Read berom 1 Neha-Raane 10 Bible Online

1 Neha-Raane 10 - berom bible

1 Neha-Raane 10

¹BeFilisti ba tó como na BeIsrayɛl, BeIsrayɛl ba tele e nuyel mɛn, ko ba mɔbɔs hɛn e sɛndɛng Raku Gilbowa.

²BeFilisti mo ba ro ɛn, ba wɔ̀ vos ɛn, ko ba mɔbɔs nèy Saul bewen o, yɛn à Yɔnatan, na Abinadap tanga Malkishuwa.

³Como mo ya pé e bak de Saul a sé ɛ, ba tá ɛ na kwet, ko ba mǎ hɛ ding-ding.

⁴A hwo yang wen de e vɔkɔs a yɛ pyɛ̂ como mɛ, “Hwɔltɔ wal mo na hwo tala me mɛ, hwo kwon tik BeFilisti, bemat ligis be ba byɛs me wɛt.” Bengyip ba vo wen o sizɔng, ko a tɔk ra ano wɛt. Ano kwong, Saul a hwɔltɔ wal mɛ ko a gaba e ra wɛ.

⁵Sede wen o a di Saul a ga ku, yɛ a hwɔltɔ mwɛ à wal o, a gaba e ra wɛ, ko a ku arɔng.

⁶Ano de Saul na nèy mɛ bewen o betat ba kushu mwa hɛn e lɔ mɛn.

⁷Sede BeIsrayɛl de ba sangal e nɛk Yɛzrɛɛl ba wok, bemat como mo ba ga tele, ko Saul na nèy mɛ bewen o ba ga kushu, yɛn a vɛ̌ hala bapomo mɛn, ba tele. Ko BeFilisti ba vey sangal e ji vɛ.

⁸Nusu hwol o, BeFilisti ba wɔ̀ hashe bavîn bemat como mo, ko yɛn a sè bavin Saul na nèy mɛ dɔɔlɔl e ra Raku Gilbowa.

⁹Yɛn a hwo pat tô Saul, ba paa pyɛ̂ como mɛ mwa ko ba nɔ̂ng betom na be kyè mɛ e bapomo BeFilisti mwa na be kyě ha yɛgɛ̂t reku Saul e beduk cī mɛn, na be ha a bemat mwa arɔng.

¹⁰Yɛn a wɔ̀ tik pyɛ̂ como mɛ e duk ci mɛn cak, ko ba wɔ̀ tik to mɛ rirɛgɛ e gbɔng duk ci dagwi mɛn Dagɔn.

¹¹Sede BeYabɛsh Gileyat ba wok pyɛ de BeFilisti ba ra a Saul,

¹²besuga mɛn ba wɔ̀ hashe bavin Saul na nèy mɛ mo, ko ba kyè mɛ vɔk e Yabɛsh. Yɛn a wɔ̀ lɛrɛ vɛ e hwomo e nɛ̂n cɔgɔt ouk, ko yɛn a tik rê pyɛ́ pɔlɔ taama.

¹³Ano de Saul a ku yaga a sey tsak o na Dagwi Darwey wɛt. A kyɛ́ ɛ nà gyeng Badu Dagwi, a jama sɛlɛ na begabik bevuvwel

¹⁴e tô jama sɛlɛ na Dagwi Darwey. Yaga ano, Dagwi Darwey a mɔrɔ hɛ ko a nɔng vɔ̂k segwɔm o e vwɔ̂ Davit Yɛsɛ.