Read berom 1 Neha-Raane 17 Bible Online

1 Neha-Raane 17 - berom bible

1 Neha-Raane 17

¹Gbɔng Gwɔ̀m Davit a ga sè sangal tɛk e lɔ rey mɛ, a hwo yang Natan, zarap Dagwi, “Di me à womo ma sé sangal e ji lɔ rey de ba yong na cɔ́gɔt sida ryat, ko Kundung Wuna-na-Sira Dagwi gwa sé e ji buk. A sé naka ano a?”

²Natan a toyo a yɛ, a yang ɛ, “Kayɛ pyɛ de hwà di ya jam a hwo e yey mo, ci ra yɛ, yaga Dagwi a sé tanga hwo.”

³Ko e ji naturuk nane, Dagwi a ha na Natan, a ye,

⁴“Ci wɔ̀ yang mwat hom Davit, ma ye ngan: É hwo wɛ de hwô lɔk a me lɔ de mê sangal e ji mo wɛt.”

⁵Yimo de ma pat BeIsrayɛl yi e Misra vey e yunung, ma ga sang sangal e lɔ de ba lɔk wɛt. Ma sé kyě kyè e ji buk zɔng, e gwɛ à kwɔn sangal hom.

⁶Mwa kwɛngɛl de ma kyě kyè tanga BeIsrayɛl, ma ga sang rangâl hwak e ji bemat nuyel mɛn de ma tɛ̀ be sè belek bemat hom, yaga sɛ́ de yɛn a ga lɔk a me duk rwat de ba yong na cɔ́gɔt sida wɛt a?

⁷“Di kwong, há a mwat hom Davit, me Dagwi Darwey, Da Jey Mwa, ma ye ngan: ‘Ma jut o yi e hey e de gyeng vyēl, na me tɛ̀ o hwo tɛ́ o mwat nuyel e ra bemat hom BeIsrayɛl.

⁸Ma ga sè tanga hwo e kahɛ kwɔn de hwà wɔ́ ɛ, ma ga to ro a hwo bemat repugu mo e nuyel mo. Ko di, ma rɔda to tɛ̀, hwo sɛ̀ gbɔng reza tyɛng na begbɔng bemat nuyel jey.

⁹Mê nɔ̂ng bemat hom BeIsrayɛl kwɔ̂n sangal hê tó mɛn, ko mê tik ɛn e hɛ, yaga na be sangal ɛ, ko vit à mwat de ê tɔk to shisa hɛn ɛ. Bemat nengyas bê to tak a yɛn reyɔm sede raane,

¹⁰jeng de ma tɛ̀sɛ bemat nuyel e ra yɛn wɛt. Ma rɔda dul o yi na bemat repugu mo mwa. Ko ma rɔda lɔk lɔ mō.

¹¹Jeng de nepɔlɔ mo na ga sila, ko hwà wɔ sɛ̀ bedabeda mo, ma rɔda tɛ̀ hak yi e ji nèy mo he re negwɔm, ko mê tɛ̀ segwɔm mɛ se sangal na gap.

¹²E yɛ wɛ de ê lɔk a me lɔ, ko me mê tɛ̀ gwofwa negwɔm gwo nàra e lɔ mɛ gbak-gbak.

¹³Ma rɔda sè da mɛ, yɛ arɔng ê sè hwey hom. Mê tik nà tɛ̀ yey na yɛ wɛt, sede remo de ma pat hɛ yi na womo de hwà re negwɔm e bama mɛ.

¹⁴Ma rɔda tɛ̀ ɛ e ra lɔ hom tanga e ra segwɔm hom nesheneshey; gwofwa negwɔm mo gwô nàra gbak-gbak arɔng.’ ”

¹⁵Ko Natan a ha a Davit mwa pyɛ́ de Dagwi Darwey a dura a yɛ.

¹⁶Ano kwong, Gbɔng Gwɔ̀m Davit a wɔ̀ yel e ji buk sangal Dagwi Darwey, a hwo ra won, a ye, “À Darwey Dagwi Darwey, ma sé wa, kɛ belɔ hom ba sé beva, de hwà ga ra a me pyɛ́ ryat yemo ano ɛ?

¹⁷Ko à Darwey Dagwi Darwey, hwà to sé gwɛ̌ ra pyɛ́ de ya dal yane, hwà to ha e ra sangâl lɔ hom e ngamo nuyel arɔng. Ano de hwó dopse ra na bemasi a?

¹⁸Bwang sɛ́ de ma rɔda ha a hwo arɛt? Hwà tɔk me, sam mo, à Darwey Dagwi Darwey.

¹⁹A sé yaga hwà ga ha a me pyɛ́ yemo, ko yaga hwà tɛ̀ yey na me de hwà ra pyɛ́ ryey yemo, yaga na hwo basa a me mɛ.

²⁰Hwà sé gbɔng o ding-ding, à Darwey Dagwi Darwey! Vit à hwak de a sé sede hwo. Kayɛ pyɛ de wot a wokos ye dura, vit à Dagwi sɛ̌ hwo.

²¹Vit à yere cak e ji jey sede BeIsrayɛl arɔng. Hwà wɔ̀ viri hɛn e sesam, na be tɛ́ ɛn bemat mo. Yaga gbɔng pyɛ̂ bes de hwà ra yaga yɛn, reza mo ra ga karak e jey mwa. Hwà ró yére bemat jey na bedagwi mɛn yi e nuyel bemat mo de hwà viri hɛn yi e Misra na be sè bemo.

²²Hwà ga tɛ̀ BeIsrayɛl be tɛ́ ɛn bemo gbak-gbak, ko hwo arɔng, à Dagwi Darwey, hwà ga tɛ́ o Dagwi mɛn.

²³“A remo, à Dagwi Darwey, gyeng ha de hwà ga sira a me tanga lɔ hom. Rá tyɛng pyɛ de hwà ga ha, hwô ra.

²⁴Ano de reza mo rê karak, ko bemat bê tē, ‘Dagwi Darwey, Da Jey Mwa, Dagwi BeIsrayɛl!’ Ko hwô tɛ̀ gwofwa negwɔm hom gwo nàra gbak-gbak.

²⁵À Dagwi hom, hwà ga dura pyɛ́ yemo na me, hwà ye, hwô lɔk lɔ hom. Yaga ano de me, mwat mo, ma sɛ̀ yey ting, na me ra won hemo vey na hwo.

²⁶Di, à Dagwi Darwey, hwo wɛ à Dagwi! Hwó gyeng ha mo kayɛ jeng, ko hwà ga nɔ́ng me neha nerat mo.

²⁷A remo, ma sé ra won, tɛ̀ a lɔ hom nerat mo, ko tik na kayɛ jeng be sɛ̀ mwat e lɔ hom de ê sangal e ra gwofwa negwɔm hom. E hwo à Dagwi Darwey de hwà ga ha; yaga ano, nerat mo na rɔda sɛ̀ e ra lɔ hom nesheneshey.”