Read berom 1 Neha-Raane 12 Bible Online

1 Neha-Raane 12 - berom bible

1 Neha-Raane 12

¹Baza bemat de ba vey wuna hɛn na Davit e Ziklak, jeng de Saul Kish a ro ɛ́ e nuyel mɛ, ko a wɔ lɛrɛ hɛ e hwomo. Yɛn á sè e ji besuga de bá sɛlɛ hɛ e de como.

²Mwa hɛn bá tɔk como hyiw, yɛn á sè bemât begbang ko yɛn á tɔk tabas ket tanga tabâs beta na negazik na vwɔ yege kɛ mwɛlɛng ayi. Yɛn á sè yi e yere Bɛnyamin de Saul a yi ɛ arɔng.

³Bemat nuyel mɛn à Ahiyezer na Yɔwash nèy Shema wo Gileyat. Behak à Yɛziyɛl na Pɛlɛt nèy Azmavɛt, na Beraka na Yehu yi e Anatot,

⁴na Ishmaya yi e Gibɛyɔn, yɛ á sè suga de á tɛ̀ za, ko á sè hwak e ji bemat nuyel besuga kuru batat (30); na Yirmiya, na Yahaziyɛl, na Yohanan, tanga Yɔzabat yi e Gedera;

⁵na Ɛluzai, na Yɛrimɔt, na Beyalya, tanga Shefatiya yi e Harif;

⁶na Ɛlkana, na Ishya, na Azarɛl Yɔwɛzɛr tanga Yashobeyam wo ruhup Kora;

⁷tanga Yɔwɛla na Zɛbadya nèy Yɛrɔham yi e Gɛdɔr.

⁸Besuga behak yi e yere Gat ba wuna hɛn na bemat como Davit jeng de a sè rɔngɔl e kwɔn dal e hey. Yɛn á tɔk tô como bebara na beruga vit à yere mo. Yɛn á bɛrɛng na bayîs-hey yerê vê begukum, ko yɛn á tele e ra beta tyɔng wɛt sede beròs e raku.

⁹Ba ngyɛrɛ baza mɛn ngan e ra tɔ̂k como mɛn yi e wo mɛsɛng o, gwɔ̀m mɛn à Ɛzɛr, ba raa na Obadya, tanga Ɛliyap;

¹⁰na Mishmana, tanga Yirmiya;

¹¹na Atai tanga Ɛliyɛl;

¹²na Yohanan tanga Ɛlzabat;

¹³na Yirmiya tanga Makbanai wo shagwining (11).

¹⁴Yɛn BeGat o ba sé begwɔ̀m como, kawɛ e ji besɛl o mɛn a vɔk bemat como naga (100) e nɛn mɛ, ko kawɛ e ji berey o a vɔk vɛ gu rining (1,000) arɔng.

¹⁵E yɛn vɛ de ba ye dɔ à Rɔt Yɔrdan e pwɛl susu shey jeng de tɛmɛ-nshi na bang hɛ ko ne kyě tele kpɛɛ, ko ba kyě ro ɛn, ba shara bemat de ba sangal e benɛk rwa rak na rwa tâ rɔt o.

¹⁶Ano arɔng, behak yi e berâs como Bɛnyamin na Yuda ba wɔ̀ sɛ Davit e kwɔn dal o.

¹⁷Davit o a hwo nusu na a man na yɛn, ko a yang ɛn, “Ka sede yin a sé kyè vey na me e ji netyang, na yin a vey sɛlɛ me, ko ma wuna me na yin na yey hom. Ko ka sede yin a vey na yin a row me na bemat repugu hom, mwa ano de ma ga jama gwong na me mǎ hin wɛt, ko Dagwi wo beda mot e bɛrɛng, ko ê ra a yin shɔt.”

¹⁸Gabik Dagwi ha hwo sɛ̀ reto e ra hwak e ji mɛn de ba tang ɛ à Amasai, de a ga tɛ́ ɛ wo nuyel besuga kuru batat, a ye, “Wot a sé bemo, à Davit, wot a sé na hwo, à hwêy Yɛsɛ! Wɛng e ra hwo, wɛng na vemo de be sɛlɛ hwo! E Dagwi mo de e sɛlɛ hwo!” Yi ano, Davit a sey ɛn, ko a tɛ̀ ɛn be tɛ́ ɛn bemat nuyel bemat como mɛ.

¹⁹A vane ano, bemat como behak yi e yere Manase ba wɔ wuna hɛn na Davit jeng de a sé kyè.

²⁰Jeng de a sé toyo vɔk e Ziklak, bemat como vemo yi e Manase ba vey wuna hɛn na yɛ, yɛn vɛ à Adna, na Yɔzabat, na Yɛdayɛl, na Mikayɛl, na Yɔzabat na Ɛlihu tanga Ziletai. Kawɛ e ji mɛn a kana vɔk bemat como gu rining e vwɔ mɛ jeng de yɛn á rɔngɔl na yere mɛn ye Manase.

