Read berom 1 Neha-Raane 19 Bible Online

1 Neha-Raane 19 - berom bible

1 Neha-Raane 19

¹A vane ano, Nahash, gbɔng gwɔ̀m BeAmɔn a ku, ko hwey mɛ Hanun ha re negwɔm e to mɛ.

²Davit kwong a ye, “Ma rɔda dura a Hanun Nahash nerat, sede remo de da mɛ á dura a me nerat arɔng.” Ko a hwo tomo betom mɛ wɔ̀ nára a Hanun vɔ e rekû da mɛ mo. Jeng de betom Davit ba wɔ̀ wul vwêl BeAmɔn o,

³ko bemat nuyêl BeAmɔn ba yâng darwey mɛn, “Hwó tē kɛ gyeng Davit a sé nɔ̂ng da mo nerey de a tomo bemat vey nára a hwo vɔ arɛt? Davit a sé tomo hɛn sede bemat wɛlɛ, na be ba wɛrɛm repomo mo, yaga na a bin re ot na como wɛt a?”

⁴Hanun kwong a tɛ̀ be vos betom Davit o, be hwon a yɛn negyɛk e bak gwining, be to yɛt berugu mɛn tyɛng e balus, e bama mo, a tɛ̀ ɛn e gwong be kyè.

⁵A sé a betom o rekyen tyɔng wɛt, ko yɛn a tɔk wɔ e Yɛrusalɛm wɛt. Yɛn a tomo ha mo vɔk na Davit. Jeng de a wok ano, a hwo tomo a yɛn, be ka sangal e Yeriko e ngyen, sɛ̌ negyɛk mɛn o na ras gyam na yɛn a de toyo.

⁶Jeng de BeAmɔn ba tɔk, yɛn a ga tɛ́ ɛn pyɛ vyes e nuyêl Davit, ko Hanun na bemat mɛ BeAmɔn yɛn a jut sede tɔ̌n kuru banaas (40) ve dyam pyɛng na be wɔ jut mɛ bekyɛkyɛ bedwa na bemat como yi e vwêl Mɛsɔpɔtamya rak tanga yi e bebak bavwel Sirya ve Maaka na Zoba e ra byɛ.

⁷Ano kwong, bekyɛkyɛ̂ bedwa vane gu kuru batat na vɛ baba (32,000) mwa na bemat comô gbɔng gwɔ̀m Maaka ba vey tɛ̀ regyɛng como mɛn bagat na Medeba. BeAmɔn o arɔng ba nusu yi e bapomo mɛn yaga tô como mo.

⁸Jeng de Davit a wok ano, a vɛ̌ tomo Yowap na bemat como mwa.

⁹BeAmɔn arɔng ba nusu, yɛn a ngyɛrɛ hɛn yaga tô como e rwi Raba, repomo mɛn, ko begwɔ̀m de ba vey ba ngyɛrɛ hɛn e cwɛl.

¹⁰Sede Yowap a di bagyɛng bemat como ba ngyɛrɛ hɛn e nuyel na bama mɛ, a vɛ̌ kasa besuga como yi e ji BeIsrayɛl, a ngyɛrɛ hɛn na be man gèy na BeSirya mo.

¹¹A jut bwang bemat o, a tɛ̀ vɛ e vwɔ gwà mɛ Abishai, de a ngyɛrɛ hɛn na be man gèy na BeAmɔn.

¹²Yowap a yang Abishai, “Sede hwà di BeSirya bê dal gap hom, ko hwo vey sɛlɛ me, ko ka sede BeAmɔn bê dal gap mo, ko mê vey sɛlɛ hwo arɔng.

¹³Tɛ̀ yey ting! Tik na wot tó como mo na yey ting yaga bemat mot tanga bapomo Dagwi mot arɔng! Tik na Dagwi Darwey a ra pyɛ de a di ya sé a yɛ tyɛng.”

¹⁴Yowap na bemat mɛ ba ye dǔng wɔ̀ tó como na BeSirya, ko BeSirya ba pere tele yi e nuyel mɛn.

¹⁵Sede BeAmɔn ba di BeSirya ba sé tele, yɛn arɔng ba vɛ̌ tele yi e nuyel Abishai, ba wɔ̀ yel e ji repomo. Ano Yowap a toyo yi e de tô como na BeAmɔn, a vɛ hɛ e Yɛrusalɛm.

¹⁶Bama de BeSirya ba di BeIsrayɛl ba ga ré ɛn e como, ko yɛn a wɔ̀ tula hɛn. Gbɔng gwɔ̀m Zoba, Hadadɛzɛr, a tomo be vey na BeSirya de ba sé e gura Gwɔrɔt Ɛifaratɛs. Yɛn a sé e vwɔ Shobak, mwat nuyel como mɛ.

¹⁷Jeng de ba ha a Davit ha mo, a vɛ̌ tula BeIsrayɛl mwa, a ye mɛ̀ dɔ a Rɔt Yɔrdan, ko a kyè mɛ vɔk na yɛn, a ngyɛrɛ bemat como mɛ na be tó como na yɛn. Ba hwo como.

¹⁸Ko BeIsrayɛl ba hwo ro ɛn, yɛn a tele. Davit na bemat mɛ ba mɔbɔs bemat como bekyɛkyɛ bedwa mɛn gu bataama (7,000), na bemat como bol gu kuru banaas (40,000). Ba to mǎ Shobak, mwat nuyel como mɛn, ko a ku e hwomo.

¹⁹Jeng de begwɔ̀m de ba sé e vwɔ Hadadɛzɛr ba di BeIsrayɛl ba ga re ɛn e como mo, ba vɛ̌ wuna sangal netyang na BeIsrayɛl, ba tɛ́ ɛn e nɛ́n mɛn. Yi ano, BeSirya ba tɛ̀ bengyip, ba to simo be sɛlɛ BeAmɔn wɛt.