Read berom 1 Neha-Raane 16 Bible Online

1 Neha-Raane 16 - berom bible

1 Neha-Raane 16

¹Yɛn a vey na Kundung Wuna-na-Sira Dagwi o ko ba tɛ̀ gwɛ e buk de Davit a ga kana yong yaga gwɛ. Ano kwong, yɛn a nása nenɔrɔ yas de be rangas tanga nenɔrɔ wuna nesa vɔk na Dagwi.

²E bama de Davit a ga yɛnɛ nása nenɔrɔ nane, a tɛ̀ a bemat o nerat e ji reza Dagwi Darwey.

³Ko a nɔng kawɛ rwas na hwā e ji BeIsrayɛl regat kpam-tuk, na cɛk namâ rangas, tanga nèy anap de ba shumung.

⁴Davit a tɛ̀ behak e ji BeLevi be ra fwom Dagwi Darwey, Dagwi BeIsrayɛl e nuyel kundung o, yɛn a ra won, yɛn a feng, ko yɛn a somo hɛ arɔng.

⁵Ba tɛ̀ Asaf a sè mwat nuyel mɛn, ko Zɛkarya à mwat sɛlɛ mɛ. Bemat râ yōm à Yɛyɛl, na Shɛmiramɔt, na Yɛhiyɛl, na Matitiya, na Ɛliyap, na Bɛnaya, na Ɔbɛt-Ɛdɔm tanga Yɛyɛl. Asaf a ra lwɛlɛ na bapey lwɛlɛ,

⁶ko Bɛnaya na Yahaziyɛl bepiris yɛn a dopse pɛsɛl bezing kayɛ jeng e nuyel kundung o.

⁷E tuk a hane de Davit a pere nɔ̂ng Asaf na besa fwom mɛ BeLevi fwom ra lɛlɛ̂ somô Dagwi Darwey.

⁸Feng in a Dagwi Darwey, moklo hin mwat de a sé, há in e ji yére bemat jey tomong mɛ!

⁹Rá in a yɛ lwɛlɛ, dak in a yɛ yōm, há in mwa pyɛ̂ langat de a ga ra!

¹⁰Dak in kaa na Dagwi wo jɛrɛ, tik neyey vemo de be re a Dagwi Darwey fongol ne pɛngɛ.

¹¹Wɔ́ in na Dagwi Darwey, yaga a sé wo reto, jama hin hɛ kayɛ jeng.

¹²À yin yére Abraham, sam Dagwi, à yin yére Yakɔp, de Dagwi a kasa, bàre hin tomong langat de a ga ra, bàre hin pyɛ̂ bes mɛ na shɔt de a ga yɛrɛ.

¹⁴Dagwi Darwey yɛ wɛ à Dagwi mot, Badu mɛ be ra jey mwa.

¹⁵E ye bam à wuna-na-sira mɛ gbak-gbak wɛt, e gyeng nu de a nɔng a nezamang gu.

¹⁶Sira mɛ de a wuna na Abraham, de a ra a Yishak na sira arɔng.

¹⁷A to ha a Yakɔp e ra hɛ na he tɛ́ ɛ redu, a nɔ̂ng Israyɛl hɛ na he nàra gbak-gbak.

¹⁸A ye, “Mê nɔng o sevwel Kanaan, hê sè nap mo, hwo tanga yere mo.”

¹⁹E jeng o, yɛn á sè pyak wɛt, bá sè hyehyet zɔng, bá sè sangâl rekyen e vwel o.

²⁰Ba kyě rini yi e yére bemat jey vemo vɔk e vere, yi e segwɔm hak vɔk e hak.

²¹Mwa ano, Dagwi Darwey a tik mwat hwak a midra a yɛn wɛt, a hwɔtɔ a begbɔng gwɔ̀m betong yaga yɛn.

²²A ye, “Yin kwon ra bemat hom de ma ga tik jaram, kɛ yin mǎ bezarap me wɛt!”

²³Rá in a Dagwi Darwey lwɛlɛ, à yin bemat jey mwa! Kahɛ tuk, mok in yɛgɛt yat wɔgɔ, “A ga sey ot!”

²⁴Há in e ji yére bemat jey mwa gbɔng nerey mɛ, mok in e ji bemasi mwa pyɛ̂ bes mɛ!