²¹Yɛn á sɛlɛ Davit na como e ra bemât jugu, yaga mwa hɛn bá sè besuga, ko bá sè bemat nuyel bemat como mɛ.

²²Kahɛ tuk, bemat como bepas ba vɛ̀sɛ na Davit na be sɛlɛ hɛ, ko yɛn a tɛ́ ɛn gbɔng regyɛng bemat como.

²³Vemo vɛ à bemat de ba tɔk como naka, de ba wɔ̀ wuna hɛn na bemat como Davit e Hɛbrɔn na be sɛlɛ hɛ, na como na be sey ɛ negwɔm Saul na be nɔng ɛ sɛ, tyɛng na vonu Dagwi Darwey. Nepyak mɛn à nemo:

²⁴Yi e yere Yuda bemat gu batyiimin na naga rwit (6,800) de ba tó como na beruga tanga begbang.

²⁵Yi e yere Simɛyɔn bemat como de ba ga myak ɛn naka gu bataama na naga gwining (7,100).

²⁶Yi e yere Levi bemat gu banaas na naga betyiimin (4,600).

²⁷Bemat de ba raa Yɛhɔyada yere Aharon ba sé gu batat na naga betaama (3,700).

²⁸Zadɔk wen hwak de a sé suga, a vey na cáng mɛ bemat kuru baba na vɛ beba (22) de ba sé bemat nuyel e ji bemat como.

²⁹Yi e yere Bɛnyamin, yere Saul à yane, bemat gu batat (3,000). Bwarwey bemat yere mo bá nàra na Saul e jeng o.

³⁰Yi e yere Ɛfrayim bemat gu kuru baba, na naga rwit (20,800). Mwa hɛn yɛn a sé besuga de ba vɔk za e rùhup mɛn.

³¹Yi e yere Manase ye rwa ta bemat gu kuru na gu rwit (18,000) de ba kasa hɛn na yɛn a wɔ̀ tɛ̀ a Davit negwɔm.

³²Yi e yere Isakar bemat nuyel naga beba, (200), yɛn na bemat de ba sé e nɛn mɛn. Bemat o ba tɔk pyɛ de ya sé naka na BeIsrayɛl be ra, tanga jeng de ya jam na be ra pyɛ mo.

³³Yi e yere Zɛbulun bemat gu kuru batungun (50,000), vemo de ba nɔng bato mɛn na be raa Davit sana tô yey, ko yɛn a sé e yong ɛn na be tó como. Ba myak ɛn na be tó como na kayiyɛ yére pyɛ̂ como.

³⁴Yi e yere Naftali bemat nuyel gu rining (1,000), yɛn na bemat como gu kuru batat na vɛ bataama (37,000), ko mwa hɛn yɛn a vɔk beruga na bebara.

³⁵Yi e yere Dan bemat gu kuru baba na vɛ rwit, na naga betyiimin (28,600) vemo de ba ga myak ɛn e tô como.

³⁶Yi e yere Ashɛr, bemat gu kuru banaas (40,000) de ba ga yong ɛn yaga como.

³⁷Yi e yére de ya sé e rwa ta na Rɔt Yɔrdan, yɛ a yére Rubɛn, na Gat tanga yê Manase rwa ta, bemat gu naga rining na gu kuru baba (120,000) de ba ga myak ɛn na be tó como na kayiyɛ pyɛ̂ como.

³⁸Mwa bemat como de ba sé e yong ɛn yaga tô como, ba wɔ́ e Hɛbrɔn. Yɛn a tɛ̀ e yey mɛn na be wɔ̀ tɛ̀ Davit a sè gbɔng gwɔ̀m BeIsrayɛl mwa. Ano arɔng, mwa BeIsrayɛl ba wuna hɛn na nu hining yaga na Davit a re negwɔm e ra yɛn.

³⁹Yɛn a ra nepɔlɔ netat e hwomo na Davit o, e de nzem re na sɔ̂ pyɛ́ de bemɛn vane mo ba yong a yɛn.

⁴⁰Bemat yére rwa bato yê Isakar, na Zɛbulun, tanga Naftali de ya sé yikyik ba vɛ̀sɛ na pyɛ́, yɛ à nemuk, na nèy regwi na ne anap de ba shumung, na nshi anap tanga něy pwat e ra bemadung, na bemaryat, na bedwa-madung, tanga behywarak. Ano arɔng, yɛn a vɛ̀sɛ na berɔndɔng tanga tyīmit na be yɛt a yɛn. Ba ra pyɛ́ yemo na be dura mɛ yerê yey pyɛng de BeIsrayɛl mwa ba vɔk e yɛnɛ vwel mɛn.