Read berom 1 Neha-Raane 11 Bible Online

1 Neha-Raane 11 - berom bible

1 Neha-Raane 11

¹Yére Israyɛl mwa ya vey na Davit e Hɛbrɔn, ya yang ɛ, “Di, wot a sé nemi mō.

²Yimo jeng de Saul á sè re negwɔm e ra wot, e hwo wɛ hwá sè mwat nuyel BeIsrayɛl e de como, ko Dagwi Darwey á ha a hwo, hwô sè lwek bemat mɛ BeIsrayɛl, ko hwô re negwɔm e ra yɛn.”

³Ano kwong, bemakuk Israyɛl mwa ba vey na Davit e Hɛbrɔn, ko yɛ gbɔng gwɔ̀m o a wuna hɛ na sira na yɛn e nuyel Dagwi Darwey e hwomo. Yɛn arɔng ba shushu hɛ na něy, na a tɛ́ ɛ gbɔng gwɔ̀m e ra BeIsrayɛl tyɛng na sira Dagwi Darwey e nû Samwɛl.

⁴Gbɔng Gwɔ̀m Davit na mwa BeIsrayɛl ba sogo, ba wɔ hwo e ra repomo Yɛrusalɛm na como. E jeng o, bá tang repomo mo à Yebus, ko BeYebus de bá sè na sangal e hwomo

⁵bá yang Davit, “Hwô kyɛm hwo yel e ngamo ko tyɔng wɛt!” Ko mwa ano Davit a wɔ̀ re kwɔn dâl Siyɔn, ko ba sege reza rɛ, ba yishi rɛ à Repomo Davit.

⁶Davit á kana ye, “Mwat de a tanga re BeYebus na como, a rɔda tɛ́ ɛ gwɔ̀m bemat como hom!” Ko Yowap Zɛruya, a sey yel bemat como mo, yaga ano, a tɛ́ ɛ gwɔ̀m mɛn.

⁷Davit a vɔk a wɔ̀ sangal e kwɔn dál o, yi ano, ba yishi hɛ à Repomo Davit.

⁸A lɔk repomo, a gwɔrɔ mɛ kwɔn o, a pɛrɛ na silsa bekwɔbɔrɔng de ba sé e nɛk rahwol e rwa ta, ko Yowap a re nuyel na yong lɔk bwang repomo mo.

⁹Davit kwong á gwɛsɛ gap yaga Dagwi Da Jey Mwa a sè tanga yɛ.

¹⁰Vemo vɛ à besuga Davit. Yɛn tanga BeIsrayɛl mwa bá tɛ̀ segwɔm mɛ se vɔk gap, se wɔ̀ wul neyɛnɛ sevwel o mwa, sede remo de Dagwi Darwey a ga kana sira a yɛ.

¹¹Baza besuga ma vemo ngan: Yashobeyam wo ruhup Hakmɔn a sé wo nuyel besuga betat. A tó como na bara mɛ, a mɔbɔs bemat naga betat (300) e como jining.

¹²Wo neba e ji besuga betat de e raa hɛ à Ɛlazar Dodo yi e Ahowa.

¹³Yɛ á sè tanga Davit e Pas Damim jeng de BeFilisti ba tula hɛn e hwomo yaga como. E kwɔn hak de há vɔk cap de ya sila na baale, bemat como mo ba hwo tele a BeFilisti,

¹⁴ko yɛn a tumal gak e tê hwiri mo. Yɛn a dul gwɛ, ko yɛn a tó como na BeFilisti mo, ko Dagwi Darwey a nɔng ɛn gbɔng wɛng e ra yɛn.

¹⁵Tuhak bemat betat e ji besuga kuru batat (30) ba gyirik vɔk e fwara Adulam wɔ na Davit. Á sè e jeng de regyɛng BeFilisti ba tɛ̀ dura e Nɛk Rɛfayim.

¹⁶E jeng yane Davit á sè e kwɔn dál, ko BeFilisti behak bá sè e Bet-Lɛhɛm.

¹⁷Davit a hwo wok cwey lɔ, ko a ye, “Wà ê wɔ sɛ̀ a me nshî sɔ e hwes bagat na rwi repomo Bet-Lɛhɛm ɛ!”