²⁵Dagwi Darwey a sé gbɔng o, a vey na be nɔng ɛ nerey ding-ding, be sap ɛ e ra cī mwa.

²⁶Mwa yére dyuk yé re a pyɛ́ de ba yong fongol, ko Dagwi Darwey yɛ wɛ a yong lagwi.

²⁷Gbɔng nerey na nedyɛt gbɔng nerat mɛ na gwɔrɔ hɛ, reto na gbɔng nerat ne sila duk re a yɛ fongol.

²⁸À yin yére bemat jey mwa, somo hin gbɔng nerey na retô Dagwi Darwey!

²⁹Nɔng in hɛ nerey de na jam yaga yɛ! Vey in na nenɔrɔ min, yel in mɛ e lalâ Gbɔng Duk mɛ, Yɛ a sé wo jɛrɛ. Ré in a yɛ fongol jeng de ê dura nedyɛt gbɔng nerat mɛ!

³⁰Vow in e nuyel mɛ, à yin bemat jey mwa. Mok in à yére bemat jey mwa wɔgɔ, Dagwi Darwey a sé gbɔng gwɔ̀m! Jey ya tumal gak, vit à pyɛ cak de yê dikta yɛ.

³¹Tik lagwi wo vɔk yey pyɛng, tik jey ye rɛ̌ na nzem. Há in a yére bemat jey mwa wɔgɔ, “Dagwi Darwey a sé re negwɔm.”

³²Tik gworep na kayɛ pyɛ e ji gwɛ be wus! Tik na hiri na kayɛ pyɛ de ye ras e ji vɛ be mok lwɛlɛ!

³³Ano, batin cɔ́gɔt rehwot bê ra biibi, yaga Dagwi Darwey e kyè vey re negwɔm e ra jey.

³⁴Feng in a Dagwi Darwey yaga a sé rwat; tɛ̂ yey mɛ ha sé gbak-gbak.

³⁵Sey ot, à Dagwi Darwey, Dagwi mot! Tula hot yi e yére dyuk na wot somo hwo, wo jɛrɛ, na wot dak kaa e somo mō mó.

³⁶Bē somo Dagwi Darwey, Dagwi BeIsrayɛl yi e susu mo vɔk e nuyel gbak-gbak! Bemat mwa ba ye, “Ano”, ko ba somo Dagwi Darwey!

³⁷Davit a tɛ̀ Asaf na begwa mɛ e nuyel Kundung Wuna-na-Sira Dagwi na yɛn a ragas fwom e hwomo kayɛ jeng, tyɛng na pyɛ de be simo be ragas kahɛ tuk.

³⁸A to tɛ̀ Ɔbɛt-Ɛdɔm Yɛdutun tanga bemat yi e ruhup mɛn, yɛn kuru batyiimin na vɛ rwit (68) be sɛlɛ hɛn na fwom o. Ba to nɔ̂ng Ɔbɛt-Ɛdɔm na Hosa fwom gyeng rùhup repomo arɔng.

³⁹A to tɛ̀ Zadɔk piris tanga besa fwom mɛ be ragas fwom e kwɔ̂n sangal Dagwi Darwey e rahwol de wa sé e Gibɛyɔn.

⁴⁰Kanɛ nagasi na nahywegelek yɛn e nása nenɔrɔ̂ yas de be rangas burang tyɛng na pyɛ de ba jɛk e Bwok-basa Badu de Dagwi Darwey a nɔng BeIsrayɛl.

⁴¹A tɛ̀ Heman, na Yɛdutun na bwang behak de ba kasa na baza mɛn be dopse feng a Dagwi Darwey yaga e tɛ̀ yey na bemat mɛ nesheneshey.

⁴²Ko a sé e Heman tanga Yɛdutun o de ba vɔk fwôm pɛsɛl bezing, na bapey lwɛlɛ tanga pyɛ̂ lwɛlɛ mo cak de be ragas e jeng lɛlɛ̂ sómo Dagwi. A sé e nèy bewen Yɛdutun o de be gyeng rùhup repomo.

⁴³E bama pyɛ́ yemo mwa, kawɛ mwat a kyè wɛrɛ, ko Davit a wɛrɛ arɔng, na a wɔ̀ tɛ̀ a belɔ mɛ nerat.