Read berom 1 Neha-Raane 14 Bible Online

1 Neha-Raane 14 - berom bible

1 Neha-Raane 14

¹Hiram, gwɔ̀m Tur, a tomo a Davit betom. Yɛn a vɔk ɛ babim cɔ́gɔt sida de ba ga yɛt, ko bemat fwom cɔ́gɔt tanga bemat lɔk beduk na beta ba sè tanga yɛn arɔng. Yɛn a lɔk a Davit lɔ gwɔ̀m.

²Ano kwong, Davit a tɔk, Dagwi Darwey a ga tɛ̀ ɛ a sè gbɔng gwɔ̀m e ra BeIsrayɛl.

³E Yɛrusalɛm, Davit a to gwɛ̌ vos beha behak, ko ba tɔs a yɛ nèy bewen na behwong.

⁴Baza nèy a vemo de ba tɔs a yɛ e hwomo: Shamuwa, na Shobap, na Natan, na Sɔlɔmɔn,

⁵na Ibhar, na Ɛlishuwa, na Ɛlpɛlɛt,

⁶na Noga, na Nɛfɛk, na Yafiya,

⁷na Ɛlishama, na Beeliyada tanga Ɛlifɛlɛt.

⁸Jeng de BeFilisti ba wok, ba ga kasa Davit na a tɛ́ ɛ gbɔng gwɔ̀m e ra BeIsrayɛl mwa, yɛn a tomo bemat como mɛn mwa wɔ̀ jama hɛ na be vo ɛ. Ko Davit a wok ha mo a vɛ̌ sogo na a wɔ̀ man na yɛn.

⁹BeFilisti ba pom e Nɛk Rɛfayim ko ba hwo jugu e hwomo.

¹⁰Davit kwong a rangâl Dagwi Darwey, a ye, “Me kyè wɔ̂ como na BeFilisti a? Hwô nɔng me wɛng e ra yɛn a?” Dagwi Darwey a yang ɛ, “Ci, mê nɔng o wɛng e ra yɛn!”

¹¹Ano kwong, Davit a nusu na bemat mɛ, a di wɛng e ra BeFilisti, ko a ye, “Dagwi Darwey a vugu bemat repugu hom e nuyel hom, sede remo de tɛmɛ-nshi wó vugu gwong.” Yaga ano, ba vo a kwɔn o reza Baal Pɛrazim.

¹²BeFilisti ba tele, ba hala pyɛ̂ sekwit mɛn e hwomo, ko Davit a nɔ̂ng bemat mɛ nu, be tula yɛ̄ na be rangas na kya.

¹³E bama jeng cak, BeFilisti mo ba to wò shara hɛn e Nɛk Rɛfayim.

¹⁴Ko Davit a to rangâl Dagwi Darwey, ko Dagwi Darwey a yang ɛ, “Hwo kwon wɔ̀ man gey na yɛn wɛt. Gwɔrɔ e bama mɛn, na hwo wɔ̀ hwo ɛn e bak batin cɔ́gɔt dɔ́m.

¹⁵Jeng de hwà wok wus e ra cɔ́gɔt o sede wus kwɛngɛl, ko hwo ye kyùk-kyuk, hwo hwo e ra yɛn, yaga hane hê dura, ma ga sey yel min, na me re BeFilisti mo.”

¹⁶Davit kwong a ra tyɛng na pyɛ de Dagwi Darwey a ga nɔng ɛ nu, ko a re BeFilisti mo, a ro ɛn yi e Gibɛyɔn pere vɔk e Gɛzɛr.

¹⁷Yi ano, reha nerey Davit ra shara hɛ kagwa, ko Dagwi Darwey a tɛ̀ mwa yére bemat jey ye wok bengyip mɛ.