Read berom 1 Neha-Raane 13 Bible Online

1 Neha-Raane 13 - berom bible

1 Neha-Raane 13

¹A vane ano, Gbɔng Gwɔ̀m Davit a hwo vo redu na bemat nuyel bemat como mɛ de ba vɔk bagyɛng bemat gu gu (1,000) na vemo de ba vɔk bemat naga naga (100) e nɛn mɛn.

²E bama mo a hwo ha a BeIsrayɛl mwa a ye, “Ka sede yin a di a jam ano, ko a to sé pyɛ de Dagwi Darwey, Dagwi mot a simo arɔng, ko tik na wot a tomo betom behak vɔk na bwang bemat mot e bapomo mɛn, na bepiris tanga BeLevi; wot a ha a yɛn na yɛn a vey tula hɛn e ngamo tanga wot.

³Ko wot a rɔda kyè wɔ̀ jut Kundung Wuna-na-Sira Dagwi de bá kyini gwɛ jeng de Saul á sè gbɔng gwɔ̀m.”

⁴Bemat o mwa ba vɔk yey pyɛng na vô du mo, ko yɛn a ye ey na hɛ.

⁵Davit kwong a to tula mwa BeIsrayɛl, yi e Rɔt Shihor e Misra vɔk e Lebo Hamat, na be wɔ̀ vey na Kundung Wuna-na-Sira Dagwi yi e Kiriyat-Yɛyarim.

⁶Davit na BeIsrayɛl tanga yɛ ba kyè vɔk e Baala, kɛ Kiriyat-Yɛyarim, e vwêl Yuda, na yɛn a wɔ̀ jut Kundung Wuna-na-Sira de be yila gwɛ na reza Dagwi Darwey, de kwɔn sangal negwɔm mɛ ha sé e tê pyɛ́-cen de ba tâng yɛ à Kɛrup.

⁷Yɛn a jut Kundung Wuna-na-Sira Dagwi o yi e lɔ Abinadap e ra kyɛkyɛ berɔndɔng pwas. Ko Uza tanga Ahiyo ba kyě gyeng kyɛkyɛ mo.

⁸Davit kwong tanga mwa BeIsrayɛl ba rɛ̌ na gap mɛn mwa, na be nɔ̂ng Dagwi nerey, ba ra lɛlɛ na yôm kwo, na yôm shǐ, na bebing na begwák tanga bezing.

⁹Jeng de yɛn a vey wul gazû Kidon, berɔndɔng o ba tiri bol, ko Uza a vɛ̌ nára vwɔ mɛ, a kaba mɛ kundung o.

¹⁰Dagwi Darwey a tɛ̀ shom na Uza sizɔng, ko a vɔk a mɔrɔ hɛ. Uza a vɔk a ku e hagat Kundung Wuna-na-Sira Dagwi o.

¹¹Davit kwong a wok shom de Dagwi Darwey a pat shom e ra Uza, ko pere vey e yunung ba tang kwɔn o à Pɛrɛs-Uza.

¹²Davit a vo bengyip Dagwi Darwey tuk hane, ko a ye, “E rɛ̌ de Kundung Wuna-na-Sirâ Dagwi gwô vey na me ɛ?”

¹³Yaga ano, a yong ɛ̀, na a jut gwɛ, na gwo sè na yɛ e gbɔng repomo Davit wɛt, ko a kwey mɛ wɔ e lɔ Ɔbɛt-Ɛdɔm wo repomo Gat e negya.

¹⁴Kundung o gwa nàra e hwomo pɛl tat. Ko Dagwi Darwey a tɛ̀ a Ɔbɛt-Ɛdɔm nerat, mwa na belɔ mɛ tanga pyɛ̂ mwa de a vɔk.