyɛ́ mo. A hwo yila bemât nuyel mɛ ko a rangal hɛn, a ye, “E wa e ji min de a sé e bak gbɔng gwɔ̀m Israyɛl arɛt?”

¹²Hwak e ji bemat o a toyo a yɛ, a ye, “Neken mō ne ros, vit a hwak e ji mot à da. A sé e Elisha, zarap Dagwi, de e há a gbɔng gwɔ̀m Israyɛl mwa pyɛ́ mo, mwa na pyɛ́ de hwó ha yaang e ji duk ji mo mō.”

¹³Gbɔng gwɔ̀m Sirya a ye, be jama a yɛ kwɔn de Elisha e sangal ɛ, na a tomo, be wɔ̀ vo ɛ. Jeng de ba ha a yɛ, Elisha a sé e Dɔtan,

¹⁴a tomo gbɔng regyɛng bemat na bedwa tanga bekyɛkyɛ bedwâ como, ko yɛn a wɔ̀ wul repomo mo naturuk, yɛn a rɔnɔ rɛ.

¹⁵Jeng de mwât fwôm Elisha a tulu bop nagasi, a nusu e majey, a vɛ̌ di bemât comô Sirya na bedwa tanga bekyɛkyɛ̂ bedwa como ba rɔnɔ repomo mo. A toyo vɔk na Elisha, a pɛl sekun, a ye, “Yaa kukuuk! Wot ê ra e rɛ̌ ɛ?”

¹⁶Elisha a yang ɛ, “Hwo kwon vow wɛt! Bemat de ba sé tanga wot ba dal bemɛn o na nepyak.”

¹⁷A ra won na Dagwi Darwey, na a wunta bayîs wen o, na a di. Dagwi Darwey a wok won mɛ, ko wen o a di rahwol o wa sila na bedwâ kya tanga bekyɛkyɛ̂ comô kya ba rɔnɔ hɛn.

¹⁸Jeng de BeSirya ba hwo ɛn, Elisha a ra won, a ra won na Dagwi Darwey, na a tɛ̀, a bemat o nebǒk. Ko Dagwi Darwey a tɛ̀ ba tɛ́ ɛn bebók.

¹⁹Elisha a hwo wɔ na yɛn, a ha a yɛn wɔgɔ, yɛn a dun gwong o, ko yɛn a sé e repomo duk o. A to yang ɛn, “Raa hin me. Mê wɔ kyɔk in e kwɔ̂n mwat de yin e jama mo.” Ko a kyè na yɛn, a wɔ yel mɛ e ji gbɔng repomô Samariya.

²⁰Ras de yɛn a yel e ji repomo mo, Elisha a to ra won na Dagwi Darwey, na a wunta a BeSirya mo bayis. Dagwi Darwey a wok won mɛ, a wunta bayis mɛn, ko yɛn a di, yɛn a sé e ji repomô Samariya.

²¹Jeng de Gbɔng gwɔ̀m Israyɛl a di BeSirya mo, a rangâl Elisha, a ye, “À da, me mɔbɔs hɛn a?”

²²Elisha a yang ɛ, “Wey! Ka a ka sé bemât como de hwà vos ɛn e de tô como, ko hwô tɔk mɔbɔs hɛn wɛt. Nɔng ɛn pyɛ̂ re tanga nshi na be sɔ, na hwo tɛ̀ ɛn e gwong, na be toyo vɔk na gbɔng gwɔ̀m mɛn.”

²³Ano kwong, gbɔng gwɔ̀m Israyɛl a yong a yɛn gbɔng nzem pyɛ́, ba re, ba sɔ. E bama mo, a tɛ̀ ɛn e gwong, ba toyo vɔk na gbɔng gwɔ̀m Sirya. Yi e jeng yane, ba tik vɛ́sɛ jugu e vwêl Israyɛl.

²⁴E jeng cak, Bɛn-Hadat, gbɔng gwɔ̀m Sirya, a kyɔk mwa bemât como mɛ wɔ̂ como na sevwêl Israyɛl, ko yɛn a wɔ̀ rɔnɔ gbɔng repomô Samariya.

²⁵Yi ano, vyong ya hwo e ra gbɔng repomo mo tyɔng wɛt. Ko ba rɛsɛl ratô madung e nû shɛkɛl dyām pyɛng kuru rwit, ba rɛsɛl beving gumurus e kekyɔrɔk e nû shɛkɛl dyām pyɛng tyungun.

²⁶Gbɔng gwɔ̀m Israyɛl a sè kyě kyè e ra jwâ-pomo, ko hwā hwak a hwo pɛl sekun, a ye, “À da, neken mō ne ros! Sɛlɛ me!”

²⁷Gbɔng gwɔ̀m o a ye, “Ka sede Dagwi Darwey a sɛlɛ hwo wɛt, ko me, mê nɔng o sɛ́ ɛ? Ma vɔk alkama à, kɛ nshî anap arɛt?” Ko a rangal hɛ, a ye,

²⁸“E sé de ye bɔrɔk hwo ɛ?” Hwā mo a toyo a yɛ, a ye, “E nepɔlɔ de na kwey, hwà womo e ngamo a yang me, wot a re hwey hom, na wot ba nusu wot re mɛ het à gasi.

²⁹Ko wot a hwo kyé hwey hom, wot a re. Ko het à gasi, ma yang ɛ, yɛ a vey na mɛ, ko a ga wɔ lɛrɛ hwey o mɛ!”

³⁰Jeng de gbɔng gwɔ̀m a wok ha hane, a vɛ̌ hama gworugu mɛ yaga lashê yey. Sede remo de a tumal e ra jwâ-pomo mo, bemat ba di ɛ, a tɛ̀ berugû sesin e ji gworugu mɛ.

³¹A moklo, a ye, “Tik na Dagwi a wey na me, ka sede ma pat tô Elisha Shafat gyam na gwi gwo gaba wɛt!”

³²Ano a tomo tom, a wɔ jut Elisha. E jeng o, Elisha a sè e ji lɔ mɛ tanga bemakuk repomo mo de ba wɔ̀ di ɛ. Gyam na tom gbɔng gwɔ̀m o a wɔ wul, Elisha a hwo yâng bemakuk o, “Di in, mwât mɔbɔs bemat wane a sé tomo mwat hwak, na a vey pat to hom. A remo, jeng de ê vey wul e ngamo, bang in rwi, yin kwon tik ɛ, a yel wɛt. Gbɔng gwɔ̀m o pyɛ mɛ a sé raa hɛ e bama.”

³³Jeng de a sè rɔngɔl nà yɛnɛ ha mo, gobok, gbɔng gwɔ̀m o a vɛ̌ pom, a ye, “E Dagwi Darwey de a vey na rezot remo e ra wot. Yaga sɛ́ de mê gyeng, sɛlɛ mɛ ɛ?”