¹⁸Bekaan como vane betat ba tá e tê bǔk como BeFilisti, ba wɔ̀ vo nshi e hwes o, ba vey nɔng Davit. Ko a kyɛm a sɔ nɛ wɛt, a ye, “Dagwi Darwey a ró mɛ, mê sɔ nshi nemo de bemat ba ye waa à neken mɛn wɛt!” Yaga ano, a sɔ nɛ wɛt, ko a shusha nɛ e vwel, nɔrɔ pyɛ̂ sɔ vɔk na Dagwi Darwey. Gbɔng pyɛ de besuga betat vane ba ra à yane.

¹⁹

²⁰Abishai gwà Yowap, a sè mwat nuyel besuga como vane kuru batat. A jut bara mɛ, a mɔbɔs mɛ bemat repugu mɛ naga betat (300). Yi ano de a sɛ̀ a tó mɛ za e ji bemat kuru batat o.

²¹Yɛ a dal bemat vane kuru batat na za, yaga ano de a tɛ́ ɛ wo nuyel mɛn, ko a wul vere berey o betat wɛt.

²²Bɛnaya Yɛhɔyada yi Kapsɛyɛl a sè kaan como arɔng, a ra pyɛ́ pyak na yey ting. A mɔbɔs bekaan besuga comô BeMowap beba. Tuhak de nemuk fwala na rop, a wɔ̀ yel e vɔng fwara, a vɛ̌ mɔrɔ gukum e hwomo.

²³A to mɔrɔ WoMisra hwak de a sé suga, nelis mɛ na sé mita beba na jɔ̄t tyat (2.3 mita). A vɔk gwobara de neting o na sé sede gwelê bemat lɔk berugu e vwɔ mɛ. Yɛ pyɛ mɛ a vɔk gwele zɔng, ko a wɔ hwo e ra yɛ, a kabra gwobara mɛ mo, a mɔrɔ hɛ na gwɛ.

²⁴Pyɛ́ de Bɛnaya a ra à yane, ko a sɛ̀ mɛ za e ji besuga vane kuru batat.

²⁵A dal vane kuru batat, ko a wul berey o betat vere wɛt. Davit kwong a tɛ̀ a sè wo nuyel bemat gyeng mɛ.

²⁶Bwang behak e ji besuga kuru batat o à: Asahɛl gwa Yowap Ɛlkanan Dodo yi e Bet-Lɛhɛm

²⁷Shamot yi e Harot Heles yi e Pɛlɛt

²⁸Ira Ikɛsh yi e Tekowa Abiyɛzɛr yi e Anatot

²⁹Sibɛkai yi e Husha Ilay yi e Ahot

³⁰Maharai yi e Netofa Hɛlɛt Baana yi e Netofa

³¹Itai Ribai yi e Bibeya e vwel yere Bɛnyamin Bɛnaya yi e Piratɔn

³²Huray yi e benɛk Gaash Abiyɛl yi e Arbata

³³Azmavɛt yi e Bahurim Eliyaba yi e Shaalbɔn

³⁴Nèy Hashɛm yi e Gizɔn Yɔnatan Shagee yi e Harat

³⁵Ahiyam Sakar yi e Harat na Elifal Ur

³⁶Hɛfɛr yi e Mekerat Ahiya yi e Pɛlɔn

³⁷Hɛzrɔ yi e Karmɛl Naaray Ɛzbai

³⁸Yɔwɛl gwa Natan Mibhar Hagri

³⁹Zɛlɛk yi e Amɔn Naharai yi e Bɛrɔt, mwat vɔk pyɛ̂ como Yowap Zɛruya

⁴⁰Ira yi e Itri Garep yi e Itri

⁴¹Uriya yi e Hiti Zabat Ahlai

⁴²Adina Shiza yi e Rubɛn, yɛ a sè gwɔ̀m bemat Rubɛn na wo bemat kuru batat de ba sé na yɛ

⁴³Hanan Maaka Yɔshafat yi e Mitne

⁴⁴Uziya yi e Ashterat Shama tanga Yɛyɛl nèy Hotam yi e Arowe

⁴⁵Yɛdayɛl Shimri na gwa mɛ Yoha yi e Tizi

⁴⁶Ɛliyɛl yi e Mahavi Yɛribai na Yɔshaviyam nèy Ɛlnaam Itama yi e Mowap

⁴⁷Ɛliyɛl, na Ɔbɛt tanga Yaasiyɛl yi e Mɛzɔba.