Read berom 1 Neha-Raane 18 Bible Online

1 Neha-Raane 18 - berom bible

1 Neha-Raane 18

¹A vane ano, Davit a wɔ̀ hwo e ra BeFilisti, a re ɛn na como, ko a yɛnɛ rê negwɔm mɛn e ra vwel o.

²Ano arɔng, a re BeMowap na como; ba tɛ̀ ɛn e nɛ́n mɛ, ko ba talsa hɛ pyɛ́ de ba tɛ̀ a yɛn.

³E bama mo, a re Rehop, gbɔng gwɔ̀m Zoba na como, e jeng de a sé kyè wɔ e Gwɔrɔt Ɛifaratɛs, na a wɔ̀ tɛ̀ retô negwɔm mɛ e hwomo.

⁴Davit a sey ɛ̀ bekyɛkyɛ bedwa mɛ gu rining (1,000), na bemat como bedwa gu bataama (7,000), tanga ve bol gu kuru baba (20,000). A tik ɛ̀ bedwa mo naga gwining (100) yaga hwɔlɔ bekyɛkyɛ, ko ba yɛt a bwang o mo mwa vɛ badìng bol bama mɛn.

⁵Jeng de BeSirya yi e Damaskus ba wɔ̀ sɛlɛ Gbɔng Gwɔ̀m Hadadɛzɛr na como mo, Davit a mɔbɔs bemat como gu kuru baba na vɛ baba (22,000) e ji vɛ.

⁶A tɛ̀sɛ bagyɛng bemat como mɛ, e bak vwel mɛn, BeSirya mo ba tɛ́ ɛn e nɛ́n mɛ, ko ba talsa hɛ pyɛ́ de ba tɛ̀ a yɛn. Dagwi Darwey a nɔng Davit wɛng e kahɛ kwɔn de a wɔ́ ɛ como.

⁷Davit kwong a jut beruga como vê dyam shinang de bemat como Hadadɛzɛr bá kana vɔk, ko a vey mɛ e Yɛrusalɛm.

⁸A to hashe dyam pama pyak sedesi e bapomo Tɛbat na Kun, bapomo de ba sé vê Hadadɛzɛr. E bama mo, Sɔlɔmɔn a de ba ra fwôm yong gwogbɔng gwopey tikîs nshi, na besesek vɔ̂k Gbɔng Duk o, tanga pyɛ̂ fwom Gbɔng Duk Re Fongol na dyam pama yane mo.

⁹Sede Tow, gbɔng gwɔ̀m Hamat, a wok, Davit a ga re mwa bemat como Hadadɛzɛr na como,

¹⁰a tomo hwey mɛ Yɔram vɔk na Gbɔng Gwɔ̀m Davit na a wɔ̀ kyul ɛ, na a yang ɛ show na yey pyɛng yaga wɛng de a di, yaga Hadadɛzɛr a ga dopse tó como na Tow o. Yɔram o a vɔk a Davit nɔrɔ̂ pyɛ́ detidetu de ba yong na dyam shinang na dyam pyɛng tanga dyam pama.

¹¹Gbɔng Gwɔ̀m Davit kwong a tik a Dagwi Darwey pyɛ́ mo jaram tyɛng sede remo de a ga kana ra na dyam pyɛng tanga dyam shinang de a ga kana hashe yi e yére mwa de a re e como: yɛ̄ à BeƐdɔm, na BeMowap, na BeAmɔn, na BeFilisti, tanga BeAmalɛk.

¹²Abishai de neng mɛ à Zɛruya, a re BeƐdɔm na como e Nɛk Nevwashe, ko a mɔbɔs bemat mɛn gu kuru na gu rwit (18,000).

¹³A tɛ̀sɛ bagyɛng bemat como e yɛnɛ sevwel Ɛdɔm mwa. Ko BeƐdɔm o ba tɛ́ ɛn e nɛ́n mɛ. Dagwi Darwey a nɔ̂ng Davit o wɛng e kahɛ kwɔn de a wɔ́ ɛ como.

¹⁴Davit kwong a re negwɔm e ra BeIsrayɛl mwa. A ra a yɛn pyɛ́ de ya sé tyɛng, na tsak o.

¹⁵Yowap de neng mɛ à Zɛruya, á sè wo nuyêl bemat como. Yɛhɔshafat Ahilut á sè mwat-jɛ̂k pyɛ̂ bare yê negwɔm,

¹⁶Zadɔk Ahitup tanga Ahimɛlɛk Abiyatar bá sè bepiris, ko Seraya á sè mwat-jɛ̂k gbɔng gwɔ̀m.

¹⁷Bɛnaya Yɛhɔyada á sè wo nuyêl bemat gyeng gbɔng gwɔ̀m, ko nèy Davit bewen o bá nɔngɔs hɛn tom ting o hak arɔng.