Read berom 1 Neha-Raane 15 Bible Online

1 Neha-Raane 15 - berom bible

1 Neha-Raane 15

¹Davit a lɔk a to mɛ nelɔ e gbɔng repomo mɛ. Ano arɔng, a yong kwɔn hak yaga Kundung Wuna-na-Sira Dagwi, ko a yong buk naka yaga na be tik ɛ gwɛ.

²Ko a ye, “A sé e BeLevi zɔng de bê jut kundung o, yaga e yɛn à bemat de Dagwi a ga kana kasa na be jurus gwɛ, na yɛn a to ra a yɛ fwom gbak-gbak.”

³Yaga ano, Davit a tɛ̀ be yila BeIsrayɛl mwa vey e Yɛrusalɛm yaga na be vey na Kundung Wuna-na-Sira Dagwi e kwɔn de a ga yong yaga gwɛ.

⁴Ano a tɛ̀ be tula yere Aharon e dem hining, yɛn na BeLevi.

⁵E ji BeLevi mo, yi e ruhup Kohat ba sɛ̀ bemat naga na kuru baba (120) ko Uriyɛl à mwat nuyel mɛn.

⁶Yi e ruhup Mɛrari bemat naga beba na kuru baba (220), ko Asaya à mwat nuyel mɛn.

⁷Yi e ruhup Gɛrshɔn bemat naga na kuru batat (130), ko Yɔwɛl à mwat nuyel mɛn.

⁸Yi e ruhup Ɛlizafan bemat naga beba viisis (200), ko Shemaya à mwat nuyel mɛn.

⁹Yi e ruhup Hɛbrɔn bemat kuru rwit (80), ko Ɛliyɛl à mwat nuyel mɛn.

¹⁰Yi e ruhup Uziyɛl bemat naga na kuru na vɛ beba (112), ko Aminadap à mwat nuyel mɛn.

¹¹E bama mo Davit a yila Zadɔk yɛn na Abiyatar de ba sé bepiris tanga BeLevi vemo: Uriyɛl, na Asaya, na Yɔwɛl, na Shemaya, na Ɛliyɛl tanga Abinadap.

¹²A yang ɛn, “E yin vɛ à bemat nuyel rùhup BeLevi, fung in, yin na besa fwom min, yaga na yin a tɔk wɔ̀ vey na Kundung Wuna-na-Sira Dagwi Darwey, Dagwi BeIsrayɛl vey e kwɔn de ma ga yong yaga gwɛ.

¹³Dagwi Darwey, Dagwi mot á tɛ̀ shom mɛ ye hwo e ra wot, yaga e yin vɛ de yin á jut gwɛ e jeng mɛsɛng o wɛt, ko yaga wot á re a yɛ fongol e gwong de a nɔng ot nu wɛt.”

¹⁴Ano kwong, bepiris tanga BeLevi mo ba fung ɛn na yɛn a wɔ̀ jut kundung Dagwi Darwey, Dagwi BeIsrayɛl.

¹⁵BeLevi mo ba jut gwɛ e basanat mɛn, tyɛng na pyɛ de Dagwi Darwey a kana nɔng Mose nu be ra.

¹⁶Davit a nɔ̂ng bemat nuyel BeLevi nu yɛn a tɛ̀ behak e ji mɛn be sè bemat lwɛlɛ, be ra fwom na pyɛ̂ lwɛlɛ, na yōm kwo, na yōm shǐ tanga bapey lwɛlɛ na be ra mɛ lɛlɛ̂ yey pyɛng.

¹⁷Yi e rùhup bemat lwɛlɛ mo, ba kasa vemo ngan na be ra lɛlɛ na bezing de ba yong na dyam pama, yɛn à Heman Yɔwɛl, na begwa mɛ Asaf Bɛrɛkya tanga Ɛtan Kushaya ve ruhup Mɛrari. Ba to kasa bemat na be sɛlɛ hɛn e de râ nèy yom de ne tosho rɛng-rɛng; yɛn à Zɛkarya, na Yaaziyɛl, na Shɛmiramɔt, na Yɛhiyɛl, na Uni, na Ɛliyap, na Maaseya tanga Bɛnaya. Ko ba kasa bemat na be ra bèguna yom; yɛn à Matitiya, na Ɛlifɛlɛhu, na Mikneya tanga Azaziya, ko ba gwɛ a yɛn bemat gyeng Gbɔng Duk Re Fongol vemo; yɛn à Ɔbɛt-Ɛdɔm na Yɛyɛl.

²²Ba kasa Kɛnanya na a sè mwat nuyel bemat lwɛle BeLevi yaga tɔ̂k lwɛlɛ mɛ.

²³Ba kasa Bɛrɛkya na Ɛlkana yɛn tanga Ɔbɛt-Ɛdɔm na Yɛhiya na be gyenges Kundung Wuna-na-Sira Dagwi. Ano arɔng, ba kasa bepiris na be pɛsɛl bedurum e nuyel kundung o, yɛn à Shɛbaniya, na Yɔshafat na Nɛtanɛl, na Amasai, na Zɛkarya, na Bɛnaya tanga Ɛliyɛzɛr.

²⁵Ano, Davit na bemakuk BeIsrayɛl na bemat nuyel bemat como vê gu gu (1,000) ba wɔ̀ vey na Kundung Wuna-na-Sira Dagwi Darwey o yi e lɔ Ɔbɛt-Ɛdɔm na gbɔng nzem yey pyɛng.

²⁶Ko yaga Dagwi a sɛlɛ BeLevi de ba sé kyè na kundung o naka, yɛn a nára nɔrɔ bemus betaama na beturuk betaama.

²⁷Davit a tɛ̀ gworugu gwolwis gwo linen puruk na rugû fwom arɔng, na mwa BeLevi de ba jut kundung o, mwa na bemat lwɛlɛ tanga Kɛnanya, mwat nuyel bemat lwɛlɛ.

²⁸Ano kwong, mwa BeIsrayɛl ba vey na Kundung Wuna-na-Sira Dagwi na mok tanga pɛsɛl bedurum, na bezing tanga bapêy lwɛlɛ, ko yɛn a ra lwɛlɛ na gap sizɔng na yōm shǐ tanga yōm kwo arɔng.

²⁹Jeng de ba sé yel na kundung o e gbɔng repomo Davit, ko hwā mɛ Mikal, hwông Saul, a ye byak e repɔk duk, ko a di Gbɔng Gwɔ̀m Davit a sé gyilsit, a sé rɛ̌ e nuyel Dagwi Darwey, ko a vɛ̌ byɛs ɛ e yey mɛ